ភ្នំពេញ ៖ សមត្ថកិច្ចមូលដ្ឋានចោមចៅ២ បានឃាត់ខ្លួនបុរសម្នាក់ និងស្រ្តីម្នាក់ ដែលមកលួចលាក់បង្កាត់ភ្លើងស្នេហ៍នៅបន្ទប់ជួលមួយកន្លែង ។ ការឃាត់ខ្លួននេះ យោងតាមការពាក្យប្តឹងរបស់ស្រ្តីម្នាក់ ដែលបានបាត់ប្តីរបស់ខ្លួន៣ថ្ងៃ ហើយលួចលាក់មានស្រ្តីថ្មី ចោលប្រពន្ធកូន។ សមត្ថកិច្ច ក៏បាននាំខ្លួនពួកគេមកប៉ុស្តិ៍រដ្ឋបាលនគរបាលចោមចៅ២ ធ្វើការដោះស្រាយ ដើម្បីបញ្ចប់រឿង។
ហេតុការណ៍នេះ បានកើតឡើង នៅក្នុងបន្ទប់ជួលមួយកន្លែង បង្កឲ្យមានការភ្ញាក់ផ្អើលកាលពីវេលាម៉ោង៧និង៣០នាទី ថ្ងៃទី២៤ ខែតុលា ឆ្នាំ២០១៩ ស្ថិតនៅក្នុងសង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
ស្រ្តីម្នាក់ ដែលបាត់ប្តីពីផ្ទះចំនួន៣ថ្ងៃ មានការសង្ស័យថាប្តីអាចមានស្រីថ្មីនៅខាងក្រៅផ្ទះ ក៏តាមដានរហូតទាន់ ឃើញទាន់ផ្ទាល់ភ្នែក ប្តី លួចលាក់មានស្រីថ្មី នៅបន្ទប់ជួលមួយកន្លែង ហើយស្រ្តីជាប្រពន្ធ បានយកសោមកចាក់ទ្វាបន្ទប់ជួលពីខាងក្រៅ រួចទៅប្តឹងសមត្ថកិច្ចនគរបាលប៉ុស្តិ៍ ឲ្យមកជួយអន្តរាគមន៍។
ស្រ្តីជាប្រពន្ធដើមមានឈ្មោះ ហ៊ុន ដាលីន អាយុ២៧ឆ្នាំ មុខរបរ កម្មកររោងចក្រ ស្នាក់នៅម្ដុំភូមិឯករាជ្យ៣ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ មានស្រុកកំណើតនៅភូមិពង្រ ស្រុកតាំងគោក ខេត្តកំពង់ធំ ។ ចំណែកប្តីជើងល្អនោះ ឈ្មោះ គា ធារិទ្ធ អាយុ៣១ឆ្នាំ មុខរបរ ជាងដែក មានស្រុកកំណើតនៅឃុំភូមិជាមួយគ្នា។ រីឯស្រីស្នេហ៍នោះ មិនត្រូវគេស្គាល់ឈ្មោះនោះទេ។
ហ៊ុន ដាលីន បាននិយាយថា នាងបានរៀបការជាមួយប្តីមានរយៈពេល៧ឆ្នាំមកហើយ មានកូនចំនួន២នាក់។ ប្តីរបស់គាត់ ពីដំបូងល្អណាស់ មិនដែលធ្វើអ្វីឲ្យរូបគាត់ពិបាកចិត្តទេ ទើបតែមួយរយៈក្រោយនេះ ចេះតែប្លែកៗ មិនបានផ្ដល់លុយមកឲ្យខ្លួនសោះ ថែមទាំងប្រើអំពើហិង្សាមកលើរូបគាត់ទៀត ទើបគាត់មានការសង្ស័យ ក៏បានតាមដាន ស្រាប់តែឃើញប្ដីយកស្រីស្នេហ៍ មកជួលបន្ទប់រស់នៅតែពីរនាក់។ ទើបបាន យកសោមកចាក់ទ្វាបន្ទប់ជួលពីខាងក្រៅ មិនឲ្យចេញរួច ហើយបានរាយការណ៍ឲ្យសមត្ថកិច្ចនគរបាលរដ្ឋបាលប៉ុស្តិ៍ចោមចៅ២ ឲ្យចុះមកជួយធ្វើអន្តរាគមន៍ ហើយនគរបាលឃាត់ខ្លួនប្រុសស្រីទាំងពីរ យកមកប៉ុស្តិ៍ដើម្បីដោះស្រាយ៕ដោយ៖បញ្ញាស័ក្តិ