ខេត្តស្វាយរៀងៈ លោកស្រី ឯក សុវណ្ណភារៈ អភិបាលរងខេត្ត តំណាង លោក ម៉ែន វិបុល អភិបាលខេត្ត និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្ត កាលពីថ្ងៃទី២៤ ខែវិច្ឆិកា ឆ្នាំ២០១៩ បានអញ្ជើញជាអធិបតី ក្នុងទិវាអន្តរជាតិរំលឹកដល់អ្នករងគ្រោះដោយគ្រោះថ្នាក់ចរាចរណ៍ ផ្លូវគោកលើកទី១៤ ដែលពិធីនេះ បានប្រព្រឹត្តទៅនៅបរិវេណសាលាស្រុកស្វាយជ្រំ ខេត្តស្វាយរៀង ។
លោក នួន លីហួន ប្រធានមន្ទីរសាធារណការ និងដឹកជញ្ជូនខេត្ត បានធ្វើរបាយការណ៍ បញ្ជាក់អំពីគ្រោះថ្នាក់ចរាចរណ៍រយៈពេល ៩ខែ ឆ្នាំ២០១៩ ប្រៀបធៀបនឹងរយៈពេល ៩ខែ ឆ្នាំ២០១៨ គឺថយចុះ ៦លើក ស្មើ៥% ។
លោកស្រី ឯក សុវណ្ណភារៈ អភិបាលរងខេត្តស្វាយរៀង បានថ្លែងការចាប់អារម្មណ៍ និងយកចិត្តទុកដាក់ជាសំខាន់ ទៅលើគ្រោះថ្នាក់ចរាចរណ៍ ដែលកើតឡើងក្នុងទឹកដីខេត្តស្វាយរៀង ដើម្បីបង្កើនស្មារតី ទប់ស្កាត់ឱ្យបាននូវគ្រោះថ្នាក់ចរាចរណ៍ ដែលបង្កឱ្យមានការបាត់បង់អាយុជីវិតមនុស្ស ទ្រព្យសម្បត្តិរដ្ឋ និងឯកជនយ៉ាងច្រើន ។
លោកស្រីបានបញ្ជាក់ថា: ការរៀបចំទិវានេះ ជាឆន្ទៈរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយ គតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឲ្យសង្គមជាតិមាន សុខសន្តិភាពពេញលេញ មានការអភិវឌ្ឍលើគ្រប់វិស័យ ជាពិសេសមាន ផ្លូវ ស្ពាន តភ្ជាប់ជាក្រឡាចត្រង្គ ទៅគ្រប់ ទិស តំបន់ ក្នុងប្រទេស និងភ្ជាប់ជាមួយប្រទេសជិតខាង ធ្វើឱ្យជីវភាពរស់នៅ របស់ប្រជាពលរដ្ឋកម្ពុជា មានលក្ខណៈល្អប្រសើរ ជាបន្តបន្ទាប់ អាចមានលទ្ធភាពទិញនូវម៉ូតូ រថយន្ត ស្ទើរតែគ្រប់ក្រុមគ្រួសារ ដើម្បីធ្វើដំណើរទំនាក់ទំនងទេសចរណ៍ និងធ្វើពាណិជ្ជកម្មផ្លាស់ប្តូរ ផលិតផល នៅក្នុងផ្ទៃប្រទេស និងជាមួយប្រទេសជិតខាង យ៉ាងមមាញឹក ទន្ទឹមនឹងនេះ ហានិភ័យ នៃការកើតមានគ្រោះថ្នាក់ចរាចរណ៍ ក៏មានការកើនឡើងដែរ បើសិនមិនមានការក្រើនរំលឹក ឱ្យប្រជាពលរដ្ឋគោរពច្បាប់ចរាចរណ៍ និងប្រុងប្រយ័ត្នក្នុងពេលធ្វើដំណើរ តាមដងផ្លូវ ។
សូមជម្រាបផងដែរថា កន្លងមកលោក ម៉ែន វិបុល អភិបាល ខេត្ត និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្តស្វាយរៀង បានយកចិត្តទុកដាក់បំផុត ចំពោះការងារសុវត្ថិភាពចរាចរណ៍ផ្លូវគោក និងបានណែនាំជាប្រចាំដោយរិះរកគ្រប់វិធី និងមធ្យោបាយ ដើម្បីទប់ស្កាត់ កាត់បន្ថយគ្រោះថ្នាក់ចរាចរណ៍ ។ ជាពិសេស ការប្រារព្ធទិវានេះ ជាការពញ្ញាក់ស្មារតី របស់រាជរដ្ឋាភិបាលកម្ពុជា ឱ្យលាន់ស្នូររំពងសព្វទិសទី រួមជាមួយនឹងការផ្សព្វផ្សាយច្បាប់ ស្តីពីចរាចរណ៍ផ្លូវគោកថ្មី ដើម្បីដាស់តឿនអ្នកប្រើប្រាស់ផ្លូវទាំងថ្មើរជើង ទាំងអ្នកបើកបរយានយន្តគ្រប់ប្រភេទ ឱ្យខិតខំផ្លាស់ប្តូរឥរិយាបថ ដែលមិនគោរពច្បាប់ មកប្រកាន់យកឥរិយាបថដែលគោរពច្បាប់ មានសណ្តាប់ធ្នាប់របៀបរៀបរយល្អ មានការអធ្យាស្រ័យ និងគោរពច្បាប់ចរាចរណ៍ នៅពេលធ្វើដំណើរ ឬនៅពេលបើកបរយានយន្ត រួមគ្នាទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោក ដើម្បីកាត់បន្ថយទុក្ខសោក និងភាពក្រីក្ររបស់ប្រជាពលរដ្ឋ ឱ្យស្របតាមកម្មវិធីនយោបាយរបស់រាជរដ្ឋាភិបាល ក៏ដូចជាស្របតាមសេចក្តីសម្រេច របស់អង្គការសហប្រជាជាតិស្តីពីទសវត្សរ៍ សុវត្ថិភាពចរាចរណ៍ផ្លូវគោក គឺកាត់បន្ថយចំនួនអ្នកស្លាប់ឱ្យបាន ៥០% នៅឆ្នាំ២០២០ ។
ដើម្បីទប់ស្កាត់កាត់បន្ថយគ្រោះថ្នាក់ចរាចរណ៍ផ្លូវគោក អនុគណៈកម្មការសុវត្ថិភាពចរាចរណ៍ផ្លូវគោកខេត្ត សូមធ្វើការអំពាវនាវ ដល់អ្នកប្រើប្រាស់ផ្លូវ និងអ្នកដំណើរតាមផ្លូវថ្នល់ សូមចូលរួមអនុវត្តឱ្យបាននូវអនុសាសន៍របស់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ថា “ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍” ៕ដោយ៖វ៉ៃកូ
