ភ្នំពេញ៖ លោកពេជ្រ ស្រស់ បានស្នើឲ្យអាចារ្យធំ សុំទោសចំពោះព្រះគុណម្ចាស់សាន សុជា ដោយលោកអះអាងថា អាចារ្យធំបានដើរហួសបន្ទាត់ក្រហមក្រមសីលធម៌។
លោកពេជ្រ ស្រស់ សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ និងជាប្រធានគណបក្សយុវជនកម្ពុជា នៅព្រឹកថ្ងៃទី 25 ខែវិច្ឆិកា បានសរសេរសារ នៅលើហ្វេសប៊ុករបស់ខ្លួនថា ដើមឡើយខ្ញុំមិនចង់និយាយទេ ប៉ុន្តែ
លើកនេះអាចារ្យធំ ដូចជាដើរហួសនៃ បន្ទាត់ក្រហមសីលធម៌ពេកហើយ បើអាចារ្យធំរិះគន់លើអ្នកមានគំនិតផ្ទុយ អំពីការថែរក្សាទំនៀមទម្លាប់គ្រប់គ្នា គឺខ្ញុំគាំទ្រ ប៉ុន្តែការដែលប្រើពាក្យមិនសមរម្យលើព្រះសង្ឃ គឺខ្ញុំមិនពេញចិត្តទាល់តែសោះ ជាពិសេសពាក្យពេចន៍ លើគុណម្ចាស់ សាន សុជា តែម្តង..។
លោកបន្តថា តាមព្រះពុទ្ធសាសនាគឺព្រះអង្គមិនឲ្យយកទីខាងក្រៅធ្វើជាទីពឹងនោះទេ គឺព្រះអង្គឲ្យយកខ្លួនឯងជាទីពឹង និងអំពើល្អ ព្រមទាំងព្រះធម៌ ដើម្បីធ្វើជាយាន្តដើម្បីឆ្ពោះទៅរំលត់ទុក្ខ ប៉ុន្តែការ ជឿលើអ្វីមួយក៏ព្រះពុទ្ធមិនបានហាមឃាត់ដែរ ក៏ប៉ុន្តែព្រះអង្គឲ្យជឿប្រកប ទៅដោយបញ្ញាទើបបានសុខដល់ខ្លួន
ក្នុងន័យនេះ ខ្ញុំសូមឲ្យលោកអាចារ្យធំ សុំទោសព្រះតេជគុណ សាន សុជា ដោយស្មារតីទទួលខុសត្រូវ ដើម្បីទុក ជាការគោរពដល់ព្រះសង្ឃ និងបញ្ចប់ ការត្មះតិះដៀលព្រះសង្ឃទាំងខ្លួនមិនយល់ពីព្រះសង្ឃច្បាស់។ បញ្ជាក់ ទោះបីជាអាចារ្យធំមានចេតនាឬអចេតនា ក្នុងការប្រមាថព្រះអង្គ សាន សុជា ក៏ដោយ គឺអាចារ្យធំត្រូវតែសុំទោសព្រះអង្គជាដាច់ខាត ដោយសារការប្រមាថនោះ មានភ្ជាប់រូបព្រះអង្គ សាន សុជាដូច្នេះកម្មបានសាងលើព្រះអង្គរួចទៅហើយដែរ។
facebook ផ្លូវការ ព្រះគុណម្ចាស់សាន សុជា បានបង្ហោះនូវរូបថតមួយសន្លឹក ដែលដែលពណ៌នាពីរូបថតនោះ ដែលមានព្រះគុណម្ចាស់ច្រើនព្រះអង្គ ចាក់សាក់លើព្រះកាយ។ ព្រះអង្គសាន សុជា មានសង្ឃដីកាថា ”មិនដឹងជាត្រៀមទៅច្បាំងជាមួយអ្នកណាទេ។ នត្ថិ កម្មំ សមំ ពលំ = គ្មានកម្លាំងអ្វីស្មើនឹងកម្លាំងកម្មឡើយ”។
ព្រះអង្គ បានសរសេរទៀតថា “ហេតុផលដែលខ្ញុំតែងតែនិយាយ ហើយនៅតែនិយាយរហូតអស់ជីវិត ពាក់ព័ន្ធនឹងជំនឿផ្តេសផ្តាស ព្រោះ ៖ ១- មិនសូវមានអ្នកនិយាយ ២- ស្រឡាញ់សេចក្តីពិត ៣- មនុស្សដ៏ច្រើនបានចាញ់បោកគេ ទាំងទ្រព្យសម្បត្តិ ទាំងចិត្តវិញ្ញាណ ក្លាយជាអតិថិជនរបស់អ្នក ដែលយកពិធីកម្មផ្សេងៗទៅរកស៊ី ៤- ជំនឿផ្តេសផ្តាស បានចូលមករុំព័ទ្ធសច្ចធម៌ មិនឲ្យមានពន្លឺ ប្រៀបដូចវល្លិជ្រៃ រួមរឹតដើមឈើធំ រហូតបាត់ស្រមោល ៥- នៅមានអ្នកអាចយល់ សេចក្តីពិត បន្ទាប់មកកែប្រែបាន”។
ព្រះអង្គ បានបន្ថែមថា រង្វាន់លើកទឹកចិត្តរបស់ខ្ញុំ រួមមាន ៖- រាល់ពេលនិយាយពន្យល់ ខ្ញុំតែងតែគិតថា អ្នកដែលខ្ញុំនិយាយទៅកាន់ គឺជាញាតិរបស់ខ្ញុំ ដែលត្រូវសង្គ្រោះអំពីអន្លង់នៃការយល់ខុស។- រាល់ពេលបានជួបអ្នកយល់ត្រូវ ហើយបានកែប្រែខ្សែជីវិតថ្មី ខ្ញុំតែងសប្បាយចិត្ត ប្រៀបដូចម្តាយបានដឹងថា កូនបានប្រឡងជាប់ដូច្នោះដែរ។ – រាល់ពេលមានការជេរប្រមាថ ខ្ញុំតែងតែគិតថា ពួកគេនៅក្មេង មិនទាន់មានសមត្ថភាពយល់ អំពីបំណងល្អរបស់ខ្ញុំនៅឡើយ ដូច្នេះហើយ ទើបពាក្យប្រមាថទាំងនោះ មិនមែនជាឧបសគ្គសម្រាប់ខ្ញុំទេ ព្រោះថា ការលើកឡើងរឿងអ្វីមួយមកនិយាយក្នុងសង្គម ដែលផ្ទុយទៅនឹងការគិតរបស់មនុស្សដ៏ច្រើន ស្រាប់តែគ្មានការប្រតិកម្មសោះ វាជារឿងចម្លែកខ្លាំងណាស់ ឬថាសម្តីរបស់យើងគ្មានថាមពលទេ ។ – ម្យ៉ាងទៀត ខ្ញុំជឿជាក់ថា ពាក្យពន្យល់ទាំងនេះ នឹងមានអាយុវែងជាងជីវិតរបស់ខ្ញុំ សម្រាប់ជាប្រទីបដល់ជនានុជនជំនាន់ក្រោយ។ តែប៉ុណ្ណឹងឯង។
ទោះយ៉ាងណា ជាមួយនឹងសាររបស់ព្រះអង្គសាន សុជា, អាចារ្យធំ ដែលគេស្គាល់ថា ជាអ្នកអួតខាងអភិរក្សវប្បធម៌ និងចាក់សាក់ពេញខ្លួននោះ បានប្រតិកម្មខ្លាំងៗ នឹងស្ដីបន្ទោសឱ្យព្រះអង្គសាន សុជា។ នៅលើហ្វេសប៊ុក អាចារ្យធំ បាននិយាយថា “ក្រាបថ្វាយបង្គំស្បង់ព្រះអង្គ ខ្ញុំករុណាសូមប្រគេន៣សំណួរ៖ ១/ រាប់ចាប់ពីសម័យនគរភ្នំ តើបុព្វការីជនខ្មែរ បដិបត្តិសាសនាចំនួនប៉ុន្មាន? ២/ តើគ្រប់ទម្រង់ នៃវប្បធម៌បុរាណខ្មែរ ធ្វើកិច្ចសំពះគ្រូតាមរបៀប ព្រហ្មញ្ញ ឬព្រះពុទ្ធ? ៣/ តើព្រះអង្គគ្រូផ្ទាល់ មានឈាមជាជនជាតិអ្វី? ។
អាចារ្យធំ បានប្រើសម្តីធ្ងន់ៗ ប្រមាថព្រះ សាន សុជា ថា “កុំភ្លើ! តិចថៃយកចុះបេតិកភណ្ឌបាត់ តាំងព្រុសថា សាក់ហ្នឹងរបស់ខ្មែរតើ ។ បើព្រះអង្គគ្រូ ខ្វះគំនិតមិនបានជួយថែទេ កុំបំផ្លាញ។ សូមផ្ដាំទៅមនុស្សខ្មែរផង ថាខ្ញុំកាន់ទាំងអស់ ថែទាំងអស់ ឱ្យតែរបស់ដូនតាខ្មែរ”៕ ដោយ៖កូឡាប
