ភ្នំពេញ-តារាចម្រៀងស្រី ឡាយ លក្ខិណា បានបង្ហាញជំហរវិលចូលសិល្បៈវិញពេញមួយទំហឹងតែម្តងបន្ទាប់ពីតារាស្រីរូបនេះ
បានចាកចេញពីពិភពសិល្បៈជាងមួយទសវត្សរ៍រួចមក។
ក្នុងកម្មវិធីតន្ត្រីចម្រៀងរបស់ទូរទស្សន៍ក្នុងស្រុកមួយ តារាស្រីដែលស្ទើរតែបាត់មុខពីសិល្បៈទាំងស្រុងទៅហើយ បានបង្ហាញវត្តមានរបស់ខ្លួនយ៉ាងភ្ងាក់ផ្អើលធ្វើឲ្យអ្នកទស្សនា អាក់អារម្មណ៍មួយភ្លែតហើយ រកនឹកថា អូ…តារាស្រី ឡាយ លក្ខិណា ចូលច្រៀងវិញហើយ។
តារាសាច់ចាំរូបនេះបញ្ជាក់ថា ក្រោយពីផ្លាស់ប្តូពីបើកលក់សម្លៀកបំពាក់ ពីផ្សារអូឬស្សីមក នៅជិតផ្សារទួលគោកវិញ នាងអាចមានពេលទំនេរខ្លះ ដើម្បីចូលប្រឡូកការងារសិល្បៈ។ ថ្មីនេះនាងទទួលបានការងារមួយចំនួន ទាំងការថតបង្ហាញម៉ូត សម្រាប់សម្អាងការ ការឡើងច្រៀងតាមឆាកតន្ត្រីជាដើម ហើយនៅខែធ្នូចុងឆ្នាំ២០១៧ នាងនិងលោកអេន ឌី និងចេញទៅច្រៀងរាំ នៅលើទឹកដីនៃសហរដ្ឋអាមេរិកផងដែ តារាស្រីសម្រស់ចាំរូបនេះបញ្ជាក់ដែរថា ប្រសិនបើគម្រោងចេញ ទៅច្រៀងនៅលើទឹកដីនៃសហរដ្ឋអាមេរិកនេះ លេចជារូបរាង នាងអាចនឹងត្រូចំណាយពេលច្រៀងរាំ នៅទីនោះប្រមាណ២ខែ។
តារាចម្រៀងស្រីវ័យសាមក្រាស់រូបនេះ បានបង្ហាញអារម្មណ៍សប្បាយរីករាយពេលដែលវត្តមានរបស់អ្នកនាងនៅតែទទួលបានការចាប់អារម្មណ៍ពីទស្សនិកជន។ ដូច្នេះហើយអ្នកនាងបានអះអាងថា ក្រោយវិលវិញពីអាមេរិក អ្នកនាងនឹងប្រឡូកសិល្បៈពេញទំហឹងតែម្តង៕ ដោយ-គីម ស្រីរ័ត្ន
