ក្រចេះ៖ អង្គការ WWF ពិតជាក្រៀមក្រំណាស់ដោយសារកូនផ្សោតមានអាយុទើបតែ ១១ ថ្ងៃ ប៉ុណ្ណោះ ត្រូវបានប្រទះឃើញងាប់ អណ្តែតលើទឹកចម្ងាយប្រមាណជា ៧ គីឡូម៉ែត្រ ពីអន្លង់ផ្សោតកាំពី ភាគខាងជើងទីរួមខេត្តក្រចេះ កាលពីថ្ងៃអាទិត្យទី២២ ខែធ្នូ ឆ្នាំ២០១៩។ ខណៈដែលក្រុមការងារស្រាវជ្រាវកំពុងតែធ្វើការបន្តពិនិត្យ និងស្រាវជ្រាវដើម្បីរកមូលហេតុជាក់លាក់នៃការងាប់របស់កូនផ្សោតនេះ ។ ការងាប់ដោយការជាប់នឹងមងនេសាទ ត្រូវបានគេដឹងថាជាកត្តាគំរាមកំហែងដ៏ចម្បងមួយចំពោះការរស់រាន របស់សត្វផ្សោតទន្លេមេគង្គ។
អង្គការ WWF សូមអំពាវនាវឱ្យមានការពង្រឹងការអនុវត្តច្បាប់ជលផល ឱ្យបានតឹងរ៉ឹងបន្ថែមទៀត និងពង្រឹងការហាមប្រាមដាច់ខាតចំពោះការប្រើប្រាស់មងនេសាទ។ អង្គការ WWF សូមស្នើយ៉ាងទទូចដល់ក្រុមការងារទាំងអស់ ដែលរួមមានឆ្មាំទន្លេ ប៉ូលីសមូលដ្ឋាន ខណ្ឌរដ្ឋបាលជលផលខេត្ត រដ្ឋបាលជលផល រដ្ឋបាលខេត្តក្រចេះ និងស្ទឹងត្រែង និងអាជ្ញាធរពាក់ព័ន្ធនានា បន្តរួមសហការគ្នាក្នុងការតាមដាន និងបង្ក្រាបរាល់សកម្មភាពនេសាទខុសច្បាប់ គ្រប់ប្រភេទទាំងអស់តាមដងទន្លេមេគង្គឱ្យបានតឹងរ៉ឹង ជាពិសេសគឺបង្ក្រាបរាល់ការប្រើប្រាស់មងនេសាទនៅក្នុងតំបន់ការពារ និងគ្រប់គ្រងសត្វផ្សោតទន្លេមេគង្គ៕ដោយ៖កូឡាប