ត្បូងឃ្មុំ៖ លោកហេង រតនា អគ្គនាយកស៊ីម៉ាក់ បានសរសេរសារលើហ្វេសប៊ុកថា នៅល្ងាចថ្ងៃទី៣០ ខែមករា ឆ្នាំ២០២០នេះ នៅឃុំដា ស្រុកមេមត់ ខេត្តត្បូងឃ្មុំ មានករណីវាយដំគ្រាប់មិនទាន់ផ្ទុះ ជាសំណល់ពីសង្គ្រាមប្រភេទ៨០មិល្លីម៉ែត្រ ផ្ទុះស្លាប់ម្នាក់។
លោក បានបញ្ជាក់ថា នេះជាមរតកនៃសង្គ្រាម សូមបងប្អូនប្រជាពលរដ្ឋទាំងអស់ មេត្តាចៀសវាង ប៉ះពាល់ វាយដុំគ្រាប់ សំណល់ជាតិផ្ទុះពីសង្គ្រាម និងសុំរាយការណ៍មកកម្លាំងនគរបាលមូលដ្ឋាន អាជ្ញាធរមូលដ្ឋាន និងកម្លាំងស៊ីម៉ាក់ ដើម្បីមានវិធានការដោះស្រាយសុវត្ថិភាពជូន។ ទន្ទឹងនឹងនេះ ប្រសិនបងប្អូនប្រជាពលរដ្ឋ បានឃើញបុគ្គលណាលាក់ទុកគ្រាប់មិនទាន់ផ្ទុះ សូមរាយការណ៍ជូនសមត្ថកិច្ចដូចខាងលើ ដើម្បីអង្គភាពជំនាញមានវិធានការតាមនីតិវិធី។
អាជ្ញាធរមីន បានចេញប្រកាស ព័ត៌មានបឋមថា នៅថ្ងៃទី៣០ ខែមករា ឆ្នាំ២០២០ វេលាម៉ោង១៣និង៣០នាទី មានករណីផ្ទុះគ្រាប់មិនទាន់ផ្ទុះ នៅភូមិបុសតាកុក ឃុំដារ ស្រុកមេមត់ ខេត្តត្បូងឃ្មុំ បណ្តាលឱ្យប្រជាពលរដ្ឋម្នាក់បានស្លាប់ ។ ហេតុការណ៍នេះបានកើតឡើងនៅពេលដែលជនរងគ្រោះកំពុងដំគ្រាប់ ៨០មីលីម៉ែត្រ ដើម្បីយករំសេវ។
ជនរងគ្រោះឈ្មោះ ទួន វ៉ិត ភេទប្រុស អាយុ ៥៥ឆ្នាំ មានទីលំនៅភូមិបុសតាកុក ឃុំដារ ស្រុកមេមត់ ខេត្តត្បូងឃ្មុំ បានបាត់បង់ជីវិតនៅនឹងកន្លែងកើតហេតុ។
ចំណែក នៅថ្ងៃទី៣០ ខែមករា ឆ្នាំ២០២០នេះ នៅភូមិពាមតា ឃុំតាតោក ស្រុកសំឡូត ខេត្តបាត់ដំបង មានករណីគ្រោះថ្នាក់ផ្ទុះមីនស្គរធ្វើឲ្យដាច់ជើងខាងស្តាំ នៅពេលដែលជនរងគ្រោះដើរដាក់អន្ទាក់សត្វ។ ជនរងគ្រោះឈ្មោះ សាយ ពៅ អាយុ៥០ឆ្នាំ ភេទប្រុស រស់នៅភូមិពាមតា ឃុំតាតោក ស្រុកសំឡូត ខេត្តបាត់ដំបង។
ជនរងគ្រោះត្រូវបានក្រុមគ្រួសារបញ្ជូនទៅព្យាបាល នៅមន្ទីរពេទ្យបង្អែកខេត្តបាត់ដំបង។ កាលពីមុនជនរងគ្រោះធ្លាប់ជាន់មីនផ្ទុះដាច់ជើងឆ្វេងម្ដងរួចមកហើយ ជាហេតុធ្វើឲ្យលើកនេះគាត់ត្រូវពិការជើងទាំងពីរ។
អាជ្ញាធរមីន បានឲ្យដឹងថា គិតចាប់ពីឆ្នាំ១៩៧៩ មកដល់ពេលនេះ មានជនរងគ្រោះដោយសារមីន និងសំណល់ជាតិផ្ទុះពីសង្គ្រាម សរុបចំនួន ៦៤.៨៥៧ នាក់ ក្នុងនោះចំនួន ៥១.០៩៨នាក់ រងគ្រោះដោយសារមីន និងចំនួន ១៣.៧៥៩ នាក់ រងគ្រោះដោយសារសំណល់ជាតិផ្ទុះពីសង្គ្រាម។
សូមកុំកែច្នៃ ដុំលេង គ្រាប់មិនទាន់ផ្ទុះ វាអាចបណ្តាលឲ្យស្លាប់ និងធ្លាក់ខ្លួនពិការ គ្រប់ពេលវេលា។
សូមបងប្អូនប្រជាពលរដ្ឋបើបានឃើញគ្រាប់មិនទាន់ផ្ទុះ សូមរាយការណ៍ជូនអាជ្ញាធរមានសមត្ថកិច្ច ឬ ប្រតិបត្តិករបោសសម្អាតមីននៅជិតនោះ ដើម្បីយកទៅកម្ទេចចោល៕ដោយ៖កូឡាប