មហាសេដ្ឋីជប៉ុន ដែលស្វែងរកដៃគូជីវិតដើម្បីធ្វើដំណើរទៅលេងជុំវិញឋានព្រះច័ន្ទជាមួយគ្នា ពេលនេះបានប្រកាសលុបចោលគម្រោងស្វែងរកដៃគូជានារីវិញ។
លោក Yusaku Maezawa ស្ថាបនិករបស់ក្រុមហ៊ុនអនឡាញដ៏ធំឈ្មោះ Zozo ដែលលក់សម្លៀកបំពាក់ កាបូប និងសម្ភារជាច្រើនទៀត បានអញ្ជើញស្រ្តីនៅលីវវ័យ ២០ឆ្នាំឡើងឲ្យចូលរួមព្រឹត្តិការណ៍ផ្គូផ្គងរបស់គាត់។
មានស្រ្តីជិត ២៨.០០០បានដាក់ពាក់ ប៉ុន្តែនៅថ្ងៃព្រហស្បតិ៍ម្សិលមិញនេះ គាត់បាននិយាយថា គាត់មានអារម្មណ៍ច្របូកច្របល់ និងបានលុបចោលគម្រោងរើសដៃគូនោះវិញ។
ទោះយ៉ាងណាក៏ដោយ គាត់នៅតែមានគម្រោងធ្វើដំណើរទៅកាន់ឋានព្រះច័ន្ទនៅក្នុងឆ្នាំ ២០២៣ ដោយគ្មានដៃគូ។
ក្នុងខែមករានេះ មហាសេដ្ឋីវ័យ ៤៤ឆ្នាំខាងលើ បានធ្វើការផ្សព្វផ្សាយតាមអនឡាញ ស្វែងរកដៃគូជីវិត ដើម្បីធ្វើដំណើរទៅលេងឋានព្រះច័ន្ទជាមួយគ្នា។
នៅក្នុងវេបសាយ មានបញ្ជាក់ពីលក្ខខ័ណ្ឌ និងលក្ខណៈវិនិច្ឆ័យសម្រាប់អ្នកដាក់ពាក្យ រួមមានដូចជា ពួកគេត្រូវតែជាអ្នកនៅលីវ មានអាយុច្រើនជាង ២០ឆ្នាំ និងមានចំណាប់អារម្មណ៍ចង់ទៅលេងនៅលំហរអាកាស។
ស្រ្តីម្នាក់នឹងត្រូវធ្វើការជ្រើសរើស ប៉ុន្តែនៅថ្ងៃព្រហស្បតិ៍ម្សិលមិញនេះ គាត់បានប្រកាសថា គាត់មិនស្វែងរកដៃគូដើម្បីទៅលេងលំហរអាកាសជាមួយគាត់ទៀតទេ។
សូមបញ្ជាក់ថា មហាសេដ្ឋីអនឡាញខាងលើ ត្រូវបានគេដឹងថា ទើបតែបានបែកគ្នាជាមួយនឹងតារាសម្តែងជប៉ុនឈ្មោះ Ayame Goriki វ័យ ២៧ឆ្នាំ។ គាត់គឺជាមនុស្សអ្នកដំណើរឯកជនដំបូង ដែលនឹងធ្វើដំណើរទៅកាន់ឋានព្រះច័ន្ទ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC