ខេត្តស្វាយរៀងៈ ម៉ូតូចំនួន២គ្រឿង ត្រូវបានចោរចូលកាត់របងផ្ទះចូលយកបានយ៉ាងរំភើយ ខណៈដែលម្ចាស់បានយកមកដាក់ខាងក្រោមផ្ទះ ហើយម្ចាស់បានឡើងទៅសម្រាកនៅលើផ្ទះ ដោយបានចាក់ច្រវ៉ាក់ការពារ ដើម្បីកុំឱ្យចោរលួច ប៉ុន្តែនៅតែពុំអាចការពារបានឡើយ។
សមត្ថកិច្ចបានឱ្យដឹងថាៈ កាលពីវេលាម៉ោង ៥ ព្រឹកថ្ងៃទី៣១ ខែមករា ឆ្នាំ២០២០ មានប្រជាពលរដ្ឋ បានរាយការណ៍មកសមត្ថកិច្ចថា នៅត្រង់ចំណុចភូមិគក់ប៉ែ សង្កាត់ចេកក្រុង ក្រុងស្វាយរៀង មានករណីចោរកម្ម( ចូលលួច ម៉ូតូចំនួន02គ្រឿង)នៅ ពេលទទួលបានព័ត៌មានហើយ កម្លាំងជំនាញបានសហការជាមួយប៉ុស្តិ៍រដ្ឋបាល ចុះទៅដល់កន្លែងកើតហេតុ ដើម្បីធ្វើការស្រាវជ្រាវ ពិតជាបាត់ម៉ូតូ ចំនួន ២ គ្រឿងពិតមែន។
ប្រភពដដែលបានបន្តថាៈ ជនសង្ស័យមិនស្គាល់អត្តសញ្ញាណ បានធ្វើសកម្មភាព កាត់របងលួសខាងក្រោយផ្ទះចូល ចាក់សោច្រវ៉ាក់ម៉ូតូ ដែលទុកក្រោមផ្ទះលួចយកម៉ូតូ ទី១-ម៉ូតូម៉ាកHONDA.C125 សេរី ២០០៨ ពណ៌ខ្មៅ ពាក់ផ្លាកលេខតាកែវ 1A.8963 ទី២-ម៉ូតូម៉ាកWawe ស៊េរី២០១៩ ពណ៌ខ្មៅ ពាក់ផ្លាកលេខ ស្វាយរៀង 1.O. 4785 ជាកម្មសិទ្ធិរបស់ជនរងគ្រោះឈ្មោះអ៊ុក សាវឿន ភេទប្រុសអាយុ 38 ឆ្នាំ មុខរបរកសិករ រស់នៅភូមិកើតហេតុ ។
សមត្ថកិច្ចបានឱ្យដឹងបន្តទៀតថាៈ តាមការបំភ្លឺ របស់ជនរងគ្រោះ បានឲ្យដឹងថា កាលពីថ្ងៃទី ៣០ ខែមករា ឆ្នាំ ២០២០ វេលាម៉ោង ១០យប់ ខ្លួនបានយកម៉ូតូចំនួនពីរគ្រឿង ចាក់សោច្រវ៉ាក់នៅក្រោមផ្ទះ រួចក៏ឡើងទៅដេកលើផ្ទះ រហូតដល់ម៉ោង១រំលងអធ្រាត្រថ្ងៃទី ៣១ ខែមករា ឆ្នាំ ២០២០ ពេលខ្លួនចុះពីលើផ្ទះមកដល់ក្រោមឃើញម៉ូតូនៅដដែល ក៏ឡើងទៅដេកលើផ្ទះវិញ លុះដល់ម៉ោង 5ព្រឹក ពេលចុះមកក្រោមផ្ទះ បាត់ម៉ូតូ ហើយឆោឡោតែម្តង។ បច្ចុប្បន្នសមត្ថកិច្ចយើងកំពុងធ្វើការស្រាវជ្រាវ៕ដោយ៖ វ៉ៃកូ
