យោធាចិននឹងធ្វើការគ្រប់គ្រងទៅលើមន្ទីរពេទ្យ ដែលរដ្ឋាភិបាលសាងសង់ សម្រាប់ព្យាបាលអ្នកជំងឺផ្ទុកវីរុសមរណៈកូរ៉ូណា។ មន្ទីរពេទ្យនោះសាងសង់ជិតរួចរាល់ហើយ។
ពេទ្យទាហ៊ានចំនួន ១.៤០០នាក់នឹងធ្វើការព្យាបាលអ្នកជំងឺ នៅមន្ទីរពេទ្យដែលមាន ១.០០០គ្រែ ហើយមន្ទីរពេទ្យនឹងទទួលយកអ្នកជំងឺដំបូងនៅថ្ងៃចន្ទនេះ ក្រោយពេលបានធ្វើការសាងសង់អស់រយៈពេល ១០ថ្ងៃ។
វីរុសកូរ៉ូណា មានការរីករាលដាល នៅក្នុងប្រទេសចិនយ៉ាងលឿន រហូតធ្វើឲ្យរដ្ឋាភិបាលចិនពិបាកធ្វើការគ្រប់គ្រង។ តួលេខចុងក្រោយបានបង្ហាញថា អ្នកស្លាប់ដោយសារវីរុសដ៏កាចសាហាវនោះ បានកើនឡើងដល់ចំនួន ៣៦២នាក់ និងមានការឆ្លងលើស ១៧.០០០ករណី។
កាលពីថ្ងៃព្រហស្បតិ៍កន្លងទៅនេះ អង្គការសុខភាពពិភពលោក (WHO) បានប្រកាសគ្រោះអាសន្នជាសកលជុំវិញ វីរុសមរណៈដែលផ្ទុះចេញពីចិន និងបានរីករាលដាលទៅកាន់តំបន់ និងប្រទេសជាង ២០ទូទាំងពិភពលោក។
ប្រទេសជាច្រើន បានធ្វើការបិទជើងហោះហើរមកពីចិន និងបានជម្លៀសពលរដ្ឋរបស់ខ្លួនចេញ ដើម្បីការពារការរីករាលដាលវីរុសមរណៈ ចូលក្នុងប្រទេសរបស់ពួកគេ។
អាមេរិចបានប្រកាសហាមមិនឲ្យជនបរទេសទាំងឡាយណា ដែលបានធ្វើដំណើរទៅលេងប្រទេសចិនក្នុងរយៈពេល ១៤ឆ្នាំចុងក្រោយ ចូលក្នុងប្រទេសរបស់ខ្លួនឡើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
