ប្រទេសចិនបានយល់ព្រមអនុញ្ញាតឲ្យអ្នកជំនាញសុខភាពអាមេរិច ចូលមកប្រទេសរបស់ខ្លួន ដែលវាគឺជាផ្នែកមួយនៃកិច្ចប្រឹងប្រែង របស់អង្គការសុខភាពពិភពលោក ក្នុងការជួយប្រយុទ្ធប្រឆាំងវីរុសកូរ៉ូណានៅចិន ខណៈវីរុសមរណៈនេះបានរីករាលដាលយ៉ាងលឿនពីមួយថ្ងៃទៅមួយថ្ងៃ។
អ្នកនាំពាក្យអង្គការសុខភាពពិភពលោក (WHO) បានថ្លែងនៅថ្ងៃចន្ទម្សិលមិញថា ក្រុមអ្នកជំនាញដែលដឹកនាំដោយ WHO អាចនឹងធ្វើដំណើរមកចិននៅដើមសប្តាហ៍នេះ ដើម្បីធ្វើការស៊ើបអង្កេតលើការផ្ទុះរបស់វីរុសកូរ៉ូណា ខណៈដែលប្រធាន WHO និងប្រធានាធិបតីចិន ស៊ី ជីនពីងបានព្រមព្រៀងគ្នា។
កាលពីថ្ងៃចន្ទម្សិលមិញនេះ ចិនបានចោទប្រកាន់អាមេរិចថា បង្កើតឲ្យមានការភ័យខ្លាចខ្លាំងពីបញ្ហាវីរុសកូរ៉ូណា ដោយអាមេរិចបានធ្វើការជម្លៀសប្រជាជនខ្លួនចេញ និងរឹតត្បិតលើការធ្វើដំណើរចូលក្នុងប្រទេសរបស់ខ្លួន។
អាមេរិចបានប្រកាសហាមមិនឲ្យជនបរទេសទាំងឡាយណា ដែលធ្លាប់ធ្វើដំណើរទៅកាន់ប្រទេសចិន ក្នុងរយៈពេល ១៤ថ្ងៃចុងក្រោយ ចូលក្នុងប្រទេសរបស់ខ្លួនឡើយ ចំណែកពលរដ្ឋរបស់ខ្លួន ដែលត្រូវបានជម្លៀសចេញពីចិន ត្រូវបានដាក់នៅឲ្យដាច់ដោយឡែករយៈពេល ១៤ថ្ងៃ។
សូមបញ្ជាក់ថា រហូតមកដល់ថ្ងៃអង្គារនេះ វីរុសមរណៈកូរ៉ូណា បានផ្តាច់ជីវិតមនុស្សចំនួន ៤២៦នាក់ ខណៈការឆ្លងបានរីករាលដាលទៅកាន់មនុស្សជាង ២០.០០០នាក់នៅក្នុងប្រទេស និងតំបន់ចំនួន ២៤ទូទាំងពិភពលោក។ មានអ្នកជំងឺតែម្នាក់ប៉ុណ្ណោះ ដែលស្លាប់នៅក្រៅប្រទេសចិន នោះគឺក្នុងប្រទេសហ្វីលីពីន។ ចំណែកករណីជាសះស្បើយមានចំនួន ៦៤៤នាក់។
វីរុសដ៏អាថ៌កំបាំងនេះ ត្រូវបានគេជឿជាក់ថាចាប់ផ្តើមផ្ទុះក្នុងខែធ្នូ ចេញពីផ្សារមួយកន្លែងដែលលក់សត្វព្រៃ ស្ថិតក្នុងទីក្រុងវូហាន នៃខេត្តហូបេ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia