ភ្នំពេញ៖អ្នកធាក់ស៊ីក្លូជើងចាស់ ឬវ័យចាស់និងវ័យកណ្ដាលក៏ដូចអ្នកធាក់ស៊ីក្លូវវ័យក្មេងចំនួន៣នាក់បានបង្ហាញទឹកចិត្តសប្បាយរីករាយនិងរំភើបអស្ចារ្យដែលក្នុងមួយជីវិតនេះបានជួបជាមួយសម្ដេចតេជោហ៊ុន សែនដោយផ្ទាល់តាមរយៈការអនុញ្ញាតិឱ្យបងប្អូនអ្នកធាក់ស៊ីក្លូជាង៣០០នាក់ជួបសំណេះសំណាលនិងពិសារបាយសាមគ្គីជាមួយរួចហើយសម្ដេចតេជោបានផ្ដល់អំណោយជូនម្នាក់ៗចំនួន៥៧ម៉ឺនរៀលថែមទៀត។
ជាក់ស្ដែងលោកតានូ យ័ន អាយុ៧១ឆ្នាំ រស់នៅឃុំជីរោទ៍ ស្រុកត្បូងឃ្មុំ ខេត្តត្បូឃ្មុំ បានបង្ហាញពីទឹកចិត្តផ្ទាល់ខ្លួនដោយទឹកមុខញញឹមថា៖កាលពីព្រឹកមិញនេះថ្ងៃទី១៣ខែមករានេះរូបខ្ញុំក៏ដូចជាអ្នកធាក់ស៊ីក្លូវជាច្រើនទៀតបានជួបជាមួយសម្តេចតេជោគឺពិតជាសំណាងណាស់សម្រាប់ខ្ញុំដែលមួយជីវិតមិនស្មានថាខ្លួនបានជួបនាយករដ្ឋមន្ត្រីនោះទេ ប៉ុន្តែព្រឹកមិញនេះរូបខ្ញុំបានជួបហើយថែមទាំងបានប៉ះដៃសម្តេចតេជោបន្តិចដែរ ដោយសារតែសម្តេចដើរលឿនពេក ។ លោកតាបញ្ជាក់ទៀតថា៖ទម្រាំតែបានប៉ះដៃសម្តេចបាន ខ្ញុំខំប្រជ្រៀតគេ ដើម្បីបានប៉ះដៃសម្តេច ដៃសម្តេចត្រជាក់ស្រេងតែម្តង។ ខ្ញុំចង់សរសើរខ្លួនឯងដែរដែលបានប៉ះដៃសម្តេច។ ខ្ញុំមិនដែលនឹកគិតថាបានជួបនិងប៉ះសម្តេចតេជោដោយផ្ទាល់បាននោះទេ។កន្លងមកខ្ញុំបានឃើញលោកតែក្នុងទូរទស្សន៍ ប៉ុន្តែដល់ពេលបានឃើញផ្ទាល់បែបនេះដូចជាមានអារម្មណ៍យ៉ាងម៉េចមិនដឹងទេខ្ញុំដូចជាសប្បាយរីករាយអីចឹងទៅនិងទៅជាម្យ៉ាងដែរ។ ខ្ញុំដេកគិតរាប់ឆ្នាំហើយថាខ្លួនប្រហែលមួយជីវិតនេះមិនបានជួបសម្តេចតេជោទេ។
ក្នុងនោះដែរលោកតាក៏បានសម្តែងនូវក្តីអារម្មណ៍ក្នុងចិត្តថាក្នុងពេលជួបសំណេះសំណាលនាព្រឹកថ្ងៃទី១៣មករានេះ ខ្ញុំគិតថាមានអារម្មណ៍សប្បាយរីករាយប្លែកខុសពីធម្មតា។តែក្រោយពេលបានជួបជាមួយសម្តេចហើយគិតខ្លួនឯងថានៅស្រុកខ្មែរមានតែសម្ដេចមួយហ្នឹង ជាអ្នកដឹកនាំស្រុកខ្មែរត្រឹមត្រូវ ហើយសម្តេចបានស្រឡាញ់ប្រជាជនរបស់លោកខ្លាំងណាស់ ។ លោកតាថា៖ ធ្លាប់និយាយលេងដែរ កាលណាទើបបានជួបជាមួយសម្តេចបានម្ដង និងចង់និយាយតទល់ជាមួយសម្តេចដោយផ្ទាល់បានហ្នឹងគេទៅ ប៉ុន្តែស្រាប់តែឥឡូវជួបមែនតែអត់បាននិយាយជាមួយសម្តេច។
លោកតាបញ្ជាក់ដោយរំលឹកពីការចងចាំរបស់គាត់ពីសម្តេចតេជោកាលពី៤៤ឆ្នាំមុនបានរងរបួសដោយគ្រាប់កាំភ្លើងសត្រូវរហូតដល់ពិការភ្នែក គឺនៅក្នុងភូមិជីរោទ៍ គឺភូមិខ្ញុំតែម្តង កន្លែងប៉មតែម្តងក្នុងសម័យសង្គ្រាមឆ្នាំទសវត្សទី៧០ ហើយក្នុងពេលនោះខ្ញុំក៏នៅក្នុងភូមិដែរ ប៉ុន្តែដោយការវ៉ៃគ្នាខ្លាំងពេក គេបានជម្លៀសប្រជាជនចេញក៏បានរួចជីវិតរហូតដល់សព្វថ្ងៃនេះ។លោកតាបានបញ្ជាក់ថា៖ក្រោយពេលបានថវិកាឧបត្ថម្ភរបស់សម្តេចតេជោ ខ្ញុំគិតថាយកលុយនេះទៅសងគេខ្លះដោយសារតែខ្ញុំខ្ចីលុយគេមកព្យាបាលជំងឺមានរយៈពេលពីរឆ្នាំមកហើយ។
លោកតាយ័នបានរៀបរាប់ថា៖ក្នុងវ័យ៧១ឆ្នាំនេះរូបខ្ញុំបានប្រកបជាអ្នកធាក់ស៊ីក្លូនេះមានរយៈពេលប្រមាណជាង៣០ឆ្នាំហើយ ជារៀងរាល់ឆ្នាំពីមួយឆ្នាំទៅមួយឆ្នាំ គឺមិនបានវិលត្រឡប់ទៅប្រកបការងារនៅស្រុកកំណើតនោះទេ ដោយសារតែមានកូនចៅនៅប្រកបការងារស្រែចម្ការនោះហើយ។ការប្រកបរបរធាក់ស៊ីក្លូនេះចេះតែធាក់ទៅតាមដំណើរមនុស្សចាស់។ លោកតាបានរៀបរាប់គាត់មានកូន៣នាក់ ហើយកូនមួយរត់ម៉ូតូឌុប និងមួយចំនួនទៀតធ្វើចម្ការ។ លោកតាយ័ន្ត បានបញ្ជាក់ទៀតថា៖សព្វថ្ងៃនេះរូបគាត់បន្ទាប់ពីធាក់ស៊ីក្លូរួចហើយបានមកសុំប្រធានផ្សារកណ្តាលស្នាក់នៅបណ្តោះអាសន្នលើតូបលក់ដូរ ។ចំណែកឯកទឹកត្រូវទិញទឹកគេដើម្បីងួតក្នុងតម្លៃ១០០០រៀលសម្រាប់ងួតម្តងជាមួយនឹងការបោកខោអាវ។ លោកតាបន្តថា៖ ក្នុងមួយថ្ងៃអាចរកចំណូលពីធាក់ស៊ីក្លូបានជាង១ម៉ឺនរៀល ហើយថ្ងៃណាខ្លះបានតែ៨ពាន់រៀលទេជាមួយនឹងការទូទាត់ថ្លៃបាយ គឺហូបបាយដែលឆ្ងាញ់តម្លៃ៣ពាន់រៀល។ ក្នុងរយៈពេលដែលធាក់ស៊ីក្លូជាច្រើនឆ្នាំមកនេះ គឺសន្សំបានលុយបន្តិចបន្តួច និងបានផ្ញើទៅស្រុក ៥ម៉ឺនឬ៦ម៉ឺនរៀល ដោយផ្ញើតាមឡានតាក់ស៊ី។ ចំណែកអ្នកនៅស្រុកជាមួយគ្នាមានប្រមាណ៣នាក់ដែរដែលប្រកបរបរធាក់ស៊ីក្លូជាមួយ។
ចំណែកលោក សៅ រ៉ុន អាយុ៥៣ឆ្នាំ ដែលរស់នៅភូមិស្វាយជម្រៅ ឃុំស្វាយយា ស្រុកស្វាយជ្រំ ខេត្តស្វាយរៀង បានថ្លែងថា៖ ខ្ញុំបានមកធាក់ស៊ីក្លូនេះតាំងពីជំនាន់សម្តេចតេ វិលចូលស្រុកវិញម្ល៉េះ។ លោកតា ក៏បានថ្លែងអរគុណដល់សម្តេចតេជោ ដែលបានយកចិត្តលើអ្នកធាក់ស៊ីក្លូ រួមនឹងប្រាក់ប្រចាំថ្ងៃនេះ ។ ហើយប្រាក់ឧបត្ថម្ភដែលសម្តេចតេជោ ផ្ដល់ដល់ខ្ញុំនេះ ខ្ញុំមិនយកទៅណាឲ្យខាតបង់ទេ គឺខ្ញុំយកទៅបង្កើតមុខរបរមួយសម្រាប់គ្រួសារខ្ញុំទៅថ្ងៃអនាគត ។
លោកបានបញ្ជាក់ថា៖ របរធាក់ស៊ីក្លូនេះ មិនជាស្រួល ហើយក៏មិនពិបាកដែរ ប៉ុន្តែសម្រាប់ខ្ញុំជាអ្នកក្រដូចជាស្រួលដែរ ដោយសារតែយើងមានសិទ្ធិសេរីភាពនឹងរករបរនេះ ហើយក៏គ្មាននរណាមកបង្ខិតបង្ខំយើងហើយថាអ្វីឲ្យយើងនោះទេ ។ លោកថា ថ្វីត្បិតតែខ្ញុំធាក់ស៊ីក្លូមែន ប៉ុន្តែមានសិទ្ធិសេរីភាពគឺល្អ។
ចំណែកប្អូន ជ្រិន កុយ អាយុជាង២០ឆ្នាំ រស់នៅស្រុកត្បូងឃ្មុំ ខេត្តត្បូងឃ្មុំ បាននិយាយថា៖ខ្លួនមកមកធាក់ស៊ីក្លូនេះមានរយៈពេលពីរឆ្នាំមក ហើយសារតែអត់មានការងារធ្វើ។ ខ្ញុំបានមកជួលស៊ីក្លូគេមកធាក់ដើម្បីចិញ្ចឹមជីវិត ហើយការធាក់ស៊ីក្លូក៏មិនស្រួលណាស់ណាទេ ជួនកាលមិនរួចថ្លៃបង់ស៊ីផង។ ហើយក្រោយពេលដែលបានជួបជាមួយសម្តេចតេជោ ធ្វើឲ្យខ្ញុំមានអារម្មណ៍ល្អនិងសប្បាយរីករាយ ជាពិសេសបានហូបអាហារដែលឆ្ងាញ់ៗដែលជាការរៀបចំជាពិសេស របស់សម្តេចតេជោ។បងប្អូនអ្នកធាក់ស៊ីក្លូ បានបង្ហាញក្តីសប្បាយរីករាយយ៉ាងចំពោះការសម្រេចរបស់សម្តេចប្រមុខរាជរដ្ឋាភិបាលអនុញ្ញាតឲ្យពួកគាត់ព្យាបាលដោយមិនគិតថ្លៃតាមមន្ទីរពេទ្យរដ្ឋ។ ជាពិសេសការបង្កើតមូលនិធិសម្រាប់ទ្រទ្រង់ដល់អាជីពរបស់ពួកគាត់។
គួរបញ្ជាក់ថា៖សម្តេចតេជោ នាយករដ្ឋមន្ត្រី បានប្រកាសបើកជាផ្លូវការនូវ “សមាគមមូលនិធិត្រីចក្រយាន (មូលនិធិស៊ីក្លូ)។ មូលនិធិនេះ គឺចាប់ផ្តើមពីថវិកាសប្បុរស ៥០០ លានរៀល ដែលបានទទួលពីសប្បុរសជននានា និងពាណិជ្ជករនៅក្នុងប្រទេស។ បងប្អូនអ្នកធាក់ស៊ីក្លូ គឺអាចដាក់ពាក្យសុំចូលជាសមាជិកសមាគបាន ដោយមិនតម្រូវអោយបង់ប្រាក់សមាជិកឡើយ។ សមាជិកទាំងអស់នឹងទទួលបាននូវផលប្រយោជន៍មួយចំនួនដូចជាៈប្រាក់ជួលស៊ីក្លូប្រចាំថ្ងៃ ២០០០រៀល ប្រាក់អាហារ ៥០០០រៀលនិងសេវាថែទាំសុខភាព និងព្យាបាលដោយឥតគិថ្លៃ នៅតាមមន្ទីរពេទ្យរដ្ឋ ដែលផ្តល់ដោយមូលនិធិសមធម៌។ក្រៅពីផលប្រយោជន៍ខាងលើ គឺសមាគមនឹងពិចារណាក្នុងការផ្តល់ការឧបត្តម្ភបន្ថែមជូនបងប្អូនអ្នកធាក់ស៊ីក្លូ ដូចជាក្នុងរដូវបុណ្យទាន (ចូលឆ្នាំ និងភ្ជុំបិណ្ឌ មរណភាពជាដើម)។ សម្តេចតេជោ ហ៊ុន សែន ត្រូវបានជ្រើតាំងជា ប្រធានកិត្តិយសរបស់ “សមាគមមូលនិធិត្រីចក្រយាន (មូលនិធិស៊ីក្លូ)”។ នៅថ្ងៃនេះបងប្អូនសមាជិកអ្នកធាក់ស៊ីក្លូទាំង៣០៨នាក់ នឹងទទួលបានប្រាក់ឧបត្ថម្ភ ៥៧ម៉ឺនរៀល (៥០០០០រៀល ជាអំណោយ ពីសម្តេចតេជោ និងសម្តេចកិត្តិព្រឹទ្ធបណ្ឌិត និង ៧០០០០រៀល ប្រាក់ពីមូលនិធិ) ព្រមទាំង ភួយ អាវរងា កន្សែង ក្រមា អាវភ្លៀង និងមុង។ មូលនិធិទាំងនេះ គឺដាក់នៅក្នុងកាត Wing ដែលបងប្អូនងាយស្រួលអាចបើកនៅ Wing នៅគ្រប់ទីកន្លែង។ នេះគឺជាយកចិត្តទុកដាក់ដ៏ខ្ពង់ខ្ពស់របស់សម្តេចទាំងទ្វេ ដើម្បីអោយជីវិត និងជីវភាពរស់នៅរបស់លោកតា អុំ ពូ និងបងប្អូនអ្នកធាក់ស៊ីក្លូទូទាំងប្រទេសកាន់តែប្រសើរឡើង។ សូមបងប្អូនអ្នកធាក់ស៊ីក្លូ គោរពច្បាប់ចរាចរណ៍ កុំប្រើប្រាស់គ្រឿងស្រវឹងដើម្បីចៀសវាងគ្រោះថ្នាក់ផ្សេងៗ។ សូមក្រុមហ៊ុនទេសចរណ៍ជួយទាក់ទាញទេសចរបរទេសណ៍ឱ្យចូលរួមប្រើប្រាស់ស៊ីក្លូ។ យើងចូលរួមជិះស៊ីក្លូដើម្បីជួយលើកស្ទួយជីវភាពបងប្អូនស៊ីក្លូ។ ស៊ីក្លូ គឺកាត់បន្ថយការបំពុលបរិស្ថានក្នុងទីក្រុង៕ ដោយ៖កូឡាប
