ចំនួនអ្នកស្លាប់សរុបដោយសារវីរុសកូរ៉ូណា (COVID-19) នៅក្នុងប្រទេសចិនបានកើនឡើងដល់ ១.១១៣នាក់នៅថ្ងៃពុធនេះ។ ក្នុងរយៈពេលត្រឹម ២៤ម៉ោង មានអ្នកស្លាប់ថ្មីដោយសារវីរុសដ៏កាចសាហាវនោះមានចំនួន ៩៧នាក់។ នេះបើតាមការបញ្ជាក់របស់គណៈកម្មាការសុខភាពជាតិរបស់ចិន។
ក្នុងចំណោមអ្នកស្លាប់ថ្មីជិត ១០០នាក់ មាន ៩៤នាក់ស្លាប់នៅខេត្ត ហូបេ ដែលជាកន្លែងផ្ទុះនៃវីរុសនោះ។
ទូទាំងប្រទេសចិន មានការឆ្លងថ្មីចំនួន ២.០១៥ករណី ហើយរហូតមកដល់ពេលនេះ តួលេខអ្នកឆ្លងសរុបមានចំនួន ៤៤.៦៥៣ករណី។
តួលេខនេះ បានកើនឡើងយ៉ាលឿន ហើយវាបានលើសតួលេខអ្នកស្លាប់ដោយសារជំងឺសារ ដែលមានផ្តាច់ជីវិតមនុស្សត្រឹម ៦៥០នាក់ ក្នុងឆ្នាំ ២០០២ និង ២០០៣។
វីរុសប្រភេទថ្មីនេះ ត្រូវបានគេជឿជាក់ថា បានផ្ទុះឡើងកាលពីចុងឆ្នាំមុន នៅផ្សារមួយកន្លែងដែលលក់សត្វព្រៃ ក្នុងទីក្រុងវូហាន។
សូមបញ្ជាក់ថា កាលពីប៉ុន្មានថ្ងៃកន្លងទៅនេះ អង្គការសុខភាពពិភពលោក បានបញ្ជូនអ្នកជំនាញពេទ្យទៅកាន់ប្រទេសចិន ដើម្បីធ្វើការស៊ើបអង្កេតលើការផ្ទុះវីរុសកូរ៉ូណា៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia