ប្រទេសជប៉ុនគ្រោងសាកល្បងប្រើប្រាស់ថ្នាំប្រឆាំងវីរុស HIV ដើម្បីព្យាបាលអ្នកជំងឺផ្ទុកវីរុស COVID-19 ខណៈដែលការតួលេខអ្នកឆ្លងច្រើន កំពុងគំរាមកំហែងយ៉ាងខ្លាំងទៅដល់សេដ្ឋកិច្ច និងសុខភាពសាធារណៈក្នុងប្រទេសជប៉ុន។
លោក Yoshihide Suga អ្នកនាំពាក្យជាន់ខ្ពស់របស់រដ្ឋាភិបាល បានថ្លែងនៅថ្ងៃអង្គារនេះថា រដ្ឋាភិបាល “កំពុងធ្វើការរៀបចំ ដូច្នេះការសាកល្បងប្រើប្រាស់ថ្នាំប្រឆាំង HIV លើអ្នកជំងឺកូរ៉ូណា នឹងចាប់ផ្តើមក្នុងពេលឆាប់ៗ”។
ទោះយ៉ាងណា លោកមិនបានធ្វើអត្ថាធិប្បាយទេថា វានឹងត្រូវការរយៈពេលយូរប៉ុណ្ណោះដើម្បីអនុម័តថ្នាំថ្មីនោះ។
សូមបញ្ជាក់ថា ចំនួនអ្នកឆ្លងវីរុសមរណៈកូរ៉ូណា ឬ COVID-19 នៅក្នុងប្រទេសជប៉ុនបានកើនឡើងដល់ ៥២០នាក់ចាប់តាំងពីថ្ងៃចន្ទម្សិលមិញមក ដែលមាន ៤៥៤ករណី ជាអ្នកដំណើរលើនាវាទេសចរណ៍ Diamond Princess ដែលត្រូវបានជប៉ុនដាក់ឲ្យនៅដាច់ដោយឡែក។
រហូតមកដល់ពេលនេះ មានមនុស្សម្នាក់ស្លាប់ដោយសារវីរុសកូរ៉ូណា នៅក្នុងប្រទេសជប៉ុន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia