ខេត្តព្រះសីហនុ៖ អាជ្ញាធរខេត្តព្រះសីហនុ សម្រេចបិទមន្ទីរពេទ្យរបស់ជនជាតិចិន ដែលមានឈ្មោះ ថៃ ខាង ក្រោយរកឃើញថាមន្ទីរពេទ្យនេះគ្មានលិខិតអនុញ្ញាតពីក្រសួងសុខាភិបាល និងបានបំភ្លៃព័ត៌មានពាក់ព័ន្ធវីរុសកូរ៉ូណា (COVID-19) ដែលនាំឲ្យមានភាពចលាចលដល់សង្គម នេះបើតាមការបញ្ជាក់របស់លោកគួច ចំរើន អភិបាលខេត្តព្រះសីហនុ ប្រាប់បណ្តាញផ្សព្វផ្សាយនៅព្រឹកថ្ងៃទី១៩ ខែកុម្ភៈ ឆ្នាំ២០២០។
ការចុះបិទមន្ទីរពេទ្យរបស់ជនជាតិចិននេះ ធ្វើឡើងកាលពី រសៀលថ្ងៃទី១៨ ខែកុម្ភៈ ឆ្នាំ២០២០ មានទីតាំងស្ថិតនៅភូមិ៣ សង្កាត់លេខ៤ ក្រុងព្រះសីហនុ ។
លោកអភិបាលខេត្តមានប្រសាសន៍ថា កាលពីថ្ងៃទី៩ ខែកុម្ភៈ ឆ្នាំ២០២០ មានជនជាតិចិនម្នាក់ឈ្មោះ Su YongYun បានទៅពិនិត្យព្យាបាល នៅមន្ទីរពេទ្យខាងលើនេះ ដោយមិនមានអាការក្តៅខ្លួននោះទេ ប៉ុន្តែខាងមន្ទីរពេទ្យជនជាតិចិនមួយនេះ ដាក់ការសង្ស័យថាមានវីរុសកូរ៉ូណា។ បន្ទាប់ពីកើតមានដំណឹងនេះ លោកភិបាលខេត្តបានអន្តរាគមន៍ភ្លាមៗ ដោយសម្រេចយកសំណាករបស់ជនជាតិចិន ដែលសង្ស័យនោះ ទៅពិនិត្យនៅវិទ្យាស្ថានប៉ាស្ទ័រ តែលទ្ធផលជនជាតិចិនរូបនោះ មិនមានវីរុសកូរ៉ូណានោះទេ។
នៅប៉ុន្មានថ្ងៃក្រោយមក ជនជាតិចិនដដែលរូបនោះ បានទៅពិនិត្យនៅមន្ទីរពេទ្យ ថៃ ខាង ជាថ្មីម្តងទៀត ហើយមន្ទីរពេទ្យនេះ នៅតែបំភ័យអ្នកជំងឺថា មានជំងឺកូរ៉ូណា។ ដោយមិនអស់ចិត្តឈ្មោះ Su YongYun បានមកពិនិត្យនៅមន្ទីរពេទ្យឯកជនមួយ នៅភ្នំពេញ ហើយមន្ទីរពេទ្យនោះក៏បញ្ជូនសំណាក របស់ឈ្មោះ Su YongYun ទៅពិនិត្យជាថ្មីម្តងទៀត នៅវិទ្យាស្ថានប៉ាស្ទ័រ តែលទ្ធផលបញ្ជាក់ថា គ្មានវីរុសកូរ៉ូណាទេ។ ដោយសារតែការបំភ្លៃព័ត៌មាននេះ បានធ្វើឲ្យមានការចលាចលតៗគ្នា ហើយជាមន្ទីរពេទ្យ បើកដំណើរការគ្មានលិខិតអនុញ្ញាតពី ក្រសួងសុខាភិបាលផងនោះ ទើបអាជ្ញាធរសម្រេចបិទមន្ទីរពេទ្យនេះ៕ ដោយ៖បញ្ញាស័ក្
