ប្រទេសកូរ៉េខាងត្បូងបានរកឃើញអ្នកផ្ទុកវីរុសកូរ៉ូណា បន្ថែមទៀតចំនួន ១៦១នាក់នៅថ្ងៃចន្ទនេះ បណ្តាលឲ្យអ្នកឆ្លងសរុបទូទាំងប្រទេសកើនដល់ចំនួន ៧៦៣នាក់ ដែលធ្វើឲ្យវាក្លាយទៅជាប្រទេសទី ២ដែលមានអ្នកឆ្លងវីរុសមរណៈនោះច្រើនបំផុត បន្ទាប់ពីប្រទេសចិន។
មនុស្ស ២នាក់បន្ថែមទៀតក៏បានស្លាប់ដោយសារវីរុសផងដែរ ហើយវាធ្វើឲ្យចំនួនអ្នកស្លាប់ទូទាំងប្រទេសកើនដល់ ៧នាក់។
ក្នុងចំណោមអ្នកឆ្លងថ្មី មាន ១១៥ករណីទាក់ទងទៅនឹងការឆ្លងនៅព្រះវិហារ ស្ថិតក្នុងទីក្រុង Daegu ក្រោយពេលស្រ្តីវ័យ ៦១ឆ្នាំម្នាក់ ដែលត្រូវគេស្គាល់ថាជាអ្នកជំងឺ ៣១ ដែលបានចូលព្រះវិហារ ត្រូវបានគេធ្វើតេស្តរកឃើញមានផ្ទុកវីរុស។ នេះបើតាមការបញ្ជាក់របស់មជ្ឈមណ្ឌលការពារ និងគ្រប់គ្រងជំងឺរបស់កូរ៉េខាងត្បូង។
អាជ្ញាធរកូរ៉េខាត្បូង កំពុងតែបន្តធ្វើការស៊ើបអង្កេត ដើម្បីស្វែងរកមូលហេតុពិតប្រាកដ នៃការផ្ទុះវីរុសដ៏លឿននោះ ដោយអ្នកជំងឺទី ៣១ មិនមានប្រវត្តិធ្វើដំណើរទៅក្រៅប្រទេសសោះ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia