ប្រទេសថៃបានរកឃើញការឆ្លងវីរុសកូរ៉ូណា ឬ COVID-19 ចំនួន ៣ករណីថ្មីទៀតនៅថ្ងៃពុធនេះ ធ្វើឲ្យតួលេខនៃអ្នកឆ្លងវីរុសកើនដល់ ៤០នាក់។ នេះជាការបញ្ជាក់របស់ក្រសួងសុខាភិបាលថៃ។
អ្នកឆ្លងថ្មីចំនួន ២នាក់ជាជនជាតិថៃ ដែលបានត្រឡប់ពីការដើមកម្សាន្តនៅកោះ Hokkaido របស់ជប៉ុន ហើយពួកគេទាំងពីរនាក់បានចម្លងវាទៅកាន់អ្នកទី ២។
សូមបញ្ជាក់ថា ថៃគឺជាប្រទេសដំបូងគេបង្អស់ដែលមានអ្នកឆ្លងវីរុសមរណៈខាងលើ ក្រៅពីប្រទេសចិន នៅថ្ងៃទី ១៣ ខែមករា។
នៅចុងខែមករា ប្រទេសនេះបានក្លាយជាប្រទេសទី ២ ដែលមានអ្នកឆ្លងច្រើនបំផុត បន្ទាប់ពីចិន ប៉ុន្តែករណីឆ្លងថ្មីបានចុះជាបន្តបន្ទាប់។
គ្មានអ្នកជំងឺអ្នកម្នាក់បានស្លាប់ឡើយនៅក្នុងប្រទេសថៃ។ កាលពីថ្ងៃចន្ទ អាជ្ញាធរថៃបានចាត់ទុកវីរុសកូរ៉ូណា ជាជំងឺឆ្លងដែលគ្រោះថ្នាក់ និងបានអនុញ្ញាតឲ្យបុគ្គលិកពេទ្យ និងប៉ូលិសធ្វើការដាក់ពលរដ្ឋទាំងឡាយណា ដែលមានរោគសញ្ញា ឬអ្នកដែលទើបត្រឡប់មកពីតំបន់ប្រឈម នៅដាច់ដោយឡែកបាន។
រហូតមកដល់ពេលនេះ អ្នកជំងឺ ២២នាក់បានជាសះស្បើយ និងត្រូវបានអនុញ្ញាតឲ្យចេញពីមន្ទីរពេទ្យ ខណៈ ១៥នាក់ទៀតកំពុងត្រូវព្យាបាល៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia