ប្រធានាធិបតីអាមេរិច ដូណាល់ ត្រាំ នៅថ្ងៃពុធម្សិលមិញ បានថ្លែងថា ប្រជាជនអាមេរិចមានការប្រឈមទាបបំផុត ជាមួយនឹងវីរុសកូរ៉ូណា ដោយសារតែរដ្ឋាភិបាលបានចាត់វិធានការរឹតបន្តឹង លើការធ្វើដំណើររបស់ប្រជាជនចិន។
លោកថ្លែងថា “ដោយសារតែអ្វីដែលយើងបានធ្វើ ប្រជាជនអាមេរិចមានការប្រឈមទាប” ហើយលោកបន្ថែមថា ការសម្រេចចិត្តរបស់លោកមានការចំអកកាលពីដំបូង។
រដ្ឋាបាលរបស់លោក ក៏បានស្នើសុំថវិកាចំនួន ២,៥ពាន់លានដុល្លារផងដែរ ដើម្បីផ្តល់ដល់ការអភិវឌ្ឍន៍ការព្យាបាល បង្កើតវ៉ាក់សាំង និងឧបករណ៍ផ្សេងៗដើម្បីប្រឆាំងនឹងវីរុសកូរ៉ូណា។
“ពួកយើងបានត្រៀមខ្លួនរួចរាល់ ដើម្បីសម្របខ្លួន និងធ្វើអ្វីគ្រប់យ៉ាងដែលពួកយើងត្រូវធ្វើ ខណៈដែលជំងឺកំពុងរាតត្បាត”។ នេះជាការបញ្ជាក់របស់លោកប្រាប់ដល់សន្និសីទសារព័ត៌មាន។
“ពួកយើងបានស្នើសុំថវិកា ២,៥ពាន់លានដុល្លារ ហើយពួកយើងគិតថា វាគឺច្រើនណាស់ ប៉ុន្តែបក្សប្រជាធិបតេយ្យ និងរូបខ្ញុំគិតថា សមាជិកព្រឹទ្ធសភា Schumer ចង់ឲ្យពួកយើងបានថវិកាច្រើនជាងនេះទៀត”។
“ពួកយើងនឹងចំណាយលើអ្វីដែលសមរម្យ និងធ្វើអ្វីគ្រប់យ៉ាងដែលពួកគេចង់ធ្វើ”។
លោកត្រាំ ក៏បានប្រកាសតែងតាំងអនុប្រធានាធិបតី Mike Pence ជាទីប្រឹក្សា ដើម្បីដឹកនាំអាមេរិចឆ្លើយតបទៅនឹងវីរុសកូរ៉ូណា៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia