ប្រទេសកូរ៉េខាងត្បូង បានរកឃើញអ្នកផ្ទុកវីរុសកូរ៉ូណាថ្មីតិចជាង ៥០នាក់នៅថ្ងៃចន្ទនេះ ដែលវាគឺជាការរកឃើញតិចជាង ៥០ករណីលើដំបូង ចាប់តាំងពីមានការឆ្លងច្រើនបំផុតកាលពីថ្ងៃទី ២៩ ខែកុម្ភៈ។
មជ្ឈមណ្ឌលបង្ការ និងគ្រប់គ្រងជំងឺនៃប្រទេសនេះ បានប្រកាសថា មានអ្នកឆ្លងថ្មីត្រឹមតែ ៤៧នាក់ប៉ុណ្ណោះ ហើយរហូតមកដល់ពេលនេះ ចំនួនអ្នកឆ្លងសរុបក្នុងប្រទេសបានកើនឡើងដល់ ១០.២៨៤នាក់ ខណៈដែលអ្នកស្លាប់មាន ១៨៦នាក់។
កូរ៉េខាងត្បូង ត្រូវបានគេមើលឃើញថា ជាប្រទេសដែលអាចទប់ស្កាត់ ការរាតត្បាលនៃវីរុសមរណៈនេះ បានប្រសើរជាងបណ្តាប្រទេសមួយចំនួន ដោយអត្រានៃការឆ្លង ក្នុងប្រទេសនេះមានសភាពយឺត។
ទោះយ៉ាងណា ការឆ្លងតិចតួច ដែលកើតឡើងនៅតាមព្រះវិហារ មន្ទីរពេទ្យ និងកន្លែងថែទាំងមនុស្សចាស់ នៅតែបន្តកើតមាន។
សូមបញ្ជាក់ថា កាលពីថ្ងៃសោរ៍ ប្រទេសនេះ បានប្រកាសថានឹងពន្យារពេលយុទ្ធនាការហាមការប្រមូលផ្តុំ រយៈពេល ២សប្តាហ៍ទៀត ដើម្បីទប់ស្កាត់ការឆ្លងថ្មីនៃវីរុសកូរ៉ូណាឲ្យមកនៅប្រហែល ៥០ករណីក្នុងមួយថ្ងៃ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia