ឧត្តរមានជ័យ៖ នៅច្រកព្រំដែនអន្តរជាតិអូរស្មាច់ និងច្រកព្រំដែនអន្តរជាតិជាំ មានប្រជាពលរដ្ឋខ្មែរចេញមកពីប្រទេសថៃចំនួន ១.៨៥៩នាក់ កាលពីថ្ងៃទី៨ខែមេសា។ ក្នុងចំណោមពលករ១.៨៥៩ នាក់នេះ មានមនុស្សម្នាក់ មានកំដៅក្ដៅ ត្រូវបានយកសំណាក ទៅពិនិត្យរកជំងឺកូវីដ១៩ និងបានបញ្ជូនទៅសម្រាក់នៅមន្ទីរបង្អែកពេទ្យខេត្ត។
ពាក់ព័ន្ធនឹងករណីនេះ អាជ្ញាធរឧត្តរមានជ័យ ជួបពិភាក្សាការងារជាមួយអភិបាលខេត្តសុរិន្ទ ឯកឧត្តម កៃសន កងឆ្លាត ដើម្បីរិះរកវិធីដោះស្រាយបញ្ហាប្រឈមមួយ ចំនួនសម្រាប់ខេត្តទាំងពីរ ក្នុងពេលជួបវិបត្តិដោយសារជំងឺកូវីដ១៩ នៅច្រកព្រំដែនអន្តរជាតិ កម្ពុជា-ថៃ។
ឯកឧត្តម ប៉ែន កុសល្យ អភិបាល នៃគណៈអភិបាលខេត្តឧត្ដរមានជ័យ បានជួបពិភាក្សាការងារជាមួយអភិបាលខេត្តសុរិន្ទ ឯកឧត្តម កៃសន កងឆ្លាត ដើម្បីរិះរកវិធីដោះស្រាយបញ្ហាប្រឈមមួយ ចំនួនសម្រាប់ខេត្តទាំងពីរ ក្នុងពេលជួបវិបត្តិដោយសារជំងឺកូវីដ១៩ ក្នុងនោះដែរ ក៏មានការអមដំណើរដោយ ឯកឧត្ដម អភិបាលរងខេត្ត មន្ទីរ-អង្គភាព មួយចំនួនទៀត បានចូលរួមផងដែរ។ នៅក្នុងជំនួបនេះ ឯកឧត្តមបានលើកសំណើមួយចំនួន ទៅកាន់ភាគីថៃ ដើម្បីរួមគ្នាទប់ស្កាត់ការរីករាលដាលជំងឺកូវីដ១៩។
ឯកឧត្ដម ក៏បានស្នើភាគីថៃ បន្តជួយរក្សាសុខសុវត្ថិភាព និងសុខុមាលភាពជូនពលរដ្ឋ ខ្មែរ ដែលកំពុងស្នាក់នៅក្នុងប្រទេសថៃ។ ពិសេសអ្នកដែលអាចស្នាក់នៅហួសទិដ្ឋាការកំណត់ ក្នុងអំឡុងពេលនៃវិបត្តិជាសកលដ៏អាក្រក់នេះ។
ឯកឧត្តម អភិបាលខេត្ត ក៏បានស្នើថៃជួយថែរក្សា និងការពាររាល់ទ្រព្យសម្បត្តិ និងកម្មសិទ្ធិឯកជនស្របច្បាប់របស់ប្រជាពលរដ្ឋ អាជីវករ ពាណិជ្ជករ និងពលករខ្មែរដែលកំពុងស្ថិត នៅក្នុងប្រទេសថៃ។
ឯកឧត្តម ក៏បានស្នើថៃ បន្តទាក់ទងគ្នាជាប់ជាប្រចាំ និងសហប្រតិបត្តិការល្អ ពិសេសជូនព័ត៌មានគ្នា ទៅវិញទៅមក ពេលមានការវិវឌ្ឍប្រែប្រួលនានាឲ្យបានទាន់ ពេលវេលា។
ឯកឧត្តម ប៉ែន កុសល្យ បានលើកឡើងផងដែរថា ក្នុងអំឡុងពេលស្ថានភាពដ៏លំបាក នៃការប្រយុទ្ធប្រឆាំងវីរុសកូវីដ១៩នេះ អាចនឹងមានប្រជាពលរដ្ឋ និងពលករខ្មែរមួយចំនួន ក្តាប់មិនបានពីគោលការណ៍ និងវិធានការសន្តិសុខ របស់រាជរដ្ឋាភិបាលថៃ។
ឯកឧត្តម បានស្នើថា ប្រសិនបើកើតមានករណីនេះ សូមអាជ្ញាធរថៃមានការយោគយល់ និងអធ្យាស្រ័យ ក្នុងន័យមនុស្សធម៌ខ្ពស់។
សូមបញ្ជាក់ថា នៅរសៀលថ្ងៃពុធ ទី៨ ខែមេសា ឆ្នាំ២០២នេះ តាមរយៈច្រកព្រំដែនអន្តរជាតិអូរស្មាច់ និងច្រកព្រំដែនអន្តរជាតិជាំ មានប្រជាពលរដ្ឋខ្មែរចេញមកពីប្រទេសថៃចំនួន ១.៨៥៩នាក់។ ក្នុងចំណោមពលករ១.៨៥៩ នាក់នេះ មានមនុស្សម្នាក់មានកំដៅក្ដៅ ត្រូវបានយកសំណាកទៅពិនិត្យរកជំងឺកូវីដ១៩ និងបានបញ្ជូនទៅសម្រាក់នៅមន្ទីរបង្អែកពេទ្យខេត្ត។ ឯកឧត្ដម នៅតែបន្តឲ្យក្រុមការងារឈរជើង នៅតាមច្រកព្រំដែន ដើម្បីពិនិត្យសុខភាពរបស់ប្រជាពលរដ្ឋ និងបានណែនាំឱ្យពួកគេ ដាក់ខ្លួននៅដាច់ដោយឡែករយៈពេល១៤ថ្ងៃ ការពារកុំឱ្យមានការចម្លងមេរោគ ទៅក្រុមគ្រួសារ និងអ្នកនៅក្នុងភូមិជាមួយគ្នា៕ ដោយ ៖ បញ្ញាស័ក្តិ
