ចំនួនអ្នកស្លាប់ដោយសារវីរុសកូរ៉ូណា នៅសហរដ្ឋអាមេរិចកាលពីថ្ងៃពុធ បានកើនលើស ១៤.៦០០នាក់ បណ្តាលឲ្យប្រទេសនេះ ហក់មកឈរនៅតំណែងលេខ ២ ជាប្រទេសមានអ្នកស្លាប់ច្រើនបំផុត បន្ទាប់ពីប្រទេសអ៊ីតាលី។
រហូតមកដល់ពេលនេះ វីរុសមរណៈ បានឆក់យកជីវិតមនុស្ស នៅអាមេរិចយ៉ាងតិច ១៤.៦៩៥នាក់។ ក្រៅពីនេះផងដែរ អាមេរិចជាប្រទេសទី ១ ដែលមានអ្នកឆ្លងវីរុស COVID-19 ច្រើនបំផុតក្នុងលោក ជាមួយនឹងតួលេខ ៤៣១.៨៣៨ករណី។ នេះបើតាមតួលេខរបស់សកលវិទ្យាល័យ Johns Hopkins។
ទីក្រុងញូវញ៉ក ជាកន្លែងរងការវាយប្រហារពីវីរុសមរណៈនោះ ខ្លាំងជាងគេ ដោយមានអ្នកឆ្លងជិត ១៥០.០០០នាក់ ហើយកាលពីថ្ងៃអង្គារ មានអ្នកស្លាប់រហូតដល់ជិត ៨០០នាក់។
កាលពីថ្ងៃអង្គារផងដែរ អាមេរិចក៏បានបង្កើតកំណត់ថ្មីមួយ ដោយមានអ្នកស្លាប់ដោយសារវីរុសជិត ២.០០០នាក់ក្នុងរយៈពេលត្រឹម ២៤ម៉ោង។
សូមបញ្ជាក់ថា វីរុសកូរ៉ូណាមានការឆ្លងរាតត្បាត យ៉ាងលឿន នៅសហរដ្ឋអាមេរិច ក្នុងរយៈពេល ១ខែចុងក្រោយនេះ។ វីរុសនេះបានផ្ទុះឡើងដំបូងនៅខែធ្នូ ក្នុងប្រទេសចិន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia