ភ្នំពេញ៖ អំទ្បុងពេលវីរុសកូវីដ ១៩ កំពុងកើតមាននៅកម្ពុជា ក៏ដូចជាបណ្តាប្រទេសផ្សេងៗជាច្រើននោះ មន្ត្រីក្រសួងឧស្សាកម្ម វិទ្យាសាស្ត្រ បច្ចេកវិទ្យា និង នវានុវត្តន៍ បានឲ្យដឹងថា សហគ្រាសធុនតូច និងមធ្យម (SMEs) បែបអាហារ និងសម្ភារមូលដ្ឋាននៅកម្ពុជា បានបង្កើនការផលិតទៅវិញ។
លោក ហ៊ត ផេង អគ្គនាយកសហគ្រាសធុនតូច និងមធ្យម និងសិប្បកម្ម នៃក្រសួងឧស្សាកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍ថា ចំពោះសហគ្រាសធុនតូច និងមធ្យម បែបអាហារ និងសម្ភារមូលដ្ឋាននៅកម្ពុជា មិនមានផលប៉ះពាល់ទៅលើខ្សែ ផលិតកម្មនោះទេ តែផ្ទុយទៅវិញ បានបង្កើននូវចំនួនផលិតច្រើនដងនៃខ្សែផលិតកម្ម។
ផលិតផលបែបអាហារមូលដ្ឋាន និងសម្ភារមូលដ្ឋាន មានដូចជា មី ទឹកបរិសុទ្ធ ត្រីងៀត សាប៊ូ និងទឹកលាងដៃជាដើម កំពុងត្រូវបានបង្កើនការផលិត ដើម្បីឲ្យទាន់ទៅនឹងតម្រូវការ។ ចំពោះអាហារបន្ទាប់បន្សំ ដែលមានដូចជាអាហារ និងសម្ភារមិនមូលដ្ឋាន ដូចជា នំ និងសំលៀកបំពាក់ ទទួលរងផលប៉ះពាល់មិនធ្ងន់ធ្ងរនោះទេ។ តែទោះជាយ៉ាងណា សហគ្រាសនីមួយៗ ត្រូវបង្កើននូវគុណភាពនៃការផលិត ដើម្បីឲ្យផលិតផលខ្លួន មានស្តង់ដារ និងកាត់បន្ថយការនាំចូលពីក្រៅប្រទេសនៅពេលខាងមុខ៕ដោយ៖សម្ផស្ស
