សហរដ្ឋអាមេរិចគឺជាប្រទេសរងគ្រោះជាងគេពីការផ្ទុះវីរុសកូរ៉ូណា ហើយនៅត្រឹមរយៈពេល ២៤ម៉ោងចុងក្រោយ មហាអំណាចសេដ្ឋកិច្ចមួយនេះមានអ្នកស្លាប់បន្ថែមចំនួន ១.៤៣៣នាក់ បណ្តាលឲ្យអ្នកស្លាប់សរុបក្នុងប្រទេសកើនឡើងដល់ ៤២.០៩៤នាក់។ នេះបើតាមទិន្នន័យរបស់សកលវិទ្យាល័យ Johns Hopkins នៅថ្ងៃចន្ទ។
ចំណែកអ្នកឆ្លងវីរុសកូរ៉ូណានៅអាមេរិចមានច្រើនជាង ៧៨៤.០០០នាក់។
ទីក្រុងញូវញ៉កគឺជាចំណុចកណ្តាលនៃការផ្ទុះវីរុសកូរ៉ូណា ទោះបីវាមើលទៅហាក់ដូចជា អាចតស៊ូបាននឹងវិបត្តិដ៏អាក្រក់ក៏ដោយ។
អភិបាលក្រុងញូវញ៉ក លោក Andrew Cuomo បានប្រកាសនៅថ្ងៃចន្ទថា មានមនុស្សចំនួន ៤៧៨នាក់ស្លាប់ក្នុងរយៈពេល ២៤ម៉ោងចុងក្រោយ ដែលវាគឺជាតួលេខទាបបំផុត ក្នុងរយៈពេល ២សប្តាហ៍ចុងក្រោយនេះ។
ប្រធានាធិបតី ដូណាល់ ត្រាំ បាននិយាយថា គាត់កំពុងធ្វើកិច្ចការជាមួយនឹងអភិបាលរដ្ឋទាំងអស់ ដើម្បីធានាថា ពួកគេមានធនធានដែលត្រូវការដើម្បីបង្កើការធ្វើតេស្តរកវីរុសកូរ៉ូណា ហើយលោក Andrew Cuomo នឹងធ្វើដំណើរមកកាន់សេតវិមាន ដើម្បីពិភាក្សាគ្នាពីវិធានការឆ្លើយតបចំពោះបញ្ហាវីរុស។
សូមបញ្ជាក់ថា វីរុសកូរ៉ូណា បានផ្ទុះឡើងដំបូងចេញពីប្រទេសចិន ចុងឆ្នាំ ២០១៩ នៅទីក្រុងវូហាន។ រហូតមកដល់ពេលនេះ វីរុសមរណៈនេះបានផ្តាច់ជីវិតមនុស្សជាង ១៧០.០០០នាក់ និងឆ្លងទៅកាន់មនុស្សជិត ២.៥០០.០០០នាក់ទូទាំងពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
