ខេត្តព្រះសីហនុ ៖ កម្លាំងជំនាញនៃស្នងការដ្ឋាននគរបាលខេត្តព្រះសីហនុ បានបំបែកសំណុំរឿង ករណីឃាតកម្មប្លន់សម្លាប់ដោយចាប់ខ្លួនជនសង្ស័យម្នាក់។ បន្ទាប់ពីចាប់ខ្លួន ជនសង្ស័យបានសារភាពថា ពិតជាបាន វាយសម្លាប់ ជនរងគ្រោះប្លន់យកម៉ូតូ ដោយទូរស័ព្ទហៅជនរងគ្រោះឲ្យមកជក់ថ្នាំញៀនជាមួយ ពេលជក់រួច បម្រុងត្រឡប់ទៅផ្ទះវិញ ហើយបានយកដុំថ្មវាយទៅលើជនរងគ្រោះបណ្តាលឲ្យស្លាប់ និងបានយកម៉ូតូទៅលក់ប៉ុន្តែគ្មានអ្នកទិញព្រោះគ្មានកាតគ្រី។
សូមបញ្ជាក់ថា កាលពីថ្ងៃទី ២៩ ខែ មេសា ឆ្នាំ២០២០ វេលាម៉ោង ១៣ និង ០០នាទី ស្ថិតនៅព្រៃជើងភ្នំថ្មដា ភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ មានករណីប្រទះឃើញសាកសពមួយកើតឡើង ក្រោយពីទទួលពត៍មាន កម្លាំងអធិការដ្ឋាននគរបាលស្រុកព្រៃនប់សហការជាមួយកម្លាំងជំនាញនៃស្នងការដ្ឋាននគរបាលខេត្តព្រះសីហនុ អាវុធស្រុក ប៉ុស្តិ៍នគរបាលពាក់ព័ន្ធ បានចុះទៅពិនិត្យសាកសពនិងកន្លែងកើតហេតុឃើញថាស្ថានភាពសព ដេកផ្ងា ស្នាមរបួសក្បាលផ្នែកខាងក្រោយ និងផ្នែកខាងមុខ ស្លៀកខោគគីរពណ៌ស អត់មានពាក់អាវទេ ។
តាមការបំភ្លឺរបស់ម្តាយសពឈ្មោះ ចាន់ ដា អាយុ ៤៣ឆ្នាំ មុខរបរកម្មកររោងចក្រ មានទីលំនៅភូមិត្រពាំងមូល ឃុំជើងគោ ស្រុកព្រៃនប់ ខេត្តព្រះសីហនុ បានឲ្យដឹងថា កូនរបស់គាត់ឈ្មោះ ផាត ភារៈ ភេទប្រុស អាយុ ១៩ឆ្នាំ នៅវេលាម៉ោង ២១ ថ្ងៃទី ២៧ ខែ មេសា ឆ្នាំ២០២០ បានសុំគាត់ចេញពីផ្ទះជិះម៉ូតូម៉ាកហុងឌ្រីម ផលិតឆ្នាំ២០១៩ ពាក់ស្លាកលេខព្រះសីហនុ 1H 9772 ពណ៍ខ្មៅ ទៅទិសខាងត្បូងមួយភ្លែត មុនពេលសុំគាត់ចាកចេញពីផ្ទះនោះ គឺមានគេតេទូរស័ព្ទហៅកូនគាត់ កូនរបស់គាត់ប្រើទូរស័ព្ទលេខ 070 702 815។
សម្ភារបាត់បង់មាន ៖ ម៉ូតូម៉ាកហុងដាឌ្រីម ពណ៌ខ្មៅ ផលិតឆ្នាំ២០១៩ ពាក់ផ្លាកលេខ1H 9772 ចំនួន ០១គ្រឿង។
តាមការសន្និដ្ឋានជំហានដំបូងករណីខាងលើ គឺជាករណីឃាតកម្ម(ប្លន់សម្លាប់) ។ ហើយសាកសពខាងលើកម្លាំងជំនាញ បន្ទាប់ពីធ្វើកោសល្យវិច័យរួចបានប្រគល់ទៅក្រុមគ្រួសារយកទៅធ្វើបុណ្យតាមប្រពៃណី ។
ករណីនេះកម្លាំងអធិការដ្ឋាននគរបាល ស្រុកព្រៃនប់បានធ្វើការស្រាវជ្រាវយ៉ាងយកចិត្តទុកដាក់ រហូតមកថ្ងៃទី៣០ មេសា ២០២០ វេលាម៉ោង១៤និង១៥នាទី ទើបយើងកំណត់មុខសញ្ញាបានឈានទៅដល់ការឃាត់ខ្លួនជនសង្ស័យឈ្មោះ ចាន់ លីឈាង ភេទប្រុស អាយុ១៨ឆ្នាំមុខរបរកម្មករជ្រៀកឈើ មានទីលំនៅភូមិជើងគោ ឃុំជើងគោ ស្រុកព្រៃនប់ ខេត្តព្រះសីហនុ និងដកហូតម៉ូតូ០១គ្រឿងម៉ាក ហុងដាឌ្រីម ស៊េរី០១៩ពណ៍ខ្មៅ ពាក់ផ្លាកលេខ ព្រះសីហនុ១H.៩៩៧២ ជារបស់ជនរងគ្រោះ ។
តាមការឆ្លើយសារភាពរបស់ជនសង្ស័យ បានរៀបរាប់ថា ខ្លួនពិតជាបានធ្វើសកម្មភាព វាយសម្លាប់ប្លន់យកម៉ូតូរបស់ជនរងគ្រោះប្រាកដមែន ដោយទូរស័ព្ទហៅជនរងគ្រោះឲ្យមកជក់ថ្នាំញៀនជាមួយ ពេលជក់រួចបម្រុងត្រឡប់ទៅផ្ទះវិញខ្លួនបានយកដុំថ្មវាយទៅលើជនរងគ្រោះចំនួន០៣ដុំថ្មបណ្តាលអោយជនរងគ្រោះដួលទៅថ្ម ហើយខ្លួនក៏ជិះម៉ូតូជនរងគ្រោះសំដៅទៅក្រុងព្រះសីហនុ ដើម្បីលក់ប៉ុន្តែគ្មានអ្នកហ៊ានទិញ ព្រោះគ្មានប័ណ្ណសម្គាល់(កាតគ្រី) ទើបជិះម៉ូតូត្រឡប់មកផ្ទះវិញ ។ លុះដល់វេលាម៉ោងខាងលើទើបត្រូវនគរបាលឃាត់ខ្លួនតែម្តង។
បច្ចុប្បន្នយើងឃាត់ខ្លួនជនសង្ស័យ ដើម្បីកសាងសំណុំរឿងតាមនិតិវិធី ៕
ដោយ៖កូឡាប
