ភ្នំពេញ៖ គ្រឹះស្ថានមីក្រូហិរញ្ញវត្ថុប្រាសាក់ កាលពីម្សិលមិញ បានចុះបញ្ជីលក់សញ្ញាប័ណ្ណសាជីវកម្ម ក្នុងផ្សារមូលបត្រកម្ពុជាជាផ្លូវការ ដែលជាគ្រឹះស្ថាន មានដើមទុនធំបំផុត នៅក្នុងទីផ្សារមូលបត្រកម្ពុជា។
ប្រាសាក់ បានទទួលការអនុញ្ញាត និងចុះបញ្ជីជាស្ថាពរ ពីគណៈកម្មការមូលបត្រកម្ពុជា (គ.ម.ក.) លើឯកសារផ្តល់ព័ត៌មាន សម្រាប់ការបោះផ្សាយ លក់សញ្ញាប័ណ្ណសាជីវកម្មប្រាសាក់ ជាសាធារណៈនៅថ្ងៃទី២ ខែមេសា ឆ្នាំ២០២០។
សញ្ញាប័ណ្ណសាជីវកម្មប្រាសាក់ ដែលដាក់លក់នៅពេលនេះ គឺជាសញ្ញាប័ណ្ណសាជីវកម្ម ដែលបោះផ្សាយដោយគ្រឺះស្ថានហិរញ្ញវត្ថុ ដែលមានការធានាទាំងស្រុង ពីស្ថាប័នអន្តរជាតិ Credit Guarantee and Investment Facility (CGIF) ដែលជាមូលនិធិបរធនមួយ នៃធនាគារអភិវឌ្ឍអាស៊ី (ADB) ។
បន្ទាប់ពីការធ្វើបរិវិសកម្ម សញ្ញាប័ណ្ណសាជីវកម្មប្រាសាក់ ចាប់ពីថ្ងៃទី៦ ខែមេសា រហូតដល់ត្រឹមថ្ងៃទី២២ ខែមេសា ឆ្នាំ២០២០ កន្លងមកនេះ ប្រាសាក់ទទួលបានការគាំទ្រពីវិនិយោគិនចំនួន៣ រួមមាន ធនាគារ HongLeong របស់ម៉ាឡេស៊ី, ក្រុមហ៊ុនធានារ៉ាប់រង Prudential, ធនាគារ Shinhan ក្នុងទឹកប្រាក់សរុបចំនួន ១២៧,២ ប៊ីលានរៀល ដែលអនុញ្ញាតឱ្យប្រាសាក់ ពង្រីកសក្តានុពលរបស់ខ្លួនបន្ថែមទៀត ក្នុងការផ្តល់ឥណទានជាប្រាក់រៀល ជូនដល់ប្រជាជនកម្ពុជា។ នេះបើយោងតាមលោក លោក ស៊ីម សេនាជាតិ ប្រធាននាយកប្រតិបត្តិនៃគ្រឹះស្ថានមីក្រូហិរញ្ញវត្ថុ ប្រាសាក់ ម.ក។
លោក សេនាជាតិបានឲ្យដឹងថា ការបោះផ្សាយសញ្ញាប័ណ្ណសាជីវកម្មប្រាសាក់ នៅផ្សារមូលបត្រកម្ពុជា មិនត្រឹមតែអនុញ្ញាតឱ្យប្រាសាក់ ទទួលបាននូវប្រភពទុនមានរយៈពេលវែង និងមានប្រភពទុនថ្មីមួយទៀតប៉ុណ្ណោះទេ ប៉ុន្តែថែមទាំង ផ្តល់ជូនគុណវុឌ្ឍិ យ៉ាងពេញលេញដល់ប្រាសាក់ ក្នុងនាមជាគ្រឹះស្ថាន ដែលមានស្ថិរភាពហិរញ្ញវត្ថុដ៏រឹងមាំ មានតម្លាភាពហិរញ្ញវត្ថុ និងអនុវត្តបានពេញលេញតាមបទប្បញ្ញត្តិនានា។
លោកថា៖«យើងខ្ញុំជឿជាក់ថា ការបោះផ្សាយមូលបត្របំណុលនេះ ក៏នឹងចូលរួមចំណែកគាំទ្រ ដល់គោលនយោបាយ របស់រាជរដ្ឋាភិបាល ក្នុងការលើកកម្ពស់ការប្រើប្រាស់ប្រាក់រៀល ការអភិវឌ្ឍផ្សារមូលបត្រនៅកម្ពុជា និងពង្រីកបរិយាប័ន្នហិរញ្ញវត្ថុ ឱ្យកាន់តែទូលំទូលាយ នៅកម្ពុជាបន្ថែមទៀត។
លោកហុង សុខហួរ អគ្គនាយកក្រុមហ៊ុនផ្សារមូលបត្រកម្ពុជា មានប្រសាសន៍ថា វត្តមានរបស់ PRASAC នៅក្នុង ផ្សារមូលបត្រកម្ពុជា គឺជាព្រឹត្តិការណ៍សំខាន់មួយទៀត សម្រាប់ទីផ្សារមូលបត្រកម្ពុជា។ PRASAC គឺជាក្រុមហ៊ុនចុះបញ្ជីក្រុមហ៊ុនទី ៦ ហើយជាក្រុមហ៊ុនទី ៣ ដែលបានចុះបញ្ជី នៅក្នុងផ្សារមូលបត្រកម្ពុជា។
លោកសុខហួរ បានមានប្រសាសន៍ថា៖ «ប្រាសាក់បានប្រមូលមូលធនពីទីផ្សារ រហូតដល់ ១២៧,២ ពាន់លានរៀលឬ ៣១,៨ លានដុល្លារ ហើយបានក្លាយជាក្រុមហ៊ុនទី ១១ ដែលបានចុះបញ្ជីនៅក្នុងទីផ្សារមូលធន របស់ប្រទេសកម្ពុជា ហើយជាភាគហ៊ុនទី ៦ នៃសម្ព័ន្ធក្រុមហ៊ុន” ។
គិតត្រឹមពេលនេះ ផ្សារមូលបត្រកម្ពុជា មានក្រុមហ៊ុនចំនួន ១១ ក្រុមហ៊ុនភាគហ៊ុនចំនួន ៥ ក្រុមហ៊ុន
សម្ព័ន្ធសាជីវកម្មចំនួន ៦ ។ មូលធន សរុបដែលប្រមូល បានពីផ្សារមូលបត្រកម្ពុជា មានចំនួន ២២៣ លានដុល្លារ៕ដោយ៖សម្ផស្ស