ភ្នំពេញ៖ ក្រុមហ៊ុន China Good Cars Holding Ltd បានបង្ហាញពីគម្រោងវិនិយោគចំណតយានយន្តធុនធំដ៏ទំនើប នៅរាជធានីភ្នំពេញ ក្នុងទំហំទឹកប្រាក់វិនិយោគប្រមាណ ១៦០លានដុល្លារអាមេរិក ដើម្បីចូលរួមចំណែកកាត់បន្ថយការកកស្ទះចរាចរណ៍។
ក្នុងជំហានដំបូង ក្រុមហ៊ុនស្នើសុំវិនិយោគសាងសង់ស្ថានីយ ចំណតយានយន្តធុនធំ ទំនើប នៅជាយរាជធានីភ្នំពេញ ដើម្បីរំដោះចរាចរណ៍ដ៏មមាញឹក ពីចំណុចកណ្តាលរាជធានី ព្រមទាំងវិនិយោគលើគម្រោង ដឹកជញ្ជូនសាធារណៈតាមរថយន្តក្រុង លើបណ្តាញផ្លូវជាតិ ដើម្បីតភ្ជាប់ទៅតំបន់ក្រៅក្រុង និងទៅបណ្តាខេត្តនានានៅជិតៗរាជធានីភ្នំពេញ។
ក្រុមហ៊ុននេះ នឹងសហការជាមួយអគ្គនាយកដ្ឋានដឹកជញ្ជូនផ្លូវគោក សិក្សាលើលក្ខណៈបច្ចេកទេសឱ្យបានល្អិតល្អន់ និងសុំឱ្យក្រុមហ៊ុនដាក់ពាក្យស្នើសុំវិនិយោគ ទៅច្រកចេញចូលតែមួយ នៃក្រុមប្រឹក្សាអភិវឌ្ឍន៍កម្ពុជា ដើម្បីអាចទទួលបានភាពអនុគ្រោះនានា ស្របទៅតាមច្បាប់វិនិយោគនៃព្រះរាជាណាចក្រកម្ពុជា។
យោងតាមរបាយការណ៍ក្រសួងសាធារណការ និងដឹកជញ្ជូន បង្ហាញថា បច្ចុប្បន្ន កម្ពុជាមានយានយន្តចំនួន ៥លាន ៣សែន ៣ម៉ឺនគ្រឿង ក្នុងនោះ ម៉ូតូ ៤លាន ៥សែន ៥ម៉ឺនគ្រឿង និងរថយន្តគ្រប់ប្រភេទ ៧៨ម៉ឺនគ្រឿង បានធ្វើឲ្យសកម្មភាព ចរាចរណ៍នៅទូទាំងប្រទេស កាន់តែមានភាពមមាញឹក និងចង្អៀត៕សម្ផស្ស
