ភ្នំពេញ៖ សហព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានស្នើសុំធនាគារធុនតូច និងមធ្យម និងស្ថាប័នហិរញ្ញវត្ថុ ដែលចូលរួមក្នុងគម្រោង សហហិរញ្ញប្បទាន នៃធនាគារធុនតូចនិងមធ្យម ក្នុងការពន្យារពេលសងត្រឡប់នូវកម្ចីពី ៤ ទៅ ៦ ឆ្នាំហើយពិចារណា ឲ្យយកវត្ថុបញ្ចាំជាផែនការអាជីវកម្ម សម្រាប់ប្រាក់កម្ចីតិចជាង ១០ ម៉ឺនដុល្លារ។
លោក តែ តាំង ប៉ ប្រធាន FASMEC បានថ្លែងនៅក្នុងសន្និសីទកាសែត កាលពីព្រឹកថ្ងៃទី៧ឧសភាថា បច្ចុប្បន្នមានស្ថាប័នហិរញ្ញវត្ថុចំនួន ៣៣ ដែលចូលរួមជាមួយធនាគារធុនតូចនិងមធ្យម ដើម្បីចូលរួមក្នុងគម្រោងសហហិរញ្ញប្បទាន របស់ធនាគារខ្នាតតូចនិងមធ្យម។
លោកបន្តថា ស្ថាប័នហិរញ្ញវត្ថុចំនួន ៣៣ បានប្រមូលថវិកាចំនួន ៩៧,៥ លានដុល្លារក្នុងគម្រោងនេះ ហើយរួមទាំងថវិកាចំនួន ៥០ លានដុល្លារពីរដ្ឋាភិបាលដើមទុន នៃហិរញ្ញប្បទានសហហិរញ្ញប្បទាន របស់ធនាគារធុនតូចនិងមធ្យម បានឈានដល់ ១៥០ លានដុល្លារ។
លោក តាំងប៉ ៖«យើងបានស្នើសុំឱ្យធនាគារធុនតូច និងមធ្យមនៅកម្ពុជា ពង្រីកការទូទាត់សងត្រឡប់ដល់ ៦ ឆ្នាំ ហើយយើងក៏បានស្នើសុំឱ្យធនាគារធុនតូចនិងមធ្យម នៅកម្ពុជា កាត់បន្ថយនីតិវិធីលើប្រាក់កម្ចីនេះ ហើយបានអំពាវនាវឱ្យស្ថាប័នហិរញ្ញវត្ថុចំនួន ៣៣ ផ្តោតលើផែនការអាជីវកម្ម សម្រាប់សហគ្រាសធុនតូចនិងមធ្យម»។
លោក តាំងប៉ បានបន្ថែមថា ៖« ធនាគារធុនតូចនិងមធ្យមរបស់កម្ពុជា គឺផ្តោតលើការផលិត ឬ កម្មន្តសាល យើងបានស្នើទៅធនាគារពាណិជ្ជ និងមីក្រូហិរញ្ញវត្ថុថា វត្ថុបញ្ចាំមិនគួរតឹងរ៉ឹងចំពោះសហគ្រាសធុនតូច និងមធ្យមទេ។ នៅពេលមានភាពតឹងរ៉ឺងសហគ្រាសធុនតូចនិងមធ្យម មិនអាចខ្ចីបានទេ ដូច្នេះវានឹងធ្វើ ឲ្យ មូលនិធិនេះជាប់គាំង” ។
លោថា ៖«យើងកំពុងជំរុញការងារនេះ យើងកំពុងជួយសម្រួលដល់ សហគ្រាសធុនតូចនិងមធ្យម និងធនាគារពាណិជ្ជកម្មហើយ យើងស្នើសុំពួកគេថា ប្រសិនបើប្រាក់កម្ចីមានចាប់ពី ៥ ម៉ឺនដុល្លារទៅ ១០០.០០០ ដុល្លារ ពួកគេអាចប្រើផែនការអាជីវកម្ម។ ពួកគេ (SME) ខ្ចីប្រាក់ដើម្បីអភិវឌ្ឍអាជីវកម្ម ហើយពួកគេកំពុងប្រយ័ត្នប្រយែង ក្នុងការប្រើប្រាស់ប្រាក់កម្ចីនេះ» ។
លោកបានមានប្រសាសន៍ថា ៖« មិនមានអតិថិជនណា បានដាក់ពាក្យសុំប្រាក់កម្ចីនេះទេ ព្រោះវាថ្មីប៉ុន្តែយើងកំពុងប្រកាស ទៅសហគ្រាសធុនតូចនិងមធ្យម នៅទូទាំងប្រទេស ដើម្បីរៀបចំនិងដាក់ពាក្យស្នើសុំប្រាក់កម្ចី»។
លោក តាំងប៉ បានបន្ថែមថា៖« យើងមិនមានការព្រួយបារម្ភ អំពីការលំបាកក្នុងការសងប្រាក់ កម្ចីមកវិញ» ។
គម្រោងសហហិរញ្ញប្បទាន ខ្នាតតូចនិងមធ្យម របស់រដ្ឋាភិបាល មានគោលបំណងផ្តល់ប្រាក់កម្ចី ដែលមានការប្រាក់ទាប ដើម្បីជំរុញនិងអភិវឌ្ឍន៍សហគ្រាសធុនតូចនិងមធ្យម ក្នុងស្រុកក្នុងវិស័យជាច្រើន ដូចជាការផលិត និងសិប្បកម្ម ដើម្បីជំរុញផលិតកម្មក្នុងស្រុក និងបំពេញការប្រើប្រាស់ក្នុងស្រុក។
ជាមួយនឹងគ្រោងការណ៍ ដែលផ្តល់ពាក់កណ្តាល នៃចំនួនប្រាក់កម្ចី ដែលបានយល់ព្រមជាមួយ ស្ថាប័នហិរញ្ញវត្ថុនីមួយៗ ដែលផ្តល់ឱ្យពាក់កណ្តាលទៀត។
សហគ្រាសធុនតូចនិងមធ្យមអាចខ្ចីរហូតដល់ ២០ ម៉ឺនដុល្លារសម្រាប់ដើមទុនបង្វិល និងរហូតដល់ ៣០ ម៉ឺនដុល្លារ សម្រាប់ដើមទុនវិនិយោគ។ ជាមួយនឹងអត្រាការប្រាក់អតិបរិមា ៧ ភាគរយក្នុងមួយឆ្នាំ រយៈពេលសងត្រឡប់លើសពី ៤ ឆ្នាំ និងការពិចារណា អាស្រ័យលើលក្ខណៈវិនិច្ឆ័យ របស់គ្រឹះស្ថានមីក្រូហិរញ្ញវត្ថុនីមួយៗ៕ដោយ៖សម្ផស្ស
