កំពត៖ កំពង់ផែទេសចរណ៍អន្តរជាតិខេត្តកំពត នឹងបញ្ចប់ការសាងសង់នៅពាក់កណ្តាលឆ្នាំ២០២០ ដែលបច្ចុប្បន្នកំពង់ផែនេះ ត្រូវបានបានសាងសង់បានជាង៣០ភាគរយហើយ។ បើមិនមានការផ្ទុះទ្បើងនៃវីរុសកូវីដ១៩នោះទេ កំពង់ផែទេសចរណ៍អន្តរជាតិខេត្តកំពត នឹងត្រូវបញ្ចប់ការសាងសង់នៅពាក់កណ្តាលឆ្នាំនេះ ដែលអាចស្រូបយកអ្នកដំណើរឆ្លងកាត់កំពង់នេះ បានប្រមាណជា៤ពាន់នាក់ក្នុងមួយថ្ងៃ។
លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឲ្យដឹងថា កំពង់ផែទេសចរណ៍អន្តរជាតិខេត្តកំពត នឹងត្រូវចំណាយទុនវិនិយោគ ក្នុងរង្វង់៨លានដុល្លារ ដែលមានសក្តានុពលទាក់ទាញអ្នកដំណើរតាមទឹក អាចឆ្លងកាត់ នឹងធ្វើសំចត ដែលមានលក្ខណៈខុសពីកំពង់ផែបីទៀត ដែលសំរាប់តែអោយទំនិញដឹកឆ្លងកាត់នោះ។
ប្រធានមន្ទីរទេសចរណ៍ខេត្តកំពត បានបន្តថា តាមការសិក្សាកន្លងមក និងតាមគម្រោងកំពង់ផផែទេសចរណ៍អន្តរជាតិនេះ មានសក្តានុពល ទៅលើលំហូរដឹកភ្ញៀវទេសចរ មិនមានទំនិញឆ្លងកាត់ទេ គឺសម្រាប់អ្នកដំណើរតាមដងទឹកប៉ុណ្ណោះ។
កំពង់ផែនេះ បានបើកដំណើរការសាងសង់ កាលពីខែសីហាឆ្នាំ២០១៨ នៅលើផ្ទៃដីទំហំ៤ហិកតាក្នុងខេត្តកំពត ហើយវាជាផ្នែកមួយ នៃគម្រោងគាំទ្រដោយហិរញ្ញប្បទានសម្បទាន ពីធនាគារអភិវឌ្ឍន៍អាស៊ី សម្រាប់វិនិយោគលើហេដ្ឋារចនាសម្ព័ន្ធទេសចរណ៍។ លោក សយ ស៊ីណុល បានបន្ថែមថា «ដូចយើងដឹងហើយថា វិស័យទេសចរណ៍ ជាវិស័យមួយ ដែលមានប្រយោជន៍ធំធេង ក្នុងការរួមចំណែកក្នុងសេដ្ឋកិច្ចជាតិ និងសេដ្ឋកិច្ចសង្គម។ ខេត្តកំពតជាខេត្តមួយ ដែលមានវ័យចំណាស់ជាងគេ ក្នុងចំណោមខេត្តទាំង៤ នៅតំបន់ឆ្នេរនៅប្រទេសកម្ពុជា ដែលខេត្តនេះ សម្បូរនូវធនធានធម្មជាតិជាច្រើន មានធនធានបម្រើឲ្យវិស័យកសិកម្ម ឧស្សាហកម្មថាមពលរ៉ែជាដើម។»
គួរបញ្ជាក់ថា ខេត្តកំពត ជាខេត្តមួយដែលបានទាក់ទាញភ្ញៀវទេសចរជាតិ និងអន្តរជាតិធ្វើដំណើរទៅកម្សាន្តលេងទីនោះច្រើនជាងគេ។ ក្នុងឆ្នាំ២០១៩កន្លងទៅ ខេត្តនេះ ទទួលបានភ្ញៀវទេសចរទាំងអស់ ចំនួនជាង ១លាន ៦សែននាក់ ដែល១០ភាគរយជាភ្ញៀវអន្តរជាតិ។ ភ្ញៀវទាំងនោះ បានទៅទស្សនានៅរមណីយដ្ឋានចំនួន ១៧ សហគមន៍ទេសចរណ៍ចំនួន៤ និងគោលដៅទាក់ទាញ ដូចជាចម្ការម្រេច ស្រែអំបិល និងសំណង់ ដែលបានបន្សល់ទុកពីអាណានិគមបារាំងជាដើម៕ដោយ៖សម្ផស្ស
