ខណៈដែលសេដ្ឋកិច្ចទេសចរណ៍របស់ប្រទេសថៃ ត្រូវបានបិទស្ទើរតែទាំងស្រុង ពីការរឹតត្បិតក្នុងការធ្វើដំណើរ ដោយសារតែការរាតត្បាតនៃជំងឺកូរ៉ូណា ឬ Covid-19 នោះបុគ្គលិកជាច្រើននៅក្នុងឧស្សាហកម្មនេះត្រូវបានបង្ខំចិត្តត្រូវរិះរកមធ្យោបាយការងារថ្មី ដើម្បីដោះស្រាយជីវិតភាពប្រចាំថ្ងៃរបស់ពួកគេ។
ជាក់ស្តែង ដូចគណនីករអាកាសចរណ៍ម្នាក់នេះ ដែលមានឈ្មោះ Kosit Rattanasopon អាយុ ៣៧ ឆ្នាំ បានប្តូរពីឯកសណ្ឋានរបស់គាត់ មកក្លាយជាអ្នកដឹកជញ្ជូនម្ហូបអាហារសម្រាប់អតិថិជននៅជុំវិញទីក្រុងបាងកក ចាប់តាំងពីតាំងពីក្រុមហ៊ុនអាកាសចរណ៍ថៃដែលគាត់ធ្វើការឲ្យ ពុំត្រូវបានអនុញ្ញាតឲ្យមានសកម្មភាពសម្រាប់ជើងហោះហើរទាំងអស់។
ជាមួយមុខរបរថ្មីទើបចាប់ផ្តើមបណ្តោះអាសន្ននេះ Kosit បានប្រាប់ឲ្យដឹងថា គាត់អាចរកប្រាក់ចំណូលបានប្រហែល ១.០០០ បាត (ស្មើនឹង ៣១,១៣ ដុល្លារ) ក្នុង១ថ្ងៃ ដែលអាចគ្រប់គ្រាន់ផ្គត់ផ្គង់ចិញ្ចឹមឪពុក និងប្អូនស្រីរបស់គាត់ ដែលជាអ្នកចម្អិនម្ហូបប្រអប់ សម្រាប់លក់តាមអនឡាញ។
គាត់ក៏បានបង្ហើបឲ្យដឹងថា៖ “ខ្ញុំដឹងថាអ្វីៗនៅពេលនេះពិតជាពិបាកមិនដូចមុនទេ ដែលយ៉ាងហោចណាស់មួយឆ្នាំទៀត ដូច្នេះខ្ញុំនឹងត្រូវបន្តធ្វើកិច្ចការងារនេះ” ៕
ប្រែសម្រួល៖ លឹម ហុង (ប្រភព៖ channelnewsasia)