បាត់ដំបងៈ លោកឧត្តមសេនីយ៍ទោ អ៊ុច សុខុន ស្នងការនគរបាលខេត្តបាត់ដំបង បានប្រាប់ទៅដល់មន្ត្រីនគរបាលចរាចរណ៍ ត្រូវអនុវត្តច្បាប់ចរាចរណ៍ផ្លូវគោកថ្មី ឲ្យបានត្រឹមត្រូវ មានតម្លាភាព មានប្រសិទ្ធភាព មិនមានការលើកលែង មិនមានការយោគយល់ឡើយ ហើយកុំទោមនស្សនឹងការរិះគន់ផ្សេងៗ។
ការលើកឡើងបែបនេះ ក្នុងពិធីប្រកាសតួនាទីភារកិច្ច និងបំពាក់ឋានន្តរស័ក្តិដល់មន្ត្រីនគរបាលខេត្តបាត់ដំបង សរុបចំនួន១៤៤នាក់ (ស្រី២២នាក់) កាលពីថ្ងៃទី១៣ ខែឧសភា ឆ្នាំ២០២០។
លោកឧត្តមសេនីយ៍ទោ អ៊ុច សុខុន បានមានប្រសាសន៍ថា តាំងពីច្បាប់ថ្មី បានដាក់ឲ្យអនុវត្ត គឺមានការគាំទ្រ និងអនុវត្តបានត្រឹមត្រូវច្រើន ពីប្រជាពលរដ្ឋនៅទូទាំងប្រទេស និងគ្រោះថ្នាក់ចរាចរណ៍ ក៏មានការថយចុះ បើគិតត្រឹមរយៈពេលដូចគ្នានៅឆ្នាំកន្លង។ ទន្ទឹមនឹងការគាំទ្រនិងការអនុវត្តន៍បានត្រឹមត្រូវនេះ ក៏មាននូវមតិរិះគន់មួយចំនួន បានកើតឡើងជាហូរហែរ ដែលបញ្ហានេះ មិនថាខេត្តបាត់ដំបង ឬសឹងគ្រប់បណ្ដារាជធានីខេត្តទាំងអស់។ ទោះបីយ៉ាងណាសមត្ថកិច្ចចរាចរណ៍ ត្រូវអនុវត្តច្បាប់នេះ ឲ្យមានប្រសិទ្ធភាព មិនមានការលើកលែង មិនមានការយោគយល់ឡើយ ។
លោកឧត្តមសេនីយ៍ទោ អ៊ុច សុខុន ស្នងការនគរបាលខេត្តបាត់ដំបង បានជំរុញឲ្យកងកម្លាំងនគរបាល នៅតាមបន្ទាត់ព្រំដែន ត្រូវបន្តសហការឲ្យបានល្អ ជាមួយសមត្ថកិច្ចពាក់ព័ន្ធ ក្នុងការសម្របសម្រួលពលករខ្មែរឆ្លងដែនមកពីថៃ ក្នុងរយៈកាលនៃការឆ្លងរាលដាលជំងឺកូវីដ១៩ ហើយសម្រាប់មន្ត្រីនគរបាលទើបទទួលតួនាទីថ្មី ត្រូវតែចូលរួមអនុវត្តការងារផ្សេងៗឲ្យបានល្អ តាមការប្ដេជ្ញារបស់ខ្លួន៕ ដោយ ៖ អ៊ុងសារុំ
