ភ្នំពេញ៖ នៅព្រឹកថ្ងៃសុក្រ ទី១៥ ខែឧសភា ឆ្នាំ២០២០ វេលាម៉ោង ៨និង០០ នាទីព្រឹក សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានអញ្ជើញចុះសាកសួរសុខទុក្ខ មន្ត្រី និងអាជ្ញាធរ ភូមិភា សង្កាត់ប្រទះឡាង ខណ្ឌកំបូល រាជធានីភ្នំពេញ។
សម្តេចបានសាកសួរសុខទុក្ខ និងស្តាប់របាយការណ៍ស្តីពីសភាពការណ៍សន្តិសុខសណ្តាប់ធ្នាប់សាធារណៈ ការងារបម្រើសេវាសាធារណៈរបស់មន្ត្រី កងកម្លាំង និងអាជ្ញាធរសង្កាត់។
សម្តេចក៏បានសាកសួររអំពីសភាពការណ៍ និងការអប់រំផ្សព្វផ្សាយអំពីបណ្តាវិធានការទប់ស្កាត់ និងការពារជម្ងឺកូវីដ ១៩ នៅក្នុងមូលដ្ឋានផងដែរ។
ទទ្ទឹមនឹងនេះ សម្តេចប្រធានក្រុមការងារ ក៏បានជំរាបជូនអំពីស្ថានភាពនៃការរីករាតត្បាតរបស់វារុសកូវីដ ១៩ នៅបណ្តាប្រទេសជុំវិញពិភពលោកព្រមទាំងផលប៉ញពាល់លើគ្រប់ផ្នែកគ្រប់វិស័យដែលបង្ករឡើងដោយសារជម្ងឺនេះ។ ជម្ងឺរាតត្បាតដ៏កាចសាហាវ និងងាយចម្លងបំផុតនេះគឺបង្ករមកពីវីរុសកូវីដ ១៩ ដែលជាវីរុសប្រភេទថ្មី ហើយដែលមិនទាន់មានការស្រាវជ្រាវបែបវិទ្យាសាស្ត្រណាមួយបញ្ជាក់ឲ្យច្បាស់លាស់ និងរកឃើញថ្នាំព្យាបាលប្រកបដោយប្រសិទ្ធភាព ឬបង្កើតបាននូវវ៉ាក់សាំង សំរាប់ការពារនៅឡើយ។
ដោយឡែកនៅកម្ពុជាយើង អាស្រ័យដោយរាជរដ្ឋាភិបាល និងក្រសួងជំនាញពាក់ព័ន្ធទាំងអស់ ក្តាប់ជាប់ និងគ្រប់គ្រងសភាពការបានល្អ ហើយបានត្រៀមលក្ខណៈទុកជាមុន និងបានដាក់ចេញនូវបណ្តាវិធានការទប់ស្កាត់ការពារបានល្អ ឆាប់រហ័ស និងទាន់ពេលវេលា ម្យ៉ាងទៀតកងកម្លាំង អាជ្ញាធរគ្រប់ថ្នាក់ប្រជាពលរដ្ឋគ្រប់រូបម្នាក់ៗសុទ្ធតែមានការភ័យខ្លាច មានការយល់ដឹង និងចូលរួមសហការអនុវត្តយ៉ាងសស្រោកសស្រាំ នោះទើបស្ថានភាពនៃជម្ងឺនេះមានភាពធូរស្រាលច្រើន ហើយ ការចម្លង ក៏មិនមានរីករាលដាលដល់ក្នុងសហគមន៍ ហើយក្នុងរយៈពេលជាងមួយខែមកនេះ គឺមិនមានករណីឆ្លងថ្មីៗទៀត ហើយក៏នៅមិនទាន់មានអ្នកស្លាប់ និងការព្យាបាល បានជាសះស្បើយមានចំនួនច្រើន (១២១នាក់/១២២នាក់)គឺនៅសល់តែអ្នក
ជម្ងឺ១នាក់ដែលកំពុងសម្រាកព្យាបាលនៅមន្ទីរពេទ្យ។
តែនេះមិនមែនមានន័យថា មិនអាចកើតមាននូវរលកទី២ នៃការចម្លងកូវីដ ១៩ ជាថ្មីទៀតនោះដែរ ហេតុនេះទើបត្រូវតែបន្តប្រុងប្រយ័ត្ន និងការពារទប់ស្កាត់តទៅទៀត។
ចំពោះមុខយើងត្រូវខិតខំផ្សព្វផ្សាយអប់រំដល់ប្រជាពលរដ្ឋយើងឲ្យប្រុងប្រយ័ត្ន និងអនុវត្តខ្ជាប់ខ្ជួននូវបណ្តាវិធានការនានា ដែលរាជរដ្ឋាភិបាល និងក្រសួងជំនាញបានណែនាំ ជាក់ស្តែងគឺ៖ ការអនុវត្ត អនាម័យខ្លួនប្រាណ និងហាត់ប្រាណ។ ការអនុវត្តគម្លាតសុវត្ថិភាព ហើយស្ថិតនៅក្នុងផ្ទះឲ្យបានច្រើន និងត្រូវពាក់ម៉ាស្សការពារក្នុងករណីចាំបាច់ និងនៅទីកន្លែងដែលមានមនុស្សច្រើនៗ។
ក្នុងករណីមានការសង្ស័យ អំពីអាការមិនស្រួលខ្លួនដែលអាចពាក់ព័ន្ធនឹងជម្ងឺនេះត្រូវប្រញាប់ទៅជួបគ្រូពេទ្យជំនាញ ឬទាក់ទងផ្តល់ព័ត៌មានទៅខ្សែទូរស័ព្ធ១១៥ជាបន្ទាន់។ប្រជាពលរដ្ឋម្នាក់ៗ ត្រូវបង្កើនការប្រុងប្រយ័ត្ន និងចេះការពារខ្លួនដោយខ្លួនឯង គឺដើម្បីការពារខ្លួនយើងផ្ទាល់ ការពារក្រុមគ្រួសារ មនុស្សជាទីស្រឡាញ់របស់ខ្លួន និងការពារសហគមន៍ និងសង្គមជាតិទាំងមូលផងដែរ៕
ដោយ៖កូឡាប
