ថៃ៖ កាសែតភាសាថៃ Khao Sod បានរាយការណ៍កាលពីថ្ងៃទី១៤ ខែឧសភា ឆ្នាំ២០២០ ថា អ្នកលក់ទុរេនម្នាក់នៅទីក្រុងបាងកក ត្រូវបានចាប់ខ្លួន និងចោទប្រកាន់ ពីបទកែគីឡូជញ្ជីងរបស់គាត់ ដើម្បីកេងចំណេញប្រាក់ពីអតិថិជន។
នាយកដ្ឋានពាណិជ្ជកម្មផ្ទៃក្នុង (ITD) បានចាត់វិធានការ បន្ទាប់ពីទទួលបានពាក្យបណ្តឹងជាច្រើនពីអ្នកទិញ។ មន្ត្រីម្នាក់នៅក្នុងសម្លៀកបំពាក់ធម្មតា បានទៅទិញទុរេនពីអ្នកលក់ម្នាក់ ហើយបន្ទាប់មកថ្លឹងវា និងបង្ហាញថាមានទម្ងន់ ២ គីឡូក្រាម។ ទោះយ៉ាងណា បន្ទាប់មកមន្ត្រីរូបនោះ បានយកជញ្ជីងស្តង់ដារផលិតម៉ាស៊ីនថ្លឹងម៉ាកថ្មី ហើយដាក់ទុរេនដដែល ដាក់លើវាដោយបង្ហាញថា មានមានទម្ងន់ ១ គីឡូក្រាម។
ក្រោយមកអាជីវកររូបនេះត្រូវបាននាំខ្លួនទៅកាន់ប៉ុស្តិ៍នគរបាល Chanasongkram ជាកន្លែងដែលគាត់ប្រឈមមុខ នឹងការជាប់ពន្ធនាគារ រយៈពេល ៧ ឆ្នាំ និងពិន័យ ជាប្រាក់មិនលើសពី ២៨០,០០០ បាត៕
ប្រែសម្រួល៖ លឹម ហុង (ប្រភព៖ Khao Sod)
