បាត់ដំបងៈ ម្ចាស់រោងម៉ាស៊ីនកិនស្រូវនៅខេត្តបាត់ដំបង បាននិយាយលើកឡើងថា ទោះបីរាជរដ្ឋាភិបាល បានប្រកាសផ្អាកការនាំអង្ករស ទៅក្រៅប្រទេសមួយរយៈ ដោយសារវិបត្តិជំងឺកូវីដ១៩ មិនធ្វើឲ្យមានផលប៉ះពាល់ ដល់អាជីវកម្មរបស់ពួកគេទេ ព្រោះអាចនាំចេញអង្ករប្រភេទក្រអូបបាន ហើយមានតម្រូវការច្រើនជាងមុន។
លោក រេត រដ្ឋា ប្រធានក្រុមហ៊ុនហ្គោលដិនស្ដារ បានមានប្រសាសន៍ថា ទីផ្សាររបស់ក្រុមហ៊ុនភាគច្រើន នាំចេញទៅប្រទេសចិន និងសហគមន៍អឺរ៉ុប ដែលមាននាំទាំងអង្ករប្រភេទ ស និងប្រភេទក្រអូប ខណៈកំពុងមានការរីករាលដាល នៃជំងឺកូវីដ១៩ នៅទូទាំងពិភពលោក ធ្វើឲ្យតម្រូវការអង្ករ កាន់តែច្រើន និងមានការស្នើសុំទិញច្រើនជាងមុន។ ក្នុងរយៈពេល នៃការប្រកាសផ្អាក របស់រាជរដ្ឋាភិបាល មួយរយៈក្នុងការនាំអង្ករស ចេញទៅក្រៅប្រទេសនោះ គឺមិនមានផលប៉ះពាល់អ្វីនោះទេ ដោយសារនៅអនុញ្ញាត ការនាំចេញអង្ករប្រភេទអូប។ ប៉ុន្មានថ្ងៃនេះ រាជរដ្ឋាភិបាល បានប្រកាសឲ្យនាំចេញវិញនោះ ក្រុមហ៊ុនក៏ចាប់ផ្ដើមទទួលការកុម្ម៉ង់ជាបន្តបន្ទាប់។
លោក ឡាយ សែ ម្ចាស់រោងម៉ាស៊ីនឡាយសែ បានមានប្រសាសន៍ថា ក្នុងមួយឆ្នាំៗក្រុមហ៊ុន បាននាំអង្ករទៅក្រៅប្រទេស ប្រមាណ៥ទៅ៦ម៉ឺនតោន ជាប់ចំណាត់ថ្នាក់លេខ២ នៅក្នុងខេត្តបាត់ដំបង ក្នុងនោះមានទីផ្សារនៅអឺរ៉ុប និងនៅអាស៊ី។ មានលក់តិចតួចនៅក្នុងស្រុក ហើយចាប់តាំងពីមានការឆ្លងរីករាលដាលខ្លាំង នៃជំងឺកូវីដ១៩ ម៉ូយទាំងឡាយ បានចាប់ផ្ដើមប្រមូលទិញអង្ករ ខុសពីរាល់ឆ្នាំ និងរហូតមកដល់ពេលនេះ ក្រុមហ៊ុន មិនអាចទទួលការកុម្ម៉ង់បន្ថែមទេ ព្រោះអង្ករជិតអស់ និងមិនទាន់ដល់រដូវទិញស្រូវផង។
ទោះបីយ៉ាងណាក្រុមអ្នកនាំអង្ករ ទៅក្រៅប្រទេស បានបញ្ជាក់ថា សម្រាប់អង្ករទុកផ្គត់ផ្គង់ ពលរដ្ឋក្នុងប្រទេសនាពេលនេះ មិនមានការខ្វះខាតនោះទេ ព្រោះរាជរដ្ឋាភិបាល បានណែនាំឲ្យតាមរោងម៉ាស៊ីនកិនស្រូវ ត្រៀមទុកផងដែរ៕
ដោយៈ អ៊ុងសារុំ
