Sunday, March 16, 2025

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

កំណើន​តម្រូវការ​ប្រើប្រាស់​របស់​ប្រជាពលរដ្ឋ ធ្វើ​ឲ្យ​ការ​រ​ផ្គត់ផ្គង់​អគ្គិសនី​កើន​ដល់ ៤​ពាន់​មេ​ហ្គា​វ៉ា​ត់ ក្នុង​ឆ្នាំ​២០២០​នេះ​

​ភ្នំពេញ​៖ រដ្ឋមន្ត្រីក្រសួង​រ៉ែ និង​ថាមពល បាន​លើកឡើងថា ដោយសារ​កំណើន​តម្រូវការ​នៃ​ការប្រើប្រាស់​របស់​ប្រជាពលរដ្ឋ ស្របតាម​ការរីកចម្រើន​នៃ​ប្រទេសជាតិ ធ្វើ​ឲ្យ​មាន​កំណើន​ការផ្គត់ផ្គង់​អគ្គិសនី​។ ការផ្គត់ផ្គង់​ថាមពល​អគ្គិសនី​ពី​ប្រភព​ផ្សេងៗ​សរុប កើន​ដល់​ប្រមាណ ៣៩៨៦​មេ​ហ្គា​វ៉ា​ត់ ក្នុង​ឆ្នាំ ២០២០​នេះ ដែលមាន​កំណើន ១៥​ភាគរយ បើ​ធៀប​នឹង​ឆ្នាំ ២០១៩​។

​ឯកឧត្តម ស៊ុយ សែម បាន​អះអាងថា ក្នុង​ឆ្នាំ​២០២០​នេះ ការផលិត​ថាមពល​អគ្គិសនី​ក្នុងស្រុក​ពី​ប្រភព​ថាមពល​ធំៗ ដែល​កំពង់ដំណើរការ មាន​សរុប​ប្រមាណ ២៩៦៥​មេ​ហ្គា​វ៉ា​ត់ ក្នុងនោះ​ពី​វា​រី​អគ្គិសនី​ចំនួន ៧ អានុភាព​សរុប ១៣២៩​មេ​ហ្គា​វ៉ា​ត់ និង​ស្ថានីយ​អគ្គិសនី​ដុត​ធ្យូងថ្ម​ចំនួន ០៣ អានុភាព​សរុប ៦៧៥​មេ​ហ្គា​វ៉ា​ត់​។ ក្រៅពីនេះ ក៏មាន​ថាមពលអគ្គីសនី​ដែល​បានមកពី​រោងចក្រ​ដុត​ប្រេង​ខ្មៅ និង​ម៉ា​ស៊ូ​ត អានុភាព ៦២៧​មេ​ហ្គា​វ៉ា​ត់ ថាមពល​កកើត​ឡើងវិញ ដូចជា​ថាមពល​សូ​ឡា ៣៣៣​មេ​ហ្គា​វ៉ា​ត់ និង​ថាមពល​នាំចូល​ពី​ប្រទេសជិតខាង មាន​ប្រទេស​ថៃ វៀតណាម និង​ឡាវ សរុប​ចំនួន ១០២១​មេ​ហ្គា​វ៉ា​ត់​។​

​ឯកឧត្តម ស៊ុយ សែម បាន​ឲ្យ​ដឹង​ទៀតថា រហូតមកដល់​ពេលនេះ ក្រសួង​បាន​ត​ភ្ជាប់​ខ្សែបណ្តាញ​អគ្គិសនី​បា​ចំនួន​ជាង ១៣០០០​ភូមិ ដែល​ស្មើនឹង ៩២,៦៨​ភាគរយ នៃ​ចំនួន​ភូមិ​សរុប​នៅ​ទូទាំងប្រទេស​។

​ឯកឧត្តម​បញ្ជាក់ថា នៅ​ឆ្នាំ ២០៣០ ក្រសួង​នឹង​ជំរុញ​ការប្រើប្រាស់​ឲ្យ​កើន​ដល់ ៩០​ភាគរយ​នៃ​ចំនួន​ខ្នង​ផ្ទះ​នៅ​ទូទាំងប្រទេស សម្រាប់​អគ្គិសនី​ដែលមាន​គុណភាព ស្ថិរភាព និង​តម្លៃ​សមរម្យ ដល់​អ្នក​ប្រើ​ទាំងអស់ ទាំង​លក្ខណៈ​គ្រួសារ និង​ឧស្សាហកម្ម​។ ជាពិសេស គឺ​ការប្រើប្រាស់​ថាមពល​ស្អាត ឬ​ថាមពល​ក៏​កើតឡើង​វិញ​។​

​យ៉ាងណាក៏ដោយ ឯកឧត្តម​រដ្ឋមន្ត្រី បាន​លើកឡើងថា ទោះបីជា​រាជរដ្ឋាភិបាល បាន​ខិតខំ​ជំរុញ​ឲ្យ​មានការ​វិនិយោគ លើ​គម្រោង​ផលិត​ថាមពល​អគ្គិសនី​ពី​ប្រភព​ផ្សេងៗ ក្នុង​រយៈពេល ប៉ុន្មាន​ឆ្នាំ​ចុងក្រោយ​នេះ ដែលមាន​កំណើន​ជា​បន្តបន្ទាប់​ក៏ដោយ​ក្តី ក៏ប៉ុន្តែ​វា​នៅតែ​ពុំទាន់​អាចឆ្លើយតប​នឹង​សេចក្តីត្រូវការ​បាន​ពេញលេញ​នៅឡើយ ដោយសារ​កំណើន​ប្រើប្រាស់​ពី​ប្រជាពលរដ្ឋ និង​ការរីក​ធំធាត់​យ៉ាង​ឆាប់រហ័ស​នៃ​សេដ្ឋកិច្ច​របស់​កម្ពុជា​៕

ដោយ​៖​សម្ផស្ស​