ដូចដែលលោកអ្នកបានស្គាល់ច្បាស់ហើយ ស្រីអូន ជាម្ចាស់ក្រុមហ៊ុន «សម្រស់ធម្មជាតិ» ដែលតែងតែយកចិត្តទុកដាក់ ចែករំលែកក្តីស្រលាញ់ តាមរយៈការជួយដល់ជនទីទាល់ក្រ អ៊ុំ ពូ មីង ដែលជួបនូវការលំបាកជាក់ស្តែង។
ប៉ុន្តែ ដោយឡែក ថ្មីៗនេះ អ្នកនាងបានជួបរឿងដ៏គួរឲ្យសោកស្តាយមួយផងដែរ ខណៈដែលរថយន្តស៊េរីទំនើបថ្មីសន្លាងរបស់អ្នកនាងដែលមានតម្លៃជាង២០ម៉ឺនដុល្លារ បានជួបគ្រោះថ្នាក់ចរាចរណ៍ ត្រូវម៉ូតូកម្មករសំណង់ម្នាក់ ដែលបើកបរមិនប្រយ័ត្នក្នុងល្បឿនដ៏លឿន មកបុកយ៉ាងពេញទំហឹង បណ្តាលឲ្យរងការខូចខាតកាងផ្នែកខាងឆ្វេងយ៉ាងដំណំ។
បើតាមស្រីអូន កម្មករវ័យក្មេងនោះ បានជិះម៉ូតូបើកវ៉ាឡានដឹកដី១គ្រឿង ក្នុងល្បឿនយ៉ាងលឿន ប៉ុន្តែ វាក់នឹងរថយន្តប្តីរបស់នាង ក៏បុកគ្នាយ៉ាងពេញទំហឹងតែម្តង។ ភ្លាមៗនោះ ប្អូនប្រុសនោះបានដេកនៅនឹងកង់ឡានរបស់អ្នកនាងទៅហើយ ប៉ុន្តែ សំណាង ដែលរថយន្តប្តីអ្នកនាងបើកក្នុងល្បឿនមធ្យម ហើយអាចចាប់ហ្វ្រាំងទាន់ពេលវេលា ពុំនោះសោតមិនដឹងទៅជាយ៉ាងណានោះទេ។
បើទោះជារថយន្តរបស់ខ្លួនរងការខូចខាតយ៉ាងណា តែអ្នកនាងស្រីអូន ពុំបានយកទោសពៃពីប្អូនប្រុសជាកម្មករសំណង់នោះទេ ហើយថែមទាំងត្រេកអរជាខ្លាំងផងដែរ ដែលរូបគេពុំរងគ្រោះថ្នាក់ធ្ងន់ធ្ងរ។ ឆ្លៀតក្នុងឱកាសនោះផងដែរ ស្រីអូនក៏បានណែនាំអប់រំប្អូនប្រុសនោះ និងក៏ដូចអ្នកដទៃ សូមបើកបរឲ្យមានការប្រុងប្រយ័ត្ន ដើម្បីចៀសវាងគ្រោះថ្នាក់ដែលអាចកើតមានដូចករណីដ៏ញាក់សាច់នេះ ដែលអ្នកនាងចាត់ទុកជាសំណាង១ពាន់ក្នុង១ពាន់គ្រោះថ្នាក់ហើយ។
ជាមួយគ្នានេះផងដែរ បងប្អូនអ្នកប្រើប្រាស់បណ្តាញសង្គម បានសម្តែងនូវការកោតសរសើរចំពោះទឹកចិត្តស្រីអូនជាខ្លាំង និងថា នេះចាត់ទុកថាសំណាងហើយ ដែលបុរសរូបនេះប៉ះចំអ្នកចិត្តធម៌ដូចស្រីអូន ប្រសិនបើប៉ះចំអ្នកដទៃវិញ មិនដឹងជាយ៉ាងណានោះទេ៕
ដោយ៖ លឹម ហុង
