ខេត្តកំពង់ធំ៖ លោកឧបនាយករដ្ឋមន្ត្រីយឹម ឆៃលីបញ្ជាក់ថា កម្ពុជាគឺជាប្រទេសផលិតជ័រកៅស៊ូធម្មជាតិបានចំនួនច្រើនម៉ឺនតោនក្នុងមួយឆ្នាំៗ ស្ថិតក្នុងលំដាប់ថ្នាក់ទី១៦ ក្នុងចំណោមបណ្តាប្រទេសផលិតកៅស៊ូធម្មជាតិលើសកលលោក រីឯផ្ទៃដីដាំដុះកៅស៊ូបានកើនឡើងជាលំដាប់ ។
នៅព្រឹកថ្ងៃសុក្រ ទី២៦ ខែមករា ឆ្នាំ២០១៨ រោងចក្រកែច្នៃកៅស៊ូស្ទោង ស៊ីអស៊ីខេ២ របស់ក្រុមហ៊ុនកៅស៊ូ ជីសេ (GC) ត្រូវបានសម្ពោធដាក់ឲ្យដំណើរការជាផ្លូវការ។ លោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារ អភិវឌ្ឍន៏វិស័យកសិកម្ម និងជនបទ បានថ្លែងថា គោលដៅរបស់រាជរដ្ឋាភិបាល គឺត្រូវធ្វើយ៉ាងណាបង្កើនផ្ទៃដីដាំដុះកៅស៊ូឲ្យបានច្រើន ដោយកំណត់បរិមាណផលិតផលចំនួនប្រមាណ ២៩ម៉ឺនតោននៅឆ្នាំ២០២០ ។ ជាមួយគ្នានោះ លោកឧបនាយករដ្ឋមន្ត្រីក៏បានលើកទឹកចិត្តដល់ក្រុមហ៊ុនវិនិយោគទាំងអស់ដែលមកវិនិយោគនៅកម្ពុជាឲ្យមានចំនួនកាន់តែច្រើនឡើង ដែលស្តែងឲ្យឃើញពីទំនុកចិត្តរបស់វិនិយោគិនបរទេសចំពោះស្ថានភាពជាក់ស្តែងនៅកម្ពុជា ដែលកំពុងមានសុខសន្តិភាពពេញលេញ មានស្ថេរភាពនយោបាយ និងមានកំណើនសេដ្ឋកិច្ចខ្ពស់ ជាង២ទស្សវត្សរ៍កន្លងមកនេះ ក្រោមការដឹកនាំប្រកបដោយភាពប៉ិនប្រសព្វរបស់សម្តេចតេជោនាយករដ្ឋមន្ត្រី ។
ក្នុងឱកាសនោះ លោកឧបនាយករដ្ឋមន្ត្រី យឹម ឆៃលី មានប្រសាសន៍ថា ការសម្ពោធរោងចក្រកែច្នៃជ័រកៅស៊ូ របស់ក្រុមហ៊ុន ស៊ីអស៊ីខេ២ នៅថ្ងៃនេះ គឺជាមោទនភាពមួយនៃគោលនយោបាយអភិវឌ្ឍន៍ដំណាំកៅស៊ូកម្ពុជា ។ រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី បានមើលឃើញថា៖ វិស័យកសិកម្មនៅតែជាវិស័យអាទិភាព ដែលស្រូបពលកម្មច្រើនជាងគេ ។ ដូច្នេះការអភិវឌ្ឍវិស័យកសិកម្ម ដែលជាស្នូលនៃសេដ្ឋកិច្ចជនបទ មានអត្ថន័យពីរយ៉ាង គឺការពង្រីកមូលដ្ឋានសេដ្ឋកិច្ច និងការជួយរក្សាចីរភាពនៃកំណើនសេដ្ឋកិច្ចផង និងការពន្លឿនការកាត់បន្ថយភាពក្រីក្រផង ។ រាជរដ្ឋាភិបាលបានជំរុញឲ្យមានភាពជាដៃគូរវាងកសិករម្ចាស់ដីតូចៗ និងកសិដ្ឋានធំៗ សាជីវកម្មកសិកម្ម និងរវាងសម្បទានិកដីសេដ្ឋកិច្ច ជាមួយនឹងសម្បទានិកដីសង្គមកិច្ច ជាពិសេសសម្រាប់ដំណាំកសិ-ឧស្សាហកម្ម ស្របទៅតាមផែនការយុទ្ធសាស្ត្រអភិវឌ្ឍវិស័យកៅស៊ូរបស់រាជរដ្ឋាភិបាល ។
លោក ង្វៀន យីលិញ អគ្គនាយកក្រុមហ៊ុនកៅស៊ូ ជីសេ កំពង់ធំ បានថ្លែងឲ្យដឹងថា ក្រុមហ៊ុនកៅស៊ូ ជីសេ កំពង់ធំ បានចាប់ផ្តើមអនុវត្តគម្រោងក្នុងឆ្នាំ២០០៩ បានដាំដុះកៅស៊ូក្នុងឆ្នាំ២០១០ និងបញ្ចប់ការដាំក្នុងឆ្នាំ២០១៤ លើផ្ទៃដី១២.៦៦៨ ហិចតា ដោយចំណាយទុនវិនិយោគចំនួន១២០លានដុល្លាអាមេរិកគិតមកដល់ឆ្នាំ២០១៧ ។ លោកបន្ថែមថា គិតមកត្រឹមឆ្នាំ២០១៧ ក្រុមហ៊ុនចៀរជ័របាន ៣.៨៧៦ ហិចតា ប្រមូលជ័របាន ២.៣៦៧ តោន ស្មើនឹង ១១០,៦៣% នៃផែនការ ។ ដើម្បីឆ្លើយតបនឹងតម្រូវការជាក់ស្តែង សម្ព័ន្ធសហគ្រាសកៅស៊ូវៀតណាម បានអនុញ្ញាតិឲ្យក្រុមហ៊ុនកៅស៊ូ ជីសេ កំពង់ធំ សាងសង់រោងចក្រកែច្នៃកៅស៊ូដែលមានសមត្ថភាពផលិតរហូតដល់ ៤៥ពាន់តោនក្នុង១ឆ្នាំ សម្រាប់បម្រើដល់ក្រុមហ៊ុនកៅស៊ូចំនួនបីគឺ ក្រុមហ៊ុន ស៊ីអស៊ីខេ២ ក្រុមហ៊ុនបៀនហៀក និងក្រុមហ៊ុនមេគង្គ។
ដោយឡែកលោក ត្រាញ់ ង៉ុកធុង(Tran Ngoc Thuan) អគ្គនាយកសម្ព័ន្ឋសហគ្រាសកៅស៊ូវៀតណាម មានប្រសាសន៍ថា សម្ព័ន្ឋឧស្សាហកម្មកៅស៊ូវៀតណាមកំពុងគ្រប់គ្រង់លើការផលិត ការប្រមូលផល និងកែច្នៃកៅស៊ូលើផ្ទៃដីសរុបទាំងក្នុងប្រទេស និងក្រៅប្រទេសចំនួនជាង៤០ម៉ឺនហិកតា ។ ក្នុងឆ្នាំ២០១៧ ប្រមូលផលកៅស៊ូបានជាង ២៧៨ពាន់តោន កែច្នៃជ័រកៅស៊ូគ្រប់ប្រភេទបានជាង ៣៦៥ពាន់តោន លក់ចេញបាន ៣៤៥ពាន់តោន និងបានចំណូលសរុបជាង ៣០៣លានដុល្លារសហរដ្ឋអាមេរិក។ លោកបន្តថា ចាប់តាំងពីឆ្នាំ២០០៧ សម្ព័ន្ឋឧស្សាហកម្មកៅស៊ូវៀតណាម បានវិនិយោគដំណាំកៅស៊ូនៅកម្ពុជាសរុប ១.០០០លានដុល្លាសហរដ្ឋអាមេរិក ហើយគិតមកដល់បច្ចុប្បន្ន ផ្ទៃដីកៅស៊ូរបស់ក្រុមហ៊ុនទាំងអស់ចំនុះសម្ព័ន្ឋមានជិត ៩០.០០០ហិចតាសិ្ថតក្នុងខេត្តកំពង់ធំ ក្រចេះ មណ្ឌលគីរី រតនគីរី ព្រះវិហារ សៀមរាប និងឧត្តរមានជ័យ ដែលចំណាយទុនវិនិយោគប្រមាណជាង ៦០០លានដុល្លារសហរដ្ឋអាមេរិក ៕ ដោយ៖បញ្ញាស័ក្តិ
