ខេត្តស្ទឹងត្រែង៖ ដោយសារតែខឹងនឹងប្រពន្ធពុំព្រមឲ្យដេកជាមួយ បុរសជាប្តី បែរជាដុតផ្ទះឆេះខ្ទេចអស់គ្មានសល់ កាលពីវេលាម៉ោង២០និង៣០នាទីយប់ ថ្ងៃទី១២ ខែមិថុនា ឆ្នាំ២០២០ ស្ថិតនៅភូមិកែងញ៉ៃ ឃុំសេកុង ស្រុកសៀមប៉ាង ។
តាមប្រភពព័ត៌មានឲ្យដឹងថា ករណីបំផ្លិចបំផ្លាញទ្រព្យសម្បត្តិខ្លួនឯងនេះបង្កឡើងបុរសឈ្មោះ ឡត តាន់ អាយុ ៥៨ ឆ្នាំ ជនជាតិខ្មែរ រស់នៅភូមិឃុំកើតហេតុខាងលើ ។
ប្រភពដដែលបានបន្តថា បុរសខាងលើ ក្នុងស្ថានភាពស្រវឹងស្រាចូលទៅដេកជាមួយប្រពន្ធ តែប្រពន្ធដេញមិនឲ្យដេកក្បែរ បែរជាខឹងយកភ្លើងទៅដុតផ្ទះរបស់ខ្លួនទាំងយប់ផ្អើលអស់អ្នកក្បែរខាង។
នគរបាលប៉ុស្តិ៍រដ្ឋបាលឃុំសេកុង ឲ្យដឹងថា ផ្ទះរងការឆាបឆេះខាងលើ មានទំហំ៥ម៉ែត្រ និងបណ្តោយ៦ម៉ែត្រ ធ្វើអំពីឈើប្រក់ស្បូវបាំងឫស្សី ក្រាលរនាបឫស្សី ឆេះអស់ទាំងស្រុង មូលហេតុ ស្រវឹងស្រា ខឹងប្រពន្ធមិនឲ្យដេកជាមួយ។
នគរបាលប៉ុស្តិ៍ក៏បានឃាត់ខ្លួនបុរសជាម្ចាស់ផ្ទះខាងលើនោះដែរ៕
ដោយ៖សុខុម
