លទ្ធផលអង្កេតរបស់អង្គការអភិវឌ្ឍន៌ឧស្សាហកម្មសហប្រជាជាតិហៅកាត់ថា UNIDO ស្តីពីផលប៉ះពាល់ទៅលើវិស័យឯកជន ដោយ សារមេរោគឆ្លង Covid-19 ដែលបានធ្វើក្នុងរយៈពេលមួយខែ តាមប្រព័ន្ធ Online ទៅលើសហគ្រាស និងក្រុមហ៊ុន រោងចក្រ ចំនួន ២៥០បានបង្ហាញថា មេរោគឆ្លង Covid-19 ធ្វើឲ្យវិស័យសហគ្រាសខ្នាតតូចនិងមធ្យម និងក្រុមហ៊ុនរោងចក្រជាច្រើននៅកម្ពុជា រួមទាំងវិស័យទេសចរណ៌ផងដែរ ត្រូវទទួលរងនូវផលប៉ះពាល់ ក្នុងកំរិតមួយ ដែលរដ្ឋាភិបាល ស្ថាប័នពាក់ព័ន្ធ និងដៃគូអភិវឌ្ឍន៌ ត្រូវរួមគ្នាគិតគូពិចារណា ស្វែងរកដំណោះស្រាយ និងដាក់ចេញនូវយុទ្ធសាស្ត្រសមស្រប ដើម្បីស្តារឡើងវិញនូវស្ថានភាពអន្តរកាលនេះ។
ថ្លែងកាលពីនៅរសៀលថ្ងៃទី១៥ ខែមិថុនា ឆ្នាំ២០២០ នៅទីស្តីការក្រសួង មានរៀបចំកិច្ចប្រជុំស្តាប់របាយការណ៌លទ្ធផលអង្កេតរបស់អង្គការអភិវឌ្ឍន៌ឧស្សាហកម្មសហប្រជាជាតិហៅកាត់ថា UNIDO ស្តីពីផលប៉ះពាល់ទៅលើវិស័យឯកជន ដោយសារមេរោគឆ្លងCovid-19ឯកឧត្តម សុខ ណារិន ប្រធានតំណាងអង្គការ UNIDO ប្រចាំកម្ពុជា បានធ្វើបទបង្ហាញនិងបញ្ជាក់ថាលទ្ធផលអង្កេតនេះ គឺបានធ្វើក្នុងរយៈពេលមួយខែ តាមប្រព័ន្ធ Online ទៅលើសហគ្រាស និងក្រុមហ៊ុន រោងចក្រ ចំនួន ២៥០ រួមមានដូចជា៖ផ្នែករោងចក្រកាត់ដេរ-ផ្នែកកម្មន្តសាលធុនស្រាល-ផលិតចំណីអាហារ-ភេសជ្ជៈ-ទេសចរណ៌-ថាមពល និងផ្នែកកែច្នៃជាដើម តាមរយៈការដាក់កម្រងសំណួរ ។ ប៉ុន្តែក្នុងចំណោមនោះ មានតែ ១៤៤ សហគ្រាស និងក្រុមហ៊ុន រោងចក្រ ប៉ុណ្ណោះ ដែលបានឆ្លើយនិងសំណួរ ដែលបានដាក់ជូន គឺ ស្មើនឹង៥៧% ។
តាមរយៈលទ្ធផលអង្កេតឃើញថា៖ផលប៉ះពាល់រួមមានដូចជា៖ការជួបប្រទះនូវវិបត្តិហិរញ្ញវត្ថុ-បាត់បង់លំហូរសាច់ប្រាក់-ពិបាកលក់ផលិតផល-ជួបបញ្ហាចំណាយថេរ ដូចជា៖ការជួលអគាររឺ ទីតាំងផ្សេងៗ -កាត់បន្ថយការបញ្ជាទិញ-ពិបាករកផលចំណេញដើម្បីទូទាត់ប្រាក់ខែដល់បុគ្គលិក កម្មករ-បង្ខំចិត្តកាត់បន្ថយ បុគ្គលិក កម្មករ-និងការអនុវត្តបង់ជូននូវរបបសន្តិសុខសង្គមជាដើម ។
ទោះជាយ៉ាងណា ឯកឧត្តម សុខ ណារិន ក៏បានបញ្ជាក់ផងដែរថា៖ការអន្តរាគមន៌របស់រាជរដ្ឋាភិបាលតាមមធ្យោបាយផ្សេងៗ បានជួយកាត់បន្ថយភាពតានតឹងមួយចំនួន ហើយសង្ឃឹមថា នឹងមានស្ថានភាពប្រសើរឡើងវិញតាមវិស័យ នៅពេលមានការបន្ធូរបន្ថយការរិតត្បិតចំពោះប្រភេទអាជីវកម្មមួយចំនួនផង និងក្រោយវិបត្តិ Covid-19 ផង ។
ក្នុងឱកាសនោះផងដែរ ឯកឧត្តម សុខ ណារិន ក៏បានផ្តល់អនុសាស្ត្រផ្នែកគោលនយោបាយ និងការងារដែលអង្គការ UNIDO កំពុងអនុវត្តន៌ជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៌ និងគម្រោងផែនការអនុវត្តន៌បន្តសម្រាប់វិស័យឧស្សាហកម្ម នៅកម្ពុជា ផងដែរ ។
មានប្រសាសន៌នាឱកាសនោះ ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យសាស្ត្រ បច្ចេកវិទ្យា និងនវានុវត្តន៌ ដោយមានការចូលរួមពិភាក្សាផ្លាស់ប្តូរយោបល់ក្នុងចំណោមថ្នាក់ដឹកនាំនិងមន្ត្រីជំនាញយ៉ាងផុលផុស ។
លោកបានបង្ហាញនូវទឹកចិត្តសង្ឃឹមទុកជាមុន ថារបាយការណ៌អង្កេតនេះ នឹងក្លាយជាធាតុចូលដ៏សំខាន់ សម្រាប់ពិនិត្យវាយតម្លៃឲ្យកាន់តែគ្រប់ជ្រង់ជ្រោយពីបច្ច័យប៉ះពាល់ទៅលើវិស័យឯកជន ដោយសារមេរោគឆ្លងCovid-19 ជាពិសេសថ្ងៃនេះមានថ្នាក់ដឹកនាំនិងមន្ត្រីជំនាញជាន់ខ្ពស់របស់ក្រសួងបានអញ្ជើញចូលរួមយយ៉ាងច្រើនកុះករ ដើម្បីបានតាមដានស្តាប់ និងផ្លាស់ប្តូរយោបល់ ។
ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ បានវាយតម្លៃខ្ពស់ចំពោះរបាយការណ៌អង្កេត និងមតិចូលរួមយោបល់របស់ថ្នាក់ដឹកនាំ និងមន្ត្រីជំនាញរបស់ក្រសួង ព្រមទាំងលើកឡើងពីកិច្ចខិតខំរបស់រាជរដ្ឋាភិបាល ដែលបានដាក់ចេញនូវវិធានការណ៌ គោលនយោបាយ និងយុទ្ធសាស្ត្រជាច្រើន ដើម្បីស្តារស្ថានភាពឡើងវិញនូវវិបត្តិនេះ ។
ក្នុងឱកាសនោះ ឯកឧត្តមកិត្តិសេដ្ឋាបណ្ឌិត បានទាញចំណាប់អារម្មណ៌ថា៖វិបត្តិ Covid-19 ក៏ជាឱកាសក៏ដូចជាមេរៀនបទពិសោធន៌មួយសម្រាប់ សហគ្រាស ក្រុមហ៊ុននីមួយៗ ដើម្បីបត់បែនឲ្យមានភាពបន្សាំជាមួយនិងស្ថានភាពសេដ្ឋកិច្ច ដូចជា៖ការតម្រង់ទិសការផលិតផលិតផលដែលមានគុណភាព-ការធ្វើពិពិធកម្មសេដ្ឋកិច្ច និងទីផ្សារ – និងការបំពាក់បច្ចេកវិទ្យា ក្នុងសង្វាក់ផលិតកម្មរបស់ខ្លួនជាដើម ។
ចំពោះរបាយការណ៌អង្កេតនេះ ឯកឧត្តមកិត្តិសេដ្ឋាបណ្ឌិត ទេសរដ្ឋមន្ត្រី ថានេះជារបាយការណ៌អង្កេតជំហ៊ានដំបូង និងសូមឲ្យធ្វើឡើងវិញចំនួន០៣ ខែ ក្រោយទៀត ដោយកំណត់នូវវិស័យជាក់លាក់ ជាពិសេសវិស័យសំខាន់ៗចំនួន០៣ គឺ៖វិស័យទេសចរណ៌ ឧស្សាហកម្មកាត់ដេរសម្លៀកបំពាក់ និងស្បែកជើង និងវិស័យ សំណង់ ដើម្បីធ្វើការប្រៀបធៀបផង និងទទួលបានលទ្ធផលគ្រប់ជ្រង់ជ្រោយដើម្បីដាក់ឆ្លងជារបាយការណ៌ទៅគណៈកម្មការគោលនយោបាយហិរញ្ញវត្ថុរបស់រាជរដ្ឋាភិបាល និងទៅអគ្គនាយកអង្គការ UNIDO ផង៕ ដោយ ៖ CEN
