Thursday, June 30, 2022

អាជ្ញាធរខេត្ត​បន្ទាយមានជ័យ និង អាជ្ញាធរ​ថៃ បាន​ឯកភាព ឲ្យ​អាជីវករ​ខ្មែរ​ចូលទៅ​ផ្សារ​រុង​ក្លឿ ពិនិត្យ​ទំនិញ និង​ដឹកទំនិញ​អីវ៉ាន់​មកវិញ​

​បន្ទាយមានជ័យ​៖ អភិបាលខេត្ត​បន្ទាយមានជ័យ និង អាជ្ញាធរ​ថៃ បាន​ឯកភាព​ជាគោលការណ៍ អនុញ្ញាត​ឲ្យ​អាជីវករ​ខ្មែរ ចូលទៅ​ផ្សារ​រុង​ក្លឿ ពិនិត្យ​ទំនិញ និង​ដឹកទំនិញ​អីវ៉ាន់​មកវិញ តាមរយៈ​រថយន្ត ចំនួន ៥០ ឡាន មនុស្ស​ក្នុង​១ ឡាន ២​នាក់ ដោយមាន​ការបំពេញ​បែបបទ ពិនិត្យ​សុខភាព តាម​ការណែនាំ និង​វិធានការ​ក្រសួងសុខាភិបាល ដោយ​ពុំ​អនុញ្ញាត​ឲ្យ​មានការ​ចូលទៅ​លក់ដូរ​នោះទេ ។​

​រដ្ឋបាលខេត្ត​បន្ទាយមានជ័យ បាន​ឲ្យ​ដឹងថា នៅ​ថ្ងៃទី​២៣ មិថុនា ឆ្នាំ​២០២០​នេះ ឯកឧត្តម អ៊ុំ រាត្រី អភិបាលខេត្ត​បន្ទាយមានជ័យ បាន​ប្រជុំ​ជាមួយ ឯកឧត្តម ឯកឧត្តម វ​រ៉ា​ផាន់​សុ​វា​ណុន H.E .WORAPHAN SUWANNUN អភិបាលខេត្ត​ស្រះកែវ ព្រះរាជាណាចក្រ​ថៃ តាមរយៈ​ប្រព័ន្ធ​បញ្ជូន​សារ​សំឡេង រូបភាព (Video Conference) ។​

​របៀបវារៈ​នៃ​កិច្ចប្រជុំ​មាន ៖ ១.​ការបើក​ច្រក​នៅ​ថ្ងៃទី​១ ខែកក្កដា ឆ្នាំ​២០២០ ឬ​បន្ត​បិទ​ច្រក ២.​ពិភាក្សា​សុំ​ឲ្យ​មាន​ការចេញ​~​ចូល​លក់ដូរ​ត្រឹម​ផ្សារ​រុង​ក្លឿ ៣.​ពិភាក្សា​ករណី​ពលករ​(​ចេញ​~​ចូល​) និង​៤.​បញ្ហា​ផ្សេងៗ ។​

​ជា​លទ្ធផល ឆ្លង​កិច្ចពិភាក្សា​យ៉ាង​យកចិត្តទុកដាក់ អភិបាលខេត្ត​បន្ទាយមានជ័យ និង អាជ្ញាធរ​ថៃ បាន​ឯកភាព​ជាគោលការណ៍ ឲ្យ​មានការ​ចូលទៅ​ផ្សារ​រុង​ក្លឿ ពិនិត្យ​ទំនិញ និង​ដឹកទំនិញ​អីវ៉ាន់​មកវិញ តាមរយៈ​រថយន្ត ចំនួន ៥០ ឡាន មនុស្ស​ក្នុង​១ ឡាន ២​នាក់ ដោយមាន​ការបំពេញ​បែបបទ ពិនិត្យ​សុខភាព តាម​ការណែនាំ និង​វិធានការ​ក្រសួងសុខាភិបាល ដោយ​ពុំ​អនុញ្ញាត​ឲ្យ​មានការ​ចូលទៅ​លក់ដូរ​នោះទេ ។ ហើយ​រយៈពេល​នៃ​ការចូលទៅ​ផ្សារ​នោះ គឺ​ចាប់ពី​ម៉ោង ៨ ដល់​ម៉ោង ១០ នាទី​ព្រឹក ឲ្យ​ចូល​ឲ្យ​អស់ នៅវេលា​ម៉ោង​១៣ នាទី​រៀល ចេញពី​ទឹកដី​ថៃ​វិញ ។​
​ចំពោះ​ការអនុញ្ញាត​ឲ្យ​ចូលទៅ​នៅ​ថ្ងៃ​ណា ពេលណា​នោះ មិនទាន់​កំណត់​នោះទេ រង់ចាំ​ការជូនដំណឹង​ពី​រាជរដ្ឋាភិបាល​ថៃ​។​

​ចំណែក​ករណី​បើក​ឬ​បិទ​ច្រកទ្វារព្រំដែន​អន្តរជាតិ​ប៉ោយប៉ែត​~​ខ្លង​លឹក គឺ​រក្សា​ការបិទ​ដដែល នឹង​មិនទាន់មាន​ព័ត៌មាន​ផ្លូវការ​ណាមួយ ត្រូវ​បើក​នាពេល​ឆាប់ៗ​នោះទេ ។​

​រីឯ​ករណី​ប្រជាពលរដ្ឋ​ខ្មែរ ដែល​ចេញពី​ថៃ មក​មាតុប្រទេស​វិញ គឺមាន​ការសម្របសម្រួល ដោយ​រក្សា ឯកភាព​ឲ្យ​ចេញ​តាម​ច្រក​អូរ​បី​ជាន់​ដដែល ។​

​សូមបញ្ជាក់ថា​លោក​ឌិន ពុ​ទ្ធី ប្រធាន​សមាគម​ពង្រឹង​សេដ្ឋកិច្ច​ក្រៅ​ប្រព័ន្ធ​កម្ពុជា បាន​សរសេរ​លិខិត​ជម្រាបជូន​ដល់​រដ្ឋបាលខេត្ត​បន្ទាយមានជ័យ ស្ដីពី​ការជូនដំណឹង​អំពី​ការធ្វើ​បាតុកម្ម​ដោយ​សន្តិវិធី នៅ​ចំណុច​ច្រកទ្វារព្រំដែន​អន្តរជាតិ​ប៉ោយប៉ែត ដែល​នឹង​ចាប់ផ្ដើម​ពីថ្ងៃ​ទី 1 ខែមិថុនា​ឆ្នាំ 2020 ដល់​ថ្ងៃទី 20 មិថុនា​ឆ្នាំ 2020 ចាប់ពី​ម៉ោង 6 ព្រឹក​រហូតដល់​ម៉ោង 6 ល្ងាច​ជា​រៀងរាល់ថ្ងៃ​។​

​ប្រធាន​សមាគម​ពង្រឹង​សេដ្ឋកិច្ច​ក្រៅ​ប្រព័ន្ធ​កម្ពុជា បាន​លើកឡើងថា ប្រជាពលរដ្ឋ​ខ្មែរ​ដែលជា​អាជីវករ​អ្នកលក់ដូរ​ទំនិញ​នៅក្នុង​ផ្សារ​រុង​ក្លឿ កម្មករ​អូស​រទេះ​អ្នករត់ម៉ូតូឌុប​អ្នករត់​តាក់ស៊ី​អ្នករត់​ម៉ូតូ​កង់​បី និង​អ្នក​ប្រកបរ​បរសេដ្ឋ​កិច្ច​ក្រៅ​ប្រព័ន្ធ​ទាំងអស់​ដែល​រស់នៅក្នុង​ក្រុង​ប៉ោយប៉ែត​ខេត្តបន្ទាយមានជ័យ បាន​ឯកភាពគ្នា​ជា​ឯកច្ឆន្ទ​និង​ចូលរួម​ធ្វើបាតុកម្ម ដោយមាន​មនុស្ស​ចូលរួម​ប្រមាណ 1500 នាក់ រទេះ​មួយរយ​គ្រឿង​និង​ឧ​ឃោស​ន​ស័ព្ទ​ចំនួន 1 គ្រឿង​។​

​លោក​ថា អាជីវករ​លក់ដូរ​ទំនិញ​នៅ​ផ្សារ​រុង​ក្លឿ​មានការ​ព្រួយបារម្ភ​យ៉ាងខ្លាំង ចំពោះ​របស់របរ​រប​ស់​ខ្លួន​ដែលមាន​នៅក្នុង​តូប​នីមួយៗ​ដែលមាន​តម្លៃ​រាប់ម៉ឺន​ដុល្លារ​នោះ ខ្លះ​មានអី​វ៉ាន់​តម្លៃ​រហូតដល់​រាប់សែន​ដុល្លារ​។ អីវ៉ាន់​ទាំងនោះ​ពួកគាត់​ទិញ​មក​លក់​មិនមែន​សម្រាប់​យកមក​ទុក​ក្នុង​រយៈពេល​យូរ​បាន​នោះទេ ដូច្នេះ​អីវ៉ាន់​ត្រូវ​ខូចគុណភាព​ហួស​កាលបរិច្ឆេទ មិនអាច​ប្រើប្រាស់​ឬ​ហូបចុក​បាន​។ អីវ៉ាន់​ខ្លះទៀត​ត្រូវបាន​ទឹក​លិច​ពុកផុយ​កណ្ដុរ​ឬ​សត្វល្អិត​កាត់​ខ្ទេចខ្ទី​គ្មាន​សល់​។ ទាំងនេះហើយ​ដែលជា​មូលហេតុ​ធ្វើ​ឲ្យ​ពួកគាត់​ខាតដើម​ទុន​បាត់បង់​ទ្រព្យធន​យ៉ាងធ្ងន់ធ្ងរ​អាច​ធ្លាក់ខ្លួន​ទៅជា​អ្នក​ជំពាក់​បំណុល​គេ​វ័​ណ្ណ​ក​។​

​លោក​បន្តថា ខាង​ភាគី​ថៃ​មិន​ព្រម​បើក​ច្រក​អន្តរជាតិ​ប៉ោយប៉ែត ប៉ុន្តែ​មន្ត្រី​សមត្ថកិច្ច​និង​ទាហាន​ថៃ​នៅតាម​ច្រករបៀង​នានា​បាន​បើក​ឲ្យ​ប្រជាពលរដ្ឋ​ខ្មែរ​អាច​ចូលទៅ​ប្រទេស​ថៃ បាន​ដោយ​បង់ប្រាក់​ឲ្យ​ពួក​មន្ត្រី​សមត្ថកិច្ច​និង​ទាហាន​ថៃ​ទាំងនោះ យ៉ាងច្រើន​សន្ធឹកសន្ធាប់​បន្ទាប់មក​ពួក​មន្ត្រី​សមត្ថកិច្ច​នឹង​ទាហាន​ថៃ​ទាំងនោះ មិនបាន​ធានា​សុវត្ថិភាព​ជូន​ប្រជាពលរដ្ឋ​ខ្មែរ​ឡើយ ម្យ៉ាងទៀត​ប្រជាពលរដ្ឋ​ខ្មែរ​ទាំងនោះ​មិនត្រូវ​បាន​គេ​ពិនិត្យ​សុខភាព ឬ​ពិនិត្យ​កំដៅ​ក្នុង​ខ្លួន​អ្វី​ទាំងអស់​ដូច្នេះ​ការចម្លង និង​ការឆ្លង​ជំងឺ​កូ​វីដ​១៩ អាចមាន​ហានិភ័យ​ខ្ពស់​សម្រាប់​ប្រជាពលរដ្ឋ​ដែល​បានធ្វើ​ដំណើរ​ឆ្លងកាត់​តាម​ច្រករបៀង​ទាំងនោះ​។​

​ការបើក​ច្រកទ្វារព្រំដែន​អន្តរជាតិ​នានា ជា​ដំណោះស្រាយ​ល្អ​បំផុត​សម្រាប់​ប្រជាពលរដ្ឋ​ខ្មែរ និង​ប្រជាពលរដ្ឋ​ថៃ​ពីព្រោះ​នៅតាម​ច្រកទ្វារ​អន្តរជាតិ​ទាំងនោះ​តែងតែមាន​ម៉ាស៊ីន​ស្កេ​ន​ពិនិត្យ​កំដៅ​ក្នុង​ខ្លួន​នោះ ម៉ាស៊ីន​បាញ់​អាល់កុល ឬ​ថ្នាំ​សម្លាប់​មេរោគ​និង​ជួយ​កាត់បន្ថយ​ការឆ្លង​ដែន​ដោយ​ខុសច្បាប់​នៅតាម​ច្រករបៀង​នានា​។​

​ក្នុងពេល​កន្លងទៅ​ឯកឧត្តម​អភិបាលខេត្ត​បន្ទាយមានជ័យ និង​លោក​អភិបាលក្រុង​ប៉ោយប៉ែត ពិតជា​បាន​យកចិត្តទុកដាក់​ចំពោះ​ប្រជាពលរដ្ឋ​ដែល​រស់នៅក្នុង​ក្រុង​ប៉ោយប៉ែត ក៏ដូចជា​ប្រជាពលរដ្ឋ​ខ្មែរ​ទូទាំងប្រទេស​យ៉ាងពិត​ប្រាកដ​ពីព្រោះ​ឯកឧត្តម​ធ្លាប់​បានស្នើ​ឲ្យ​ភាគី​ថៃ​បើក​ច្រកទ្វារព្រំដែន​អន្តរជាតិ​ប៉ោយប៉ែត​ខ្លង​លឹក​ឡើងវិញ ដើម្បី​ឲ្យ​ប្រជាពលរដ្ឋ​ខ្មែរ​បានចេញ​ចូល​ដោយ​ស្របច្បាប់​ក្នុង​គោលបំណង​ជួយ​ដល់​ការដោះស្រាយ​ជីវភាព​រស់នៅ របស់​ប្រជាពលរដ្ឋ​បានរស់នៅ​ក្នុង​ជីវភាព​ដ៏​សម​រុំ​ផងដែរ​។​

​ពាក់ព័ន្ធ​សំណើសុំ​ខាងលើ​រដ្ឋបាលខេត្ត​បន្ទាយមានជ័យ មិន​អនុញ្ញាត​ទេពី​ព្រោះ​បច្ចុប្បន្ននេះ រាជរដ្ឋាភិបាល​កំពុង​មាន​វិធានការ​ទប់ស្កាត់​ការរីក​រាលដាល​នៃ​ជំងឺ​កូ​វីដ​១៩ នៅ​ទូទាំងប្រទេស​ដែល​ជំងឺ​នេះ បាននិងកំពុង​រីក​រា​ល​ដាល​ឥតឈប់ឈរ​ស្ទើរ​គ្រប់​ប្រទេស​នៅលើ​ពិភពលោក​។​

​អភិបាលខេត្ត​បន្ទាយមានជ័យ​បាន​លើកឡើងថា កន្លងមក​រដ្ឋបាលខេត្ត​ធ្លាប់បាន​អន្តរាគមន៍​ទៅ​រដ្ឋបាលខេត្ត​ស្រះកែវ នៃ​ប្រទេស​ថៃ​ដើម្បី​សុំ​ឲ្យ​ជួយ​សម្រួល​មិន​យក​កម្រៃ​ឈ្នួល​ពី​បងប្អូន​អាជីវករ ក្នុង​សុំ​សម្រួល​ឱ្យ​បងប្អូន​អាជីវករ​កម្ពុជា​ទាំងអស់​នៅក្នុង​ផ្សារ​រុង​ក្លឿ បានចេញ​ចូលទៅ​មើល​តូប​របស់ខ្លួន​ក្នុង​មួយ​លើក 20 នាក់​រហូតដល់​ស្ថានភាព​វិល​មកជា​ប្រក្រតី​វិញ ក្នុងនោះ​ភាគី​ថៃ​បាន​ឆ្លើយតប​ថា​នឹង​ជួយ​សម្រួល​មិន​យក​កម្រៃ​ឈ្នួល​ពី​បងប្អូន​អាជីវករ​កម្ពុជា ប៉ុន្តែ​ចំពោះ​សំណើរ​សុំ​សម្រួល​ឱ្យ​បងប្អូន​អាជីវករ​កម្ពុជា​ទាំងអស់ ក្នុង​ផ្សារ​រុង​ក្លឿ​ចេញ​ចូលទៅ​មើលទៅ​ព្រ​បស់​ខ្លួន​ក្នុង​មួយ​លើក 20 នាក់​ភាគី​ថៃ មិន​ឯកភាព​នោះទេ​។ ម្យ៉ាងទៀត​រដ្ឋបាលខេត្ត​ស្នើ​ឲ្យ​លោក​ឌិន ពុ​ទ្ធី​ប្រធាន​សមាគម​ពង្រឹង​សេដ្ឋកិច្ច​ក្រៅ​ប្រព័ន្ធ​កម្ពុជា ត្រូវធ្វើ​សកម្មភាព​ស្របតាម​ច្បាប់ ស្តីពី​សមាគម​និង​អង្គការ​មិនមែន​រដ្ឋាភិបាល លិខិតបទដ្ឋាន​គតិយុត្ត​នានា ជា​ធរមាន​និង​លក្ខន្តិកៈ​របស់ខ្លួន ដូច​បាន​តម្កល់ទុក​នៅ​ក្រសួងមហាផ្ទៃ​៕

ដោយ​៖​កូ​ឡាប​