សេចក្តីណែនាំរបស់រដ្ឋមន្ត្រីកសិកម្ម លោក វេង សាខុន ចុះថ្ងៃទី ២៥ ខែមករា ឆ្នាំ ២០១៨ បានបញ្ជាក់ឲ្យដឹងថា រដ្ឋាភិបាលបានចុះហត្ថលេខាលើអនុស្សរណៈយោគយល់គ្នាជាមួយ “សមាគមស្វាយចន្ទីវៀតណាម ស្តីពីការជំរុញផលិតកម្មស្វាយចន្ទីកម្ពុជាសម្រាប់ការនាំចេញ” កាលពីថ្ងៃទី ១៧ ខែមករា ឆ្នាំ ២០១៨ កន្លទៅនេះ។ ភាគីសមាគមស្វាយចន្ទីវៀតណាមបានយល់ព្រមផ្តល់ប្រភេទពូជស្វាយចន្ទីគាំទ្របច្ចេកទេស និងប្រមូលទិញផលិតផលស្វាយចន្ទីពីកសិករ ឬសហគមន៍កសិកម្ម ដោយអនុវត្តតាមគោលការណ៍ផលិតកម្មកសិកម្មតាមកិច្ចសន្យា។
ក្រសួងកសិកម្មបានធ្វើការណែនាំថា ៖ “ត្រូវការណែនាំ និងផ្សព្វផ្សាយឲ្យបានទូលំទូលាយដល់ក្រុមកសិករ ឬសហគមន៍កសិកម្ម ព្រមទាំងក្រុមហ៊ុនសម្បទានដីសេដ្ឋកិច្ច ឲ្យចូលរួមបង្កើនផលិតកម្មដំណាំស្វាយចន្ទី ជាមួយសមាគមស្វាយចន្ទីវៀតណាមឲ្យបានល្អប្រសើរ ដើម្បីភ្ជាប់ទំនាក់ទំនងទីផ្សារនាំចេញ”។
ក្រសួងកសិកម្មរុក្ខាប្រមាញ់ និងនេសាទក៏បានចេញវិធានការមួយចំនួន ដើម្បីសម្រួលដល់ផលិតកម្មដំណាំស្វាយចន្ទី ដែលកំពុងមានតម្រូវការពីទីផ្សារអន្តរជាតិ។
តាមនោះរដ្ឋាភិបាលបានចុះហត្ថលេខាលើអនុស្សារណៈយោគយល់គ្នាជាមួយ “សមាគមស្វាយចន្ទីវៀតណាម ស្តីពីការជំរុញផលិតកម្មស្វាយចន្ទីកម្ពុជាសម្រាប់ការនាំចេញ” កាលពីថ្ងៃទី ១៧ ខែមករា ឆ្នាំ ២០១៨ កន្លងទៅនេះ។ ទន្ទឹមនឹងនេះ ភាគីសមាគមស្វាយចន្ទីវៀតណាមបានយល់ព្រមផ្តល់ប្រភេទពូជស្វាយចន្ទី គាំទ្របច្ចេកទេស និងប្រមូលផលិតផលស្វាយចន្ទីពីកសិករ ឬសហគមន៍កសិកម្ម ដោយអនុវត្តតាមគោលការណ៍ផលិតកម្មកសិកម្មតាមកិច្ចសន្យា។
ដើម្បីបង្កើនផលិតកម្មដំណាំស្វាយចន្ទីឲ្យមានប្រសិទ្ធភាពខ្ពស់លោក វេង សាខុន បានផ្តល់ការណែនាំមួយចំនួន រួមមានពិនិត្យ សិក្សាអំពីសក្តានុពលជាយុទ្ធសាស្ត្រ និងកំណត់ដំបន់ដាំដុះដំណាំស្វាយចន្ទី សម្រាប់ប្រជាកសិករ និងសហគមន៍កសិកម្ម ធ្វើការផលិត និងភ្ជាប់ទីផ្សារតាមរយៈការអនុវត្តផលិតកម្មតាមកិច្ចសន្យាក្រោមក្រមខណ្ឌនៃការអនុវត្តអនុស្សារណៈយោគយល់គ្នាស្តីពីការជំរុញផលិតកម្មស្វាយចន្ទីកម្ពុជា សម្រាប់ការនាំចេញជាមួយសមាគមស្វាយចន្ទីវៀតណាម។
លោករដ្ឋមន្ត្រី វេង សាខុន ក៏បានជំរុញឲ្យមានការសម្របសម្រួល និងសហការឲ្យបានជិតស្និទ្ធជាមួយសមាគមស្វាយចន្ទីវៀតណាម ក្នុងការជ្រើសរើស ក្រុមផលិត ការផ្តល់បច្ចេកទេសទំនើប ជូនដល់ក្រុមកសិករ ឬសហគមន៍សកិកម្ម ដើម្បីដាំដុះដំណាំស្វាយចន្ទីជំនួសប្រភេទដំណាំណាដែលផ្តល់ទិន្នផលទាបដែលមិនសមស្របនឹងប្រព័ន្ធក្សេត្របរិស្ថានចំពោះមុខ និងទៅអនាគត។
ក្នុងបរិបទទាក់ទិនបញ្ហាកសិកម្មនេះ សម្តេចតេជោ នាយករដ្ឋមន្ត្រី ទើបតែបានស្នើឲ្យប្រទេសឥណ្ឌាជួយពង្រឹងវិស័យកសិកម្មកម្ពុជា តាមរយៈប្រព័ន្ធព័ត៌មានវិទ្យារបស់ឥណ្ឌា ក្នុងការពិនិត្យមើលគុណភាពដី និងបែងចែកតំបន់ដាំដុះ។ ការស្នើនេះត្រូវបានធ្វើឡើង ក្នុងអំឡុងពេលនៃដំណើរទស្សនកិច្ចផ្លូវការរបស់លោក ទៅកាន់ប្រទេសឥណ្ឌា ដែលមានរយៈពេល៣ថ្ងៃ គឺគិតចាប់ពីថ្ងៃទី ២៤ ដល់ថ្ងៃទី ២៧ ខែមករា ឆ្នាំ ២០១៨នេះ៕ បូព៌ា
