ភ្នំពេញ៖ ក្នុងកាលៈទេសៈដែលអតីតក្រសួងឧស្សាហកម្ម និងសិប្បកម្ម ត្រូវបានរាជរដ្ឋាភិបាលប្តូរឈ្មោះ ជាក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងត្រូវបានបង្កើតអគ្គនាយកដ្ឋានចំណុះថ្មីមួយ ហៅថា៖ អគ្គនាយកដ្ឋាន វិទ្យាសាស្ត្រ បច្ចេកវិទ្យា និងនវានុវត្តន៍ និងវិទ្យាស្ថានមួយ គឺ៖វិទ្យាស្ថានជាតិ វិទ្យាសាស្ត្រ បច្ចេកវិទ្យា និងនវានុវត្តន៍ នាពេលថ្មីៗនេះ ដើម្បីឲ្យស្របនិងនិន្នាការរីកចម្រើននៃបរិបទបដិវត្តន៍ឧស្សាហកម្មជំនាន់ទី៤ និងសេដ្ឋកិច្ចបែបឌីជីថល ។
ក្នុងនោះតម្រូវការធុនធានមនុស្សផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ ដែលនៅបែកខ្ញែកគ្នា តាមស្ថាប័ន ក្រសួង មន្ទីរ វិស័យឯកជនក៏ដូចជានៅក្នុងអង្គការក្រៅរាជរដ្ឋាភិបាលជាដើម គឺជាគោលដៅដ៏សំខាន់ដែលរាជរដ្ឋាភិបាលក៏ដូចជាក្រសួង ស្ថាប័នពាក់ព័ន្ធសហការគ្នា ដើម្បីធ្វើជាបញ្ជីសារពើភ័ណ្ឌប្រមូលផ្តុំទុកជាខួរក្បាលរបស់ជាតិ រួមទាំងការផ្តោតទៅលើសិស្សលេចធ្លោដែលកំពុងសិក្សាក្នុងសាលារៀន និងបញ្ញាវ័ន្តដែលបញ្ចប់ការសិក្សារួចហើយផងដែរ ។
ដើម្បីជាចំណុចចាប់ផ្តើមអនុវត្តលើការងារនេះ នៅរសៀលថ្ងៃទី ២៩ ខែ មិថុនា ឆ្នាំ២០២០ នៅទីស្តីការក្រសួងអប់រំ យុវជន និងកីឡា ដែលជាក្រសួងស្នូលនៃការបណ្តុះបណ្តាលធនធានមនុស្សគ្រប់កម្រិត មានរៀបចំជំនួបពិភាក្សាមួយរវាង ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ។
ឆ្លងកាត់ការពិភាក្សា និងផ្លាស់ប្តូរយោបល់ទៅវិញទៅមក សាមីក្រសួងទាំងពីរបានបង្ហាញនូវសារសំខាន់នៃការបណ្តុះបណ្តាល ការគ្រប់គ្រង និងការអភិវឌ្ឍន៍ធនធានមនុស្សផ្នែកវិទ្យាសាស្ត្រ បច្ចេកវិទ្យា និងការច្នៃប្រឌីតថ្មីៗ ហើយត្រូវយកចិត្តទុកដាក់ការធ្វើបញ្ជីសារពើភ័ណ្ឌមួយ ទុកជាធនធានខួរក្បាលរបស់ជាតិ ដែលបច្ចុប្បន្នធនធានទាំងនេះ នៅបែកខ្ញែកគ្នា ហើយមានមួយចំនួនកំពុងបំពេញការងារខុសជំនាញ ។ មួយវិញទៀតការងារសំខាន់បំផុត គឺការសម្រួចខួរក្បាលធនធានទាំងនេះ តាមរយៈការរៀនសូត្រផ្សារភ្ជាប់និងការអនុវត្តជាក់ស្តែង ។ ពីព្រោះការបញ្ចប់សញ្ញាបត្រពីសាលា ឬសាកលវិទ្យាល័យ យើងអាចចាត់ទុកថា៖ជាចំណេះដឹងមូលដ្ឋាន និងបែបទ្រឹស្តីភាគច្រើន ។ ដូច្នេះជាយន្តការ ក្រសួងស្ថាប័ន និងដៃគូពាក់ព័ន្ធទាំងអស់ត្រូវសហការគ្នា ធ្វើសមាហរណកម្មធនធានទាំងនោះ តាមរយៈកិច្ចសហការរវាងស្ថាប័នរដ្ឋ ជាមួយសាកលវិទ្យាល័យជំនាញ វិស័យឯកជន និងអង្គការក្រៅរដ្ឋាភិបាលជាដើម ដើម្បីឲ្យប្រាកដថាធនធានមួយណាមានតម្រូវការជាក់ស្តែង និងក៏ជាមូលដ្ឋានបែងចែកធុនធានឲ្យត្រូវមុខសញ្ញាការងារ ។ ក្នុងនោះ រដ្ឋ ត្រូវសហការរៀបចំវេទិកា ឬសិក្ខាសាលានានា ដើម្បីធ្វើជាព្រឹត្តិការណ៍ជួបជុំគ្នាផ្លាស់ប្តូរបទពិសោធន៍ ឬការផ្ទេរចំណេះដឹងថ្មីៗ រវាងអ្នកបានប្រឡូកក្នុងការងារជាក់ស្តែង តាមចំណេះដឹងដែលខ្លួនមាន និងអ្នកដែលទើបបញ្ចប់ការសិក្សាជំនាញពីសាលា ។
ទន្ទឹមនឹងនេះ រាជរដ្ឋាភិបាលត្រូវមានធនធានសមស្រប ដោយសហការជាមួយដៃគូអភិវឌ្ឍន៍ និងប្រទេសផ្តល់ជំនួយ សម្រាប់ការងារស្រាវជ្រាវ និងការអភិវឌ្ឍន៍ អភិវឌ្ឍធុនធានគ្រូបង្រៀន គ្រូទ្ទេសនាម ជំនាញការ និងធុនធានឧបករណ៍សម្ភារៈ ដូចជាមន្ទីរពិសោធន៍ជាដើម ។
សូមបញ្ជាក់ថា៖ នាពេលខាងមុខថ្នាក់ដឹកនាំក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងបន្តពិភាក្សាជាមួយក្រសួងផែនការ និងចុះសិក្សាស្វែងយល់តាមសាកលវិទ្យាល័យជំនាញផ្សេងៗទៀត ដើម្បីទទួលបានធាតុចូលថ្មីៗថែមទៀត ៕
ដោយ៖បញ្ញាស័ក្តិ