ខេត្តតាកែវ៖ចូលខែកក្កដា ឆ្នាំ២០២០ កម្លាំងការិយាល័យបទល្មើសគ្រឿងញៀន នៃកងរាជអាវុធហត្ថខេត្តតាកែវ សហការជាមួយកម្លាំងអាវុធហត្ថស្រុកសំរោង ដឹកនាំដោយលោកអនុសេនីយ៍ត្រី ហួត វឿន នាយការិយាល័យ នឹងដោយមានការសម្របសម្រួលនីតិវិធីពីលោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវ បានចុះបង្ក្រាបករណីជួញដូរសារធាតុញៀន ដោយខុសច្បាប់២ករណី នៅភូមិត្រពាំងប្រិយ ឃុំសឹង្ហ ស្រុកសំរោង ខេត្តតាកែវ ។
ករណីទី១ ជនសង្ស័យ២នាក់ ត្រូវបានចាប់ខ្លួនដែលមានឈ្មោះ៖ ឈ្មោះ ស៊ឹម ពិសិដ្ន ភេទប្រុស អាយុ២៤ឆ្នាំ(មានដីកាចាប់ខ្លួន) និងឈ្មោះ សៅ សុធានិត ភេទប្រុស អាយុ២០ឆ្នាំ ទាំង២នាក់រស់នៅភូមិ ឃុំខាងលើ។ ចំណែកវត្ថុតាងដកហូតបានរួមមាន ម្សៅក្រាមសថ្លា៩កញ្ចប់ ធំ៤ តូច៥ ទម្ងន់២៥,៤៣ក្រាម និងទូរស័ព្ទ៣គ្រឿផងដែរ ។
ក្រោយការឆ្លើយសារភាពពីឈ្មោះ ស៊ឹម ពិសិដ្ន កម្លាំងការិយាល័យជំនាញឈានទៅបង្ក្រាប និងឃាត់ខ្លួនជនសង្ស័យ៣នាក់បន្ថែមទៀត ក្នុងនោះមានស្រីម្នាក់ផងដែរ។ ជនសង្ស័យទី១ ឈ្មោះ ប៊ូ សារ៉ែន ភេទប្រុស អាយុ ៣០ឆ្នាំ ស្រុកកំណើតនៅភូមិសា្វយចេក ឃុំព្រៃឈរ ស្រុកកំពង់ត្របែក ខេត្តព្រៃវែង។ ទី២ ឈ្មោះ ចាប សុខហេង ភេទប្រុស អាយុ៣០ឆ្នាំ ស្រុកកំណើតនៅភូមិសំរោង ឃុំរោងក្រោម ស្រុកបន្ទាយមាស ខេត្តកំពត។ ទី៣ ឈ្មោះ សុខ ស្រីអែម ភេទស្រី អាយុ២៤ឆ្នាំ ស្រុកកំណើតនៅភូមិថ្មី ឃុំសូទិព្វ ស្រុកជើងព្រៃ កំពង់ចាម។ ដោយឡែកវត្ថុតាងដកហូតបានរួមមាន៖ ម្សៅក្រាមសថ្លាចំនួន៣កញ្ចប់ ធំ១ តូច២ ទម្ងន់១១៤,៤២ក្រាម ទូរស័ព្ទដៃ៣គ្រឿង និងម៉ូតូកង់បី១គ្រឿងផ្លាកលេខ ភ្នំពេញ 1 HY 4869 ។
បច្ចុប្បន្នជនសង្ស័យ និងវត្ថុតាង ត្រូវបានកម្លាំងការិយាល័យជំនាញ នៃកងរាជអាវុធហត្ថខេត្តតាកែវ កសាងសំណុំរឿង បញ្ជូនទៅសាលាដំបូងខេត្ត ចាត់ការតាមនីតិវិធី៕ ដោយ៖ តាកែវ
