ខេត្តស្វាយរៀង ៖ អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា បានផ្លាស់ប្តូរតំណែង ប្រធានសាខាគយ និងរដ្ឋាករខេត្តស្វាយរៀង និងប្រធានការិយាល័យគយ និងរដ្ឋាករព្រៃវល្លិ៍ នៅថ្ងៃទី៦ ខែកក្កដា ឆ្នាំ២០២០នេះ ។ ក្នុងឱកាសនោះដែរ លោកអគ្គនាយករង នៃអគ្គនាយកដ្ឋានគយ និងរដ្ឋាករកម្ពុជា បានមានប្រសាសន៍ថា ការផ្លាស់ប្តូរ គឺជាភារកិច្ចចាំបាច់ និងតម្រូវការរបស់រាជរដ្ឋាភិបាល ស្របតាមគោលនយោបាយជាតិ។
លោក ហេង សំបូរ ត្រូវបានតែងតាំងជាប្រធានសាខាគយ និងរដ្ឋាករខេត្តស្វាយរៀង ជំនួសលោក ខៀវ សារឿន ដែលត្រូវទទួលមុខតំណែងថ្មី ជាប្រធានសាខាគយ និងរដ្ឋាករខេត្តកំពង់ធំ និងប្រកាសលោក ចាន់ តារា ជាប្រធានការិយាល័យគយ និងរដ្ឋាករច្រកទ្វាយអន្តរជាតិព្រៃវល្លិ៍ ស្រុកកំពង់រោទិ៍ ខេត្តស្វាយរៀង។
លោក នួន ច័ន្ទរិទ្ធ បានមានប្រសាសន៍ថា ការផ្លាស់ប្តូរ គឺជាភារកិច្ចចាំបាច់ និងតម្រូវការរបស់រាជរដ្ឋាភិបាល ស្របតាមគោលនយោបាយជាតិ។ ជាមួយគ្នានោះ អ្នកចាស់ផ្លាស់ទៅដោយភាពរីករាយ ដោយឡែក អ្នកថ្មីឡើងកាន់តំណែងថ្មី ត្រូវបន្តដឹកនាំឲ្យបានល្អប្រសើរ និងត្រូវសាមគ្គីភាពផ្ទៃក្នុង ពង្រឹងកិច្ចសហប្រតិបត្តិការជាមួយអាជ្ញាធរមូលដ្ឋាន ពិសេសត្រូវយកចិត្តទុកដាក់ត្រួតពិនិត្យទំនិញ ឆ្លងកាត់ឲ្យបានត្រឹមត្រូវ និងទប់ស្កាត់បទល្មើសគេចពន្ធគ្រប់ប្រភេទផងដែរ៕
ដោយ៖វៃកូ
