សៀមរាប៖ រាជបណ្ឌិត្យសភាកម្ពុជា នៅថ្ងៃទី៦ខែកក្កដាឆ្នាំ២០២០ បានចេញរបាយការណ៍នៃការសិក្សាស្រាវជ្រាវស្តីពី «ការពិនិត្យគុណភាពទឹកនៅភ្នំគូលេន» ឃុំខ្នងភ្នំ ស្រុកស្វាយលើ ខេត្តសៀមរាប។ បើតាមរបាយការណ៍បានសន្និដ្ឋានថា គុណភាពទឹកធ្លាក់ភ្នំគូលែនមានលក្ខណៈល្អបង្គួរ ពីធម្មជាតិដែលអាចទ្រទ្រង់ជីវិតភាវរស់ទាំងអស់ និងល្អសម្រាប់ការស្រោចស្រពដំណាំកសិកម្មនានា ក៏ប៉ុន្តែមិនមានគុណភាពល្អគ្រប់គ្រាន់សម្រាប់ទឹកពិសានៅឡើយទេ ទឹកធ្លាក់ភ្នំគូលែនដែលមានការអះអាងថាជាទឹកអម្រិត ឬអាទិទេពនោះ គឺគ្រាន់តែជាការសន្និដ្ឋានតាមបែបជំនឿសាសនាកាលពីសម័យមុននោះ ហើយដែលវិទ្យាសាស្រ្តបច្ចេកទេសវិទ្យាមិនទាន់អាចបញ្ជាក់ពីគុណភាពទឹកនៅឡើយ។
កាលពីថ្ងៃទី ២៥- ២៩ ខែមិថុនា ឆ្នាំ២០២០ មន្ត្រីរាជបណ្ឌិត្យសភាកម្ពុជាពីររូប និងមន្ត្រីបីរូបទៀតពីសមាគមគីមីកម្ពុជា និងសាកលវិទ្យាល័យអន្តរជាតិ បានចុះធ្វើការសិក្សាស្រាវជ្រាវស្តីពី «ការពិនិត្យគុណភាពទឹកនៅភ្នំគូលេន» ឃុំខ្នងភ្នំ ស្រុកស្វាយលើ ខេត្តសៀមរាប។
តាមលទ្ធផលនៃការកំណត់គុណភាពនៃទឹកធ្លាក់ភ្នំគូលែនបានបង្ហាញថាទឹកធ្លាក់ភ្នំគូលែន មានផ្ទុកបណ្តាសារធាតុរ៉ែ និងលោហៈធ្ងន់មួយចំនួន ក្នុងបរិមាណមួយស្ថិតក្នុងចន្លោះ ឬទាបជាងកម្រិតគុណភាពស្តង់ដារនៃទឹកលើកលែងតែដែក និងម៉ង់កាណែសដែលមានបរិមាណលើសកម្រិតស្តង់ដារ ក្នុងទីតាំងខ្លះៗនៃភាគសំណាកទឹក។
ជាសេចក្តីសន្និដ្ឋាន គុណភាពទឹកធ្លាក់ភ្នំគូលែនមានលក្ខណៈល្អបង្គួរ ពីធម្មជាតិដែលអាចទ្រទ្រង់ជីវិតភាវរស់ទាំងអស់ និងល្អសម្រាប់ការស្រោចស្រពដំណាំកសិកម្មនានា ក៏ប៉ុន្តែមិនមានគុណភាពល្អគ្រប់គ្រាន់សម្រាប់ទឹកពិសានៅឡើយទេ ព្រោះវាមានសភាពល្អក់ និងមានផ្ទុកបណ្តាមីក្រូជីវសាស្រ្តក្នុងកម្រិតខ្ពស់បង្គួរ ដែលអាចធ្វើឲ្យប៉ះពាល់ដល់សុខភាព និងស្បែកមនុស្ស។ ប្រព្រឹត្តកម្ម ឬការសម្អាតទឹកគួរតែត្រូវធ្វើមុនយកប្រភពទឹកទាំងនេះទៅពិសា ឬប្រើប្រាស់តាមផ្ទះ។ សម្រាប់ការអះអាងថាទឹកធ្លាក់ភ្នំគូលែនជាំទឹកអម្រិត ឬអាទិទេពនោះ គឺគ្រាន់តែជាការសន្និដ្ឋានតាមបែបជំនឿសាសនាកាលពីសម័យមុននោះ ហើយដែលវិទ្យាសាស្រ្តបច្ចេកទេសវិទ្យាមិនទាន់អាចបញ្ជាក់ពីគុណភាពទឹកនៅឡើយ៕
ដោយ៖កូឡាប
