តាកែវ៖ រយៈពេល ២ថ្ងៃមកហើយ អភិបាលក្រុងដូនកែវ លោក កង អាណាន់ បានបញ្ជាឲ្យមន្ត្រីជំនាញយកអេស្ការវទ័រ ចុះជួយដោះស្រាយបញ្ហាដែលបងប្អូនប្រជាពលរដ្ឋ នៅក្នុងក្រុងកំពុងជន់លិចដោយសារតែស្ទះលូបង្ហូរទឹកស្អុយ ហូរមិនទាន់ នៅពេលមានភ្លៀងធ្លាក់ខ្លាំងម្តង ។
លោក កង អាណាន់ បានឲ្យដឹងថា មូលហេតុដែលធ្វើឲ្យផ្លូវបង្ហូរទឹកស្អុយ មានការហូរមិនទាន់ ក្នុងសភាពការរំដោះទឹកចេញនេះ គឺបណ្តាលមកពីការសំណល់សំរាមមួយចំនួនហូរចូលស្ទះនៅតាមមាត់លូ និងមួយវិញទៀត គឺបណ្តាលមកពីបងប្អូនប្រជាពលរដ្ឋ ដែលចាក់ដីធ្វើលំនៅដ្ឋានចាក់ដី មានសភាពខ្ពស់ជាងថ្នល់ និងដាក់លូខាងមុខដីរបស់ខ្លួន មិនសមស្របទៅតាមស្តង់ដារបច្ចេកទេស នៃនីវូទឹក ទើបបណ្តាលឲ្យមានការជន់លិចផ្ទះសម្បែងប្រជាពលរដ្ឋមួយចំនួន ។ ហើយពីរថ្ងៃមកនេះ លោកបានចាក់ឲ្យមន្ត្រីជំនាញចុះពិនិត្យអំពីស្ថានភាព នៅតាមចំណុចដែលស្ទះខ្លាំង គឺត្រូវប្រើអេស្កាវេចទ័រកាយចោលជាបណ្តោះអាសន្នសិន ដើម្បីបញ្ជៀសការជន់លិច ឬកកស្ទះប្រព័ន្ធលូតបង្ហូរទឹកស្អុយនេះ នៅក្នុងរដូវមានភ្លៀងធ្លាក់នេះ ។
ទន្ទឹមនឹងបញ្ហានេះដែរ លោកអភិបាលក្រុងដូនកែវ ក៏សូមអំពាវនាវ ដល់បងប្អូនប្រជាពលរដ្ឋក្នុងក្រុង ត្រូវមានធុងដាក់សំរាមនៅតាមគេហដ្ឋានរបស់ខ្លួន ដើម្បីច្រកនិងទុកដាក់ឲ្យបានល្អ ងាយស្រួលដល់ក្រុមហ៊ុនប្រមូលសំរាម ប្រមូលយកទៅចាក់ចោល ជៀសវាងបងប្អូនប្រជាពលរដ្ឋមួយចំនួន ដែលបានយកសំរាមទៅញត់នៅតាមមាត់លូ និងបោះចោលនៅតាមទីសាធារណៈ និងប្រឡាយទឹក ព្រោះវាជាផ្នែកមួយដែលធ្វើឲ្យមានការជន់លិចផ្ទះសម្បែងរបស់បងប្អូនប្រជាពលរដ្ឋ ដោយសារតែធ្វើឲ្យមានការកកស្ទះផ្លូវបង្ហូរទឹកស្អុយនេះផងដែរ ៕ដោយ៖តាកែវ
