ខេត្តតាកែវ ៖ ជនសង្ស័យពាក់ព័ន្ធករណីឃាតកម្ម ពីរនាក់ ត្រូបានប៉ូលិសជំនាញក្រុងដូនកែវ សហការនិងប៉ូលិសជំនាញ នៃស្នងការនគរបាលខេត្តតាកែវ ស្រាវជ្រាវរហូតកំណត់មុខសញ្ញា នឹងឈានដល់ការចាប់ឃាត់ខ្លួន ក្រោយបានប្រព្រឹត្តកន្លងទៅជិត១ឆ្នាំ។
ក្រោមការបញ្ជាពីសំណាក់លោកឧត្ដមសេនីយ៍ទោ សុខ សំណាង ស្នងការនៃស្នងការដ្ឋាននគរបាលខេត្តតាកែវ និងមានការសម្របសម្រួលពី លោកព្រះរាជអាជ្ញាអមសាលាដំបូងខេត្តតាកែវ ដែលដឹកនាំផ្ទាល់ដោយ លោកវរសេនីយ៍ឯក យុង ញីវ នាយការិយាល័យព្រហ្មទណ្ឌកម្រិតស្រាល និងលោកវរសេនីយ៍ឯក ឥន្ទ មណ្ឌល អធិការនគរបាលក្រុងដូនកែវ ជនសង្ស័យករណីឃាតកម្ម២នាក់ត្រូវបានឃាត់ខ្លួននៅថ្ងៃទី១៤ ខែកក្កដា ឆ្នាំ២០២០ ក្រោយពួកគេប្រព្រឹត្តកាលពីថ្ងៃទី១៨ ខែវិច្ឆិកា ឆ្នាំ២០១៩ វេលាម៉ោង១២និង១៣នាទីរំលងអធ្រាត្រ នៅតាមបណ្ដោយផ្លូវជាតិលេខ២ ស្ថិតក្នុងភូមិប្រហ៊ូត សង្កាត់រកាក្រៅ ក្រុងដូនកែវ ខេត្តតាកែវ។ ជនសង្ស័យដែលឃាត់ខ្លួនមាន៖ទី១ ឈ្មោះ ប៉ុល ឆវ័ន ភេទប្រុស អាយុ១៩ឆ្នាំ មុខរបរមិនពិតប្រាកដ មានទីលំនៅភូមិក្រចាប់ សង្កាត់បារាយណ៍ ក្រុងដូនកែវ ខេត្តតាកែវ។ ទី២ ឈ្មោះ ឡាច កក្កដា ហៅដា ភេទប្រុស អាយុ១៧ឆ្នាំ មុខរបរជាងផ្សារដែក មានទីលំនៅភូមិខ្សឹង សង្កាត់រកាក្នុង ក្រុងដូនកែវ ខេត្តតាកែវ (ជាអ្នកបើកបរម៉ូតូ)។
បច្ចុប្បន្នជនសង្ស័យទាំង២នាក់ ត្រូវបានកម្លាំងជំនាញ នៃអធិការដ្ឋាននគរបាលក្រុងដូនកែវ កសាងសំណុំរឿងបញ្ជូនទៅសាលាដំបូងខេត្ត ចាត់ការតាមនីតិវិធី៕ ដោយ៖តាកែវ
