ស្ទឹងត្រែង ៖ កងរាជអាវុធហត្ថខេត្តស្ទឹងត្រែង បានប្រគល់រថយន្តពាក់ផ្លាកលេខក្លែងក្លាយ និងគ្មានឯកសារបង់ពន្ធចំនួន ៧ គ្រឿងជូនគយនៅព្រឹកថ្ងៃទី១៨ ខែកក្កដា ឆ្នាំ ២០២០។
ដោយមានការចង្អុលបង្ហាញ និងបញ្ជាផ្ទាល់ពីនាយឧត្តមសេនីយ៍សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស លោកឧត្តមសេនីយ៍ត្រី អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែង បានបើកកិច្ចប្រតិបត្តិការត្រួតពិនិត្យ លើយានយន្តពាក់ផ្លាកលេខ ខម ឆ្លងកាត់ភូមិសាស្ត្រខេត្តស្ទឹងត្រែង។
ក្រោយពីបានអនុវត្តបទបញ្ជា និងបានបង្ក្រាបរថយន្តពាក់ផ្លាកលេខក្លែងក្លាយ គ្មានឯកសារពាក់ពន្ធ អត់បង់ពន្ធនាំចូល និងពាក់ផ្លាកលេខ ខម។ ក្រោយពីត្រួតពិនិត្យលើយានយន្តនៅក្នុងភូមិសាស្ត្រខេត្តស្ទឹងត្រែងរួចមក អាវុធហត្ថខេត្តស្ទឹងត្រែង រកឃើញថា រថយន្តប្រភេទចង្កូតស្ដាំពាក់ផ្លាកលេខក្លែងក្លាយ មិនមែនជារបស់កងទ័ព និងគ្មានឯកសារបង់ពន្ធនាំចូលចំនួន ៧ គ្រឿង។
លោកព្រាប គារ៉ាត ប្រធានការិយាល័យតំបន់៦ នៃនាយកដ្ឋានបង្ការនិងបង្ក្រាបបទល្មើសគយ បានប្រាប់អ្នកសារព័ត៌មានថា រថយន្តទាំងអស់ ដែលខាងកម្លាំងកងរាជអាវុធហត្ថខេត្តស្ទឹងត្រែង បង្ក្រាបបានហើយ គយទទួលយក គឺជាប្រភេទរថយន្តពាក់ផ្លាកលេខក្លែងក្លាយ ដែលមិនមែនជាបន្ទុករបស់រដ្ឋ និងជារថយន្តអត់ពន្ធនាំចូល។
លោកព្រាប គារ៉ាត បានបញ្ជាក់ថា រថយន្តប្រើចង្កូតស្ដាំត្រូវបានប្រមុខរាជរដ្ឋាភិបាល ហាមឃាត់មិនឲ្យនាំចូលក្នុងប្រទេសកម្ពុជា តាំងពីឆ្នាំ ២០១៥មកម្ល៉េះ បើសិនជាឃើញរថយន្តប្រភេទចង្កូតស្ដាំស៊េរីទំនើប ត្រូវតែបង្ក្រាប។ លោកគារ៉ាត ក៏បានបញ្ជាក់ផងដែរថា ខាងគយរបស់លោក ទទួលទិសតំបន់ ៦ បានទទួលយករថយន្តអត់បង់ពន្ធជាង ១០ គ្រឿង ពីកងរាជអាវុធហត្ថខេត្តស្ទឹងត្រែង។ នេះគឺជាលើកទី ២ ហើយ ដែលកងរាជអាវុធហត្ថខេត្តស្ទឹងត្រែង បានប្រគល់រថយន្តចំនួន ៧ គ្រឿងបន្ថែមទៀត មកឱ្យគយ ដើម្បីបន្តអនុវត្តតាមនីតិវិធីច្បាប់។
ជាចុងក្រោយ លោកព្រាប គារ៉ាត ក៏បានកោតសរសើរ និងថ្លែងអំណរអរគុណ ដល់កម្លាំងកងរាជអាវុធហត្ថខេត្តស្ទឹងត្រែង ដែលបានបម្រើការងារនៅផ្នែកកងទ័ព និងបានបង្ក្រាបរថយន្តអត់ពន្ធប្រើផ្លាកលេខក្លែងក្លាយកងទ័ព ប្រគល់មកឲ្យនាយកដ្ឋានបង្ការ និងបង្ក្រាបបទល្មើសគយ៕
ដោយ៖សុខុម
