បាត់ដំបង ៖ ក្រសួងបរិស្ថានផ្តល់ម៉ាស៊ីននិងឧបករណ៍ត្រួតពិនិត្យខ្យល់និងសំឡេង បានធ្វើការដំឡើងក្នុងបរិវេណសាលាខេត្តបាត់ដំបងដើម្បីគ្រប់គ្រងគុណភាពខ្យល់និងសំឡេង (ពិនិត្យលើប៉ារ៉ាម៉ែត្រPM2.5, PM10 and TSP.) កាលពីថ្ងៃទី២២ ខែកក្កដា ឆ្នាំ២០២០។
លោក កត បូរ៉ាន ប្រធានមន្ទីរបរិស្ថានខេត្តបាត់ដំបង បានប្រាប់ឲ្យដឹងថា ម៉ាស៊ីនឧបករណ៍តាមដាន និងត្រួតពិនិត្យគុណភាពខ្យល់ និងសំឡេង ដែលត្រូវបំពាក់នេះមានចំនួន២គ្រឿង មានមួយគ្រឿងដំឡើងនៅក្នុងបរិវេណ នៃមន្ទីរបរិស្ថានខេត្ត និងមួយគ្រឿងទៀត ដំឡើងនៅបរិវេណសាលាខេត្តបាត់ដំបង។
ឯកឧត្តម ងួន រតនៈ អភិបាលខេត្តបាត់ដំបង បានសំណូមពរនិងក្រើនរំលឹកធ្វើយ៉ាងណា ឲ្យការដំឡើងបំពាក់នូវឧបករណ៍ទាំងនេះ រៀបចំឲ្យមានសោភ័ណភាព ត្រូវធានាឲ្យបានជាប់រឹងមាំ ចៀសវាងការដួលរលំ បង្កឲ្យប៉ះពាល់ដល់ការខូចខាត ម៉ាស៊ីនដែលមានតម្លៃប្រមាណជិត១ម៉ឺនដុល្លារអាមេរិកនេះ។
លោក ជា ណារ៉ា ប្រធាននាយកដ្ឋានគ្រប់គ្រងគុណភាពខ្យល់ និងសំឡេង នៃអគ្គនាយកដ្ឋានគាំពារបរិស្ថានរបស់ក្រសួងបរិស្ថាន បានបញ្ជាក់ប្រាប់តាមទូរស័ព្ទឲ្យដឹងថា ក្រសួងបរិស្ថានបានបំពាក់នូវឧបករណ៍បែបនេះ នៅគ្រប់តាមបណ្តារាជធានី-ខេត្តទាំង២៥ ដោយក្នុងនោះខេត្តតូច ទទួលបានការបំពាកនូវឧបករណ៍នេះ១គឿង និងបណ្តាខេត្តធំៗទទួលបាន២គ្រឿង។ ដោយឡែកនៅខេត្តសៀមរាប បានចំនួន៣គ្រឿង និងនៅរាជធានីភ្នំពេញ មានការបំពាក់ឧបករណ៍នេះ នៅច្រើនកន្លែង៕ ដោយ ៖ អ៊ុងសារុំ
