ខេត្តស្វាយរៀង៖ បុរសម្នាក់បានរងរបួសធ្ងន់ ដោយសារគ្រោះថ្នាក់ចរាចរណ៍មួយ រវាងម៉ូតូនិងរថយន្តស្ទូច ខណៈដែលជនរងគ្រោះបានជិះម៉ូតូមិនប្រកាន់ស្តាំ ដែលហេតុការណ៍ខាងលើនេះ បានកើតឡើងកាលពីវេលាម៉ោង១៥និង៥នាទីរសៀល ថ្ងៃទី២៣ ខែកក្កដា ឆ្នាំ២០២០ នៅ លើផ្លូវជាតិលេខ១ ស្ថិតក្នុងភូមិថ្នល់កែង ឃុំកណ្តៀងរាយ ស្រុកស្វាយទាប ខេត្តស្វាយរៀង ។
សមត្ថកិច្ចបានឱ្យដឹងថា គ្រោះថ្នាក់ខាងលើនេះ បង្កដោយម៉ូតូម៉ាកហុងដាសេ១២៥ ស៊េរីឆ្នាំ២០១៤ ពណ៌ខ្មៅ ពាក់ផ្លាកលេខ ស្វាយរៀង ១F ១៤២៩ បើកបរដោយឈ្មោះឥន យ៉ាន ភេទប្រុស អាយុ៣៥ ឆ្នាំ មុខរបរកសិកររស់ភួមិសាមគ្គី សង្កាត់ស្វាយតឿ ក្រុងស្វាយរៀង ខេត្តស្វាយរៀង រងរបួសធ្ងន់ បាក់ជើងខាងឆ្វេង (ពាក់មួកសុវត្ថិភាព) ទិសដៅពីកើតទៅលិច មកដល់ចំណុចកើតហេតុខាងលើ បានទៅបុករថយន្តស្ទូច ម៉ាក NISSAN ពណ៌ស ផ្លាកលេខ ភ្នំពេញ ៣CX ៥២៦៩ ចំជើងកង់រថយន្តផ្នែកខាងក្រោយ ក្នុងទិសដៅផ្ទុយគ្នាពីលិចទៅកើត បើកបរដោយឈ្មោះនាង ម៉ៅភេទប្រុស អាយុ២៣ឆ្នាំ មុខរបរបើកបរ រស់នៅភូមិរូបគោ សង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង គ្មានរបួសស្នាម (អ្នកបើកបររត់គេចពីកន្លែងកើតហេតុបាត់) អ្នករងរបួសបានបញ្ជូនទៅសម្រាកព្យាបាលនៅមន្ទីរពេទ្យបង្អែកជីភូ រីឯមធ្យោបាយទាំងពីខូចខាតស្រាល (រថយន្ត គ្មានការខូចខាត និងម៉ូតូ ខូចខាតស្រាល ហើយបានយកមករក្សាទុក នៅអធិការដ្ឋាននគរបាលស្រុកស្វាយទាប ដើម្បីចាត់ការបន្តទៅតាមផ្លូវច្បាប់។
ប្រភពដដែលបានឱ្យដឹងទៀតថា មូលហេតុ គឺ អ្នកបើកបរម៉ូតូមិនប្រកាន់ស្ដាំ៕ដោយ៖ វ៉ៃកូ
