ខេត្តស្វាយរៀង៖ យុវជន២នាក់បានស្លាប់ភ្លាមៗនៅកន្លែងកើតហេតុ និងម្នាក់ទៀតបានរងរបួសធ្ងន់ ដោយសារជនរងគ្រោះទាំង៣នាក់ បានជិះម៉ូតូមួយគ្រឿងឌុបគ្នា ជិះវ៉ាជែងក្នុងស្ថានភាពគ្រោះថ្នាក់ ទៅបុករថយន្តបើកបញ្ច្រាសទិសគ្នា ដែលហេតុការណ៍ខាងលើនេះ បានកើតឡើងកាលពីវេលាម៉ោង១០និង៥នាទីព្រឹក ថ្ងៃទី២៤ ខែកក្កដា ឆ្នាំ២០២០ នៅលើផ្លូវជាតិលេខ១ ចន្លោះគឺឡូម៉ែត្រលេខ ១៤៩-១៥០ ស្ថិតក្នុងភូមិកំពោតប្រោស សង្កាត់ច្រកម្ទេស ក្រុងបាវិត ខេត្តស្វាយរៀង ។
សមត្ថកិច្ចបានឱ្យដឹងថា មានម៉ូតូមួយគ្រឿងជិះគ្នា ៣ នាក់ ម៉ាកនិច ពណ៌ទឹកប្រាក់ ពាក់ផ្លាកលេខ ស្វាយរៀង 1N-0213 បើកបរដោយឈ្មោះ ឃួន ចន្ថន ភេទប្រុស អាយុ ១៧ ឆ្នាំ ជនជាតិខ្មែរ មុខរបរសិស្ស មានទីលំនៅភូមិព្រៃគៀវ ឃុំកំពង់ចក ស្រុករំដួល ខេត្តស្វាយរៀង (ស្លាប់នៅកន្លែងកើតហេតុ) និង អ្នករួមដំណើរ ២ នាក់ទៀត មាន ១. ឈ្មោះ ឆោ ធារិទ្ធ ភេទប្រុស អាយុ ១៦ ឆ្នាំ ជនជាតិខ្មែរ មុខរបរសិស្ស មានទីលំនៅក្នុងភូមិព្រៃព្នៅ១ ឃុំព្រៃព្នៅ ស្រុកស៊ីធរកណ្តាល ខេត្តព្រៃវែង (ស្លាប់នៅកន្លែងកើតហេតុ) ។ ២. ឈ្មោះ ផន សុផាន់ ភេទប្រុស អាយុ ១៨ ឆ្នាំ ជនជាតិខ្មែ មុខរបរកសិករ មានទីលំនៅក្នុងភូមិគោកស្រម៉ ឃុំសង្កែ ស្រុករំដួល ខេត្តស្វាយរៀង (រងរបួសធ្ងន់)។ ពួកគេបើកបរពីលិចទៅកើត លុះមកដល់ចំណុចកើតហេតុខាងលើ ក៏បានបុកប៉ះរថយន្តមួយគ្រឿងទៀត ម៉ាកស៊ីណា ពណ៌ស្ករ ពាក់ផ្លាកលេខ ភ្នំពេញ 2AP-1992 បើកបរដោយឈ្មោះ (មិនស្គាល់អត្តសញ្ញាណ) ក្នុងទិសដៅពីកើតទៅលិច រួចក៏បានខ្ទាតមកប៉ះរថយន្តម៉ាកហ៊ីយ៉ាន់ដាយមួយគ្រឿងទៀត ដែលកំពុងធ្វើដំណើរស្របទិសគ្នា ពីទិសខាងលិចទៅកើត (អ្នកបើកបរមិនស្គាល់អត្តសញ្ញាណ)។
ប្រភពដដែលបានបន្តទៀតថា បច្ចុប្បន្ន អ្នករងបួសត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកខេត្តស្វាយរៀង រីឯសាកសពត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី។ មូលហេតុគឺបណ្តាលមកពីអ្នកបើកម៉ូតូវ៉ាជែង ។ ចំពោះមធ្យោបាយ ទាំង៣គ្រឿងសមត្ថកិច្ចត្រូវបានយកមករក្សាទុកនៅអធិការដ្ឋាននគរបាលក្រុងបាវិត ដើម្បីកសាងសំណុំរឿងចាត់ការតាមច្បាប់៕ដោយ៖ វ៉ៃកូ
