តាកែវ៖ ក្រុមប្រជាពលរដ្ឋ ដែលរស់នៅក្នុងភូមិថ្លុកដូនទុំ ឃុំបានកាម ស្រុកព្រៃកប្បាស ប្រមាណ ជាង៣០០គ្រួសារ បានទទួលអំណោយដ៏ថ្លៃថ្លា ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ។
ការទទួលបានអំណោយជាផ្លូវបេតុងនេះ បន្ទាប់ពីបងប្អូនប្រជាពលរដ្ឋបានស្នើសុំសម្ដេចតេជោ ហ៊ុន សែន ឲ្យជួយជួសជុលផ្លូវមួយ ខ្សែនៅក្នុងភូមិថ្លុកដូនទុំ ឃុំបានកាម ក្នុងឱកាសដែលសម្ដេចចុះមកពិនិត្យមើលការ ប្រកបរបរកសិកកម្មរបស់បងប្អូនប្រជាពលរដ្ឋ នៅក្នុងស្រុកព្រៃកប្បាស ខេត្តតាកែវ កាលពីថ្ងៃទី២១ កក្កដា កន្លងទៅថ្មីៗនេះ ហើយនៅព្រឹកថ្ងៃអង្គារ ទី២៨ ខែកក្កដា ឆ្នាំ២០២០ នេះ លោក ខាន់ សុខា អភិបាលរងខេត្ត តំណាងឯកឧត្តម អ៊ូច ភា អភិបាលខេត្ត បាន ចាប់ផ្ដើមបើកការដ្ឋានសាងសង់ផ្លូវបេតុងនេះ ប្រវែងជាង៥០០ម៉ែត្រជូនបងប្អូនប្រជាពលរដ្ឋ។
លោក ខាន់ សុខា អភិបាលរងខេត្ត បានថ្លែងឲ្យដឹងថា បន្ទាប់ពីបងប្អូនប្រជាពលរដ្ឋ បានសំណូមពរសុំសម្ដេចតេជោ ឲ្យជួយកែលម្អនិងពង្រីកផ្លូវនៅក្នុងភូមិ ដែលពិបាកធ្វើដំណើរ ក៏ដូចជាពិបាកដឹកភោគផលកសិកម្ម សម្ដេចតេជោ ហ៊ុន សែន ក្នុងឱកាស ចុះមកស្រុកព្រៃកប្បាស់ ខេត្តតាកែវ កាលពីថ្ងៃទី២១ កន្លងមកនេះ សម្ដេចបានធ្វើការណែនាំ ដល់អាជ្ញាធរខេត្តតាកែវ ឲ្យចុះមកសិក្សាពីផ្លូវនេះ និងបើកការដ្ឋានធ្វើផ្លូវបេតុងប្រវែងជាង ៥០០ម៉ែត្រ និងទទឹង៥ ម៉ែត្រ ជូនបងប្អូនប្រជាពលរដ្ឋ ដើម្បីបង្ការការងាយស្រួល ក្នុងការធ្វើដំណើរ និងការដឹកជញ្ជូនកសិកផលទៅលក់នៅទីផ្សារបានទាន់ពេលវេលា។
លោកអភិបាលរងខេត្តតាកែវ បានមានប្រសាសន៍បន្តថា ជានិច្ចកាលសម្ដេចតេជោ ហ៊ុន សែន លោកតែងតែគិតគូពីសុខទុក្ខ របស់បងប្អូនប្រជាពលរដ្ឋគ្រប់ ទីកន្លែង ជាពិសេស នៅពេលដែលសម្ដេច លោកចុះមកជួបបងប្អូនកសិករ នៅក្នុងស្រុកព្រៃកប្បាស ខេត្តតាកែវ កាលពីពេលថ្មីៗនេះ សម្ដេចបានជួយឧបត្ថម្ភម៉ាស៊ីនព្រោះស្រូវ ដល់បងប្អូនកសិករជាច្រើនរយ គ្រឿង និងបានធ្វើផ្លូវមួយចំនួន តាមការស្នើសុំរបស់ប្រជាកសិករថែមទៀតផង។
ការផ្ដល់ម៉ាស៊ីនព្រោះស្រូវក៏ដូចជាការជួយជួសជុលកែលម្អផ្លូវ របស់សម្ដេចតេជោ ប្រមុខរាជរដ្ឋាភិបាល ជូនបងប្អូនប្រជាពលរដ្ឋ គឺជាការយកចឹត្តទុកដាក់ដល់ជីវភាពរស់នៅ របស់បងប្អូនប្រជាពលរដ្ឋ ដោយធ្វើការយ៉ាងណា ឲ្យបងប្អូនប្រជាពលរដ្ឋ អាចដឹកដំណាំកសិកម្មដែលបងប្អូនប្រមូលផល យកទៅលក់នៅលើទីផ្សារ បានឆាប់រហ័សនិងលក់បាន ក្នុងតម្លៃមួយសមរម្យថែមទៀតផង ៕ ដោយ៖តាកែវ
